Tuʼn ttenx jun qamiw, iltiʼj tuʼn qyolin tukʼe. In nok qbʼiʼn ex nqo ok tbʼiʼn ax ikx aj qyolin kyukʼe txqantl xjal nqo yolin tbʼanil tiʼj. Axjo kbʼantel quʼn, qa qaj tuʼn miʼn bʼaj qamiwbʼel tukʼe qMan Dios. Kiʼnke mo kaʼyinka aju ntzaj tqʼamaʼn Xjan Uʼj tuʼn tbʼant quʼn tiʼj jlu.

Te Jehová qo naʼla Dios tkyaqil qʼij. «Miʼn che qʼajene tuʼn kynaʼne Dios.» (Romanos 12:12.)

Qo uʼjin mo qo ẍchʼin Tuʼjil Tyol Dios, a Xjan Uʼj. «Tkyaqil aju tzʼibʼan tuj Tuʼjil, a Dios o qʼmante, ex at tajbʼen te xnaqʼtzbʼil qe, ex tuʼn qmayonjtz tuʼn miʼn qbʼinchante mya bʼaʼn, ex tuʼn tjiqumanjtz tiʼj qnabʼl.» (2 Timoteo 3:16.)

Kxel xnaqʼtzbʼil kye txqantl xjal tuʼn tel knikʼ tiʼj qMan Dios. «Kyjaʼtzun kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon, [...] kyqʼonxe xnaqʼtzbʼil kye tuʼn tjapun kyuʼn tkyaqilju ma txi nmaʼne kyeye.» (Mateo 28:19, 20.)

 Qo laqʼek ktxlaj tamiw qMan Dios. «Qa ma tzʼok tjunin tibʼa kyukʼil qeʼ xjal at kynabʼl, ktel [t]nabʼla.» (Proverbios 13:20.)

Iltiʼj tuʼn qxiʼ kyuj chmobʼil tuj Ja te Chmabʼil kye Testigos de Jehová. ‹Qo ximan tiʼj tuʼn qonin qibʼ qxolx tuʼn qkʼujlante qibʼ ex tuʼn qbʼinchante bʼaʼn [...] pero qqʼuqbʼank qkʼuʼj qxolx.› (Hebreos 10:24, 25.)

Qo onin tuʼn tbʼant aqʼuntl te tKawbʼil qMan Dios. «Teyle junjun qʼonx jun oyaj ik tzaʼn ma kubʼ t-ximan tuj tanmi; mya tukʼil bʼis tuʼn t-xi tqʼoʼn ex mya lajwers, porque aju xjal in xi tqʼoʼn oyaj tukʼil tzalajbʼil, in tzalaj Dios tiʼj.» (2 Corintios 9:7.)