Qa qajbʼilxix tuʼn qok te tamiw qMan Dios, iltiʼj tuʼn qten tuj okslabʼil ntkʼamoʼn qMan Dios. Tqʼama Jesús kyjalu ‹qeju in che kʼulun tukʼe axix tok› ok chi kʼulil te qMan Dios tukʼe «axix tok» (Juan 4:23, 24). Naqx junx tumel at tzeʼn tten tuʼn qkʼulen twitz qMan Dios (Efesios 4:4-6). A okslabʼil axix tok nchex tiʼn xjal toj chwinqlabʼil te jun majx, atzuntl teʼ okslabʼil nya axix tok nchex tiʼn xjal tuj najsbʼil (Mateo 7:13, 14).

Jaku tzʼel qnikʼ alkye axix tok okslabʼil, aj kyok qkyeʼyin tzeʼn kbʼinchbʼen xjal ateʼkx toj. Ik tzaʼnj te Jehová tbʼanelxix, ax ikx qeʼ nchi kʼulin te iltiʼj tuʼn kyok te tbʼanil xjal. Ik tzeʼnj jun wiʼ lanch mo naranj in nel tbʼanel twitz, iktzun te okslabʼil axix tokjo in nonin kyiʼj xjal tuʼn kyok te tbʼanil (Mateo 7:15-20).

Nimxix toklen Xjan Uʼj kye tamiw Jehová. Ojtzqiʼn kyuʼn qa a Xjan Uʼj tzajni tukʼe qMan Dios. Tuʼntzunjo, nxi kyqʼoʼn ambʼil te tuʼn t-xiʼ tyekʼiʼn bʼe tuj kchwinqlal, tuʼn tkanet ttxolil mya bʼaʼn ntzaj kyiʼj ex in nonin tuʼn telxix kynikʼ tiʼj qMan Dios (2 Timoteo 3:16). Nya oʼkxjo, ax nok tilil kyuʼn tzaʼn tuʼn tkubʼ kbʼinchen aju nchi pakbʼan tiʼj.

 In nok kkʼujlaʼn kyibʼ tamiw Jehová kxolx. Kubʼ tyekʼin Jesús qa nim tkʼujlabʼil kyiʼj xjal, tuʼntzun jlu e kubʼ t-xnaqʼtzaʼn tiʼj qMan Dios ex e kubʼ tqʼanin yabʼ. Ikxtzun kye nkubʼ kxnaqʼtzaʼn okslabʼil axix tok ax in nok kkʼujlaʼn txqantl xjal. Ik tzaʼn te Jesús, mitiʼ in nel kyikʼen qeʼ mebʼa mo prow nix qeʼ xjal te junxitl kyajil. Tqʼma Jesús qa kʼelel knikʼ xjal alkyeqeʼ lepchiqeʼk tiʼj t-xnaqʼtzbʼil, tuʼnjo kkʼujlabʼil ktel kxol (Juan 13:35).

Aqe tamiw qMan Dios njaw knimsan tbʼi: atzun te tbʼi Jehová. Qa at jun nya tajbʼil tuʼn tajbʼen qbʼi tuʼn, jaku bʼant tuʼn tok te qamiw? Melayx. Qa at jun qamiw ntzaj qtxkoʼn tukʼe tbʼi ix nqo yolin tbʼanil tiʼj. Ikxtzun ttenjo kyukʼe kyajbʼil tuʼn kyok te tamiw qMan Dios, iltiʼj tuʼn tajbʼen tbʼi kyuʼn ex tuʼn t-xiʼ kqʼamaʼn kye txqantl xjal. Iktzun taj qMan Jehovájo tuʼn tbʼant quʼn (Mateo 6:9; Romanos 10:13, 14).

Ayeʼ tamiw qMan Dios nchi kubʼ kxnaqʼtzaʼn xjal tiʼj tKawbʼil, ik tzaʼnj xbʼent tuʼn Jesús. A tKawbʼil qMan Dios atzun jun kawbʼiljo te tuj kyaʼj aju kbʼel tbʼinchaʼn Txʼotxʼ te Tbʼanel Najbʼil te Tzalajbʼil. Tuʼntzunjo, nxi kmaʼn tamiw qMan Dios kye txqantl xjal aju tbʼanil tqanil tiʼj tKawbʼil (Mateo 24:14).

Aqe testigos de Jehová nok tilil kyuʼn tzaʼn tuʼn kyok te tamiw qMan Dios. In nokx kbʼiʼn aju tkuʼx toj Xjan Uʼj ex in nok kkʼujlaʼn kyibʼ kxolx. Ax in najbʼen ix njaw knimsaʼn tbʼi qMan Dios ex nchi kubʼ kxnaqʼtzaʼn txqantl xjal tiʼj tKawbʼil. Eyeʼ testigos de Jehová nchi xnaqʼtzan ex nkubʼ kbʼinchen axix tok okslabʼil jaʼlin twitz Txʼotxʼ.