Tajbʼilxix qMan Dios tuʼn qok te tamiw. Bʼiʼnpeteya tuʼn qa jaku tzʼoka te tamiw xjal nimxix toklen tibʼaj tkyaqil tlikʼlin kyaʼj? Ojtxi ok Abrahán te tamiw qMan Dios (Santiago 2:23). A Xjan Uʼj nyolin tiʼj txqantl xinaq mo ichin ix xuʼj mo qya, ax ikx kye e tzalaj tiʼj kyamiwbʼel tukʼe qMan Dios ix tzaj kkʼamoʼn nim kʼiwlabʼil. Nim xjal te tkyaqil twitz txʼotxʼ toj qqʼijlalil jaʼle ma chi ok te tamiw qMan Dios. Ax ikx teya jaku tzʼoka.

A tamiwbʼel qMan Dios atzan tbʼanilxixjo twitz te tkyaqil xjal. Mitiʼ nchi kubʼ tsbʼuʼn qMan Dios tamiw tzʼaqleqeʼ tukʼil (Salmo 18:25). Qa ma qo ok te tamiw qMan Dios atzen tbʼanilxixjo twitz qʼinumabʼil. Aj kkyim qʼinin junjuntl xjal nchi kyaj tukʼe kpwaq. Aqetzuntl kye at kyamiwbʼel tukʼe qMan Dios at jun kyqʼinemabʼil mi aʼlx jun jaku tzʼel qʼinte kye (Mateo 6:19).

Atqelo miʼn kyaj tuʼn telxix teye tnikʼ tiʼjju ntzaj t-xnaqʼtzaʼn qMan Dios. Jaku kubʼ kbʼinchan tamiwe ix qeʼ tuj tjaye (Mateo 10:36, 37). Qa at jun xjaw tzeʼn mo sok lipan tiʼja, xjelunkuya: «Alqe wajbʼile tuʼn wajbʼenaye, te qMan Dios mo kye xjal?». Ximinxa: qa at jun saj tqʼamaʼn teye mi waʼna, jaku bʼant tuʼna? Melayx. Quʼn tuʼn qanqʼin iltiʼj tuʼn qwaʼn. Ax ikx jaku bʼant tuʼn tanqʼina te jumajx tuʼn qMan Dios. Tuʼntzunjo, tzʼok tilil tuʼna tuʼn telxix tnikʼa seʼn jaku tzʼokaye te tamiw qMan Dios, mi txi tqʼoʼna ambʼil te alkyexku tuʼn tkyaj weʼ t-xnaqʼtzbʼile tuʼn (Juan 17:3).