Nxi tiʼn nim ambʼil tuʼn qok te amiw ex tuʼn kten qamiw. Qa ma tzoʼk tilil quʼn tuʼn qok te tamiw qMan Dios ex qa ma tenx qamiwbʼel tukʼe, ok tzul tiʼn nim kʼiwlabʼil. Tqʼama Jesús kyeqeʼj ok kqʼuqbʼaʼn kkʼuʼj tiʼj: «Ex che tzoqpetele tuʼnju yol axix tok» (Juan 8:32). Tiʼ tqʼama Jesús tukʼe jlu?

Jaku qo tzalaj tiʼj tzaqpibʼil jaʼlin. Jaku qo tzoqpaj tiʼj xnaqʼtzbʼil nya axix tok ex tiʼj nya axyol aju ma bʼaj tchiten Satanás. Nimxix qeʼ xjal ntzaj bʼaj kykʼuʼj toj kyanqʼibʼil tuʼnjo mitiʼ ojtzqiʼn Jehová kyuʼn, atzunqe jaku qo tzaqpaj tiʼj tkyaqil jlu (Romanos 8:22). Aqe tamiw qMan Dios mitiʼx «in che xobʼ twitz kamik» (Hebreos 2:14, 15).

Qo tzalajelxix tiʼj tzaqpibʼil ktel tuj akʼaj twitz txʼotxʼ. ¡Tbʼanelxix tzaqpibʼel tzul qe! Aj tok Txʼotxʼ te Tbʼanel Najbʼil te Tzalajbʼil, mi chi tentl nimaq qʼoj, mi chi tentl yabʼil nix bʼinchel mya bʼaʼn tiʼj juntl. Miʼ tentl mebʼayil nix waʼyij. Ax ok qo tzoqpetel tiʼj tijil ex tiʼj kamik, ax ikx tiʼj xobʼajil, tiʼj jtzʼobʼil ex tiʼj bʼinchbʼen nya jiqin. A Xjan Uʼj nqʼmante tiʼj qMan Dios: ‹Tkyaqil nxi tqʼoʼna kye ex tuʼn t-xtalbʼila, in che noj kykyaqil qeʼ tchʼisbʼena› (Salmo 145:16).

 Ok chi anqʼil tamiw qMan Dios te jumajx. Aju chwinqlabʼil te jumajx atzun jun tbʼanel oyaj tzul tqʼoʼn qMan Dios kyeqeʼj nche jyon kyamiwbʼel tukʼil (Romanos 6:23). Ximeye jun rat tiʼ t-xilen anqʼibʼel te jumajx teye.

Ktel nim ambʼil tuʼn tbʼant nim tiʼchaq quʼn. Ktel lo qajbʼil tuʼn tbʼant qchinbʼan jun chnabʼ te bʼitzbʼil, ex tuʼn tok qsuʼn kkʼaʼ tilbʼilal ex tuʼn tbʼinchet nim aqʼuntl ik tzeʼnj tuʼn kkubʼ bʼinchet tzʼlam. Axle qaj tuʼn qxnaqʼtzan kyiʼj txkup ex kyiʼj tzeʼ. Mo tuʼn qbʼet tuʼntzun tok qojtzqiʼn txqantl nimaq tnam ex qeʼ kxjalil. Kbʼantel tkyaqil jlu quʼn, quʼn ktel qchwinqlal te jumajx.

Ktel nim ambʼil tuʼn kkanet nim qamiw. Quʼn qo anqʼil te jumajx, ok chi okil qojtzqiʼn txqantl tamiw qMan Dios. Kʼokil qojtzqiʼn tbʼanel tiʼchaq aqʼuntl nbʼant kyuʼn, ex aju tbʼanel kmod ex qo okel te kyamiw. Chi okel qkʼujlaʼn ax ikx kye qo okel kkʼujlaʼn (1 Corintios 13:8). Quʼn ktel qchwinqlal te jumajx, qo okil te kyamiw kkyaqil xjal chi najal twitz Txʼotxʼ. Aju tbʼanilxix twitz tkyaqil jluʼ, aju qamiwbʼel tukʼe Jehová kchʼiyel aj tbʼet ambʼil. ¡Qo ok te tamiw qMan Dios te jun majx!