Tej naʼmxtaq tul itzʼji Jesús twitz Txʼotxʼ ik tzeʼn jun xjal, jun anjeltaq toj kyaʼj. Tuʼntzen aju, nya iktaq ik tzeʼn qe xjal (Juan 8:23). A Jesús tnejel tbʼinchbʼen Jehová ex onen tiʼj tuʼn tbʼinchet tkyaqilju at. In tzaj tqʼamaʼn Tyol Dios qa «oʼkxku» Jesús «jun Tkʼwaʼl» Dios tuʼnju tjunalxtaq Dios at tej tkubʼ tbʼinchaʼn Jesús (Juan 1:14). Ax ikx in nok qʼoʼn te «Yol», tuʼnju xi tqʼamaʼn aju tzaj tqʼamaʼn tTat te. Jyonkuxa Proverbios 8:22, 23, 30 ex Colosenses 1:15, 16.

Tzaj t-samaʼn Dios tKʼwaʼl (tKyʼajol) tzalu twitz Txʼotxʼ. Tuʼn tbʼant jlu tuʼn, ok tqʼoʼn tchwinqlal (tanqʼibʼil) tKʼwaʼl toj talbʼil María jun txin, moqa jun qʼapoj, te tnam Judá aju naʼmxtaq tkubʼ ten tukʼe jun xjal. A jlu in tzaj tyekʼun qa nya jun xjal ttat Jesús ten (Lucas 1:30-35). At oxe tiquʼn ul Jesús tzalu twitz Txʼotxʼ: 1) tuʼn tkubʼ t-xnaqʼtzaʼn axix tok (bʼaʼn ax) tiʼj Dios, 2) tuʼn ttzaj tyekʼun qe alkye tten tuʼn tbʼant tajbʼil Dios quʼn inchq, moqa maske, ma qok weʼ twitz nimku nya bʼaʼn, ex 3) tuʼn t-xi tqʼoʼn tchwinqlal tzʼaqle «tuʼn kykolpet nimku xjal». Jyonkuxa Mateo 20:28.

Tuʼn tklet jun xjal il tiʼj tuʼn t-xi chjet jun chojbʼil tuʼn ttzaqpaj (Éxodo 21:29, 30). Nya tajtaq (nya tgantoq) Dios tuʼn kytijen nix tuʼn kykyim xjal. In nel qnikʼ tiʼj jlu tuʼnju xi tqʼamaʼn Jehová te Adán qa ma kubʼtaq tbʼinchen il —toj juntl yol, qa mitiʼ (tiloʼ) sokx tbʼiʼn Dios—, ok kkyimeltaq. Tuʼntzun aju, naqwit mitiʼ ilen  Adán, mitiʼwtlo kyim (Génesis 2:16, 17; 5:5). In tzaj tqʼamaʼn Tyol Dios qa tuʼn Adán «okx il kyxol kykyaqil xjal». Toj juntl yol, kyaj tqʼoʼn Adán il kyibʼaj tkʼwaʼl ex tuʼn jlu kubʼ kysentens tuʼn kykyim. Tuʼntzen jlu, ilxix tiʼj jun chojbʼil qil. Jyonkuxa Romanos 5:12 ex 6:23.

Naqtzun tuʼnj, ¿alkyetaq jaku txi tqʼoʼn chojbʼil tuʼn qklet tiʼj kyimen? Aj qkyim, in chjet aju qsentens kubʼ qʼoʼn tuʼnx qil. Tuʼnju aj il xjal qoʼ, mix aʼl jun qe jaku chjet til juntl tuʼn. Jyonkuxa Salmo 49:7-9.

Tzʼaqletaq te Jesús nya ik tzeʼn qoʼ ex mitiʼx kubʼ tbʼinchen jun il. Tuʼntzen aju, kyim tuʼn tchjet kyil txqantl, ex nya tuʼn tchjet aju tex til. Tej tzaj t-samaʼn Dios tkʼwaʼl tuʼn tkyim, kubʼ tyekʼun qa kʼujlaʼnxix qe xjal tuʼn. Ax ikx kubʼ tyekʼun Jesús qa kʼujlaʼn qoʼ tuʼn tej tokx tbʼiʼn tTat ex tej t-xi tqʼoʼn tchwinqlal tuʼn qtzaqpaj tiʼj il ex kyimen. Jyonkuxa Juan 3:16 ex Romanos 5:18, 19.

Qʼonka twitza tiʼj video ¿Tiquʼn kyim Jesús?

Tej tten Jesús tzalu twitz Txʼotxʼ, e qʼanet yabʼ tuʼn, e jaw anqʼin kyimni tuʼn, ex onin kyiʼj qeju ateʼtaq toj kʼixkʼej, iktzun tten kubʼ tyekʼun aju kbʼantel tuʼn kye xjal in che bʼin te Dios (Mateo 15:30, 31; Juan 5:28). Tej tkyim Jesús, jaw anqʼin tuʼn Dios ex ok juntl maj te xewbʼaj, moqa ik tzeʼn jun anjel (1 Pedro 3:18, NM). Ex oktzun ten Jesús ayol ttxlaj tTat ajxitaq tzaj qʼoʼn toklen tuʼn tKawin tibʼaj Txʼotxʼ (Hebreos 10:12, 13). Toj ambʼil jaʼlo (jaʼla), in kawen Jesús toj kyaʼj, ex aʼyeju lepcheqeʼk tiʼj in xi kyqʼamaʼn tbʼanel tqanil lu twitz tkyaqil Txʼotxʼ. Jyonkuxa Daniel 7:13, 14 ex Mateo 24:14.

Tukʼeju toklen ajKawil nim tipumal (tbʼalor) o txi tqʼoʼn Dios, chʼix tpon ambʼil tuʼn kykubʼ tnajsaʼn nya bʼaʼn xjal tukʼexju nya bʼaʼn in tzaj kyuʼn. Kykyaqil qeju in nok qʼuqeʼ kykʼuʼj tiʼj Jesús ex in xi kybʼiʼn ok che anqʼil toj tzalajbʼil tzalu twitz Txʼotxʼ, aj tok te jun tbʼanel najbʼil. Jyonkuxa Salmo 37:9-11.