XNAQʼTZBʼIL 14
¿Tiquʼn ilxix tiʼj tuʼn tbʼaj kynukʼun kyibʼ tmajen Dios?
1. ¿Tiquʼn bʼaj tnukʼuʼn Dios ojtxi tnam Israel?
E bʼaj tnukʼuʼn Dios qe tyajil Abrahán tuʼn kyok te jun tnam ex xi tqʼoʼn qe kawbʼil kye. Ok tqʼoʼn tbʼi tnam lu te Israel ex xi tqʼoʼn kyoklen tuʼn kykolin tiʼj axix tok (bʼaʼn ax) okslabʼil ex tiʼj Tyol (Salmo 147:19, 20). Tuʼnju kbʼanteltaq kyuʼn aj Israel, jakutaq che tzaj kʼiwlaʼn xjal te tkyaqil tnam. Jyonkuxa Génesis 22:18.
E jaw t-skʼoʼn Dios qe aj Israel tuʼn kyok te ttestiw. Aju ojtxe txʼolbʼabʼil tiʼj tnam lu in tzaj tyekʼun qa ma che okx qbʼiʼn tkawbʼil Dios ok qo anqʼil toj tbʼanel (Deuteronomio 4:6). Kyuʼn aj Israel, jakutaq tzʼel kynikʼ txqantl xjal tiʼj axix tok Dios. Jyonkuxa Isaías 43:10, 12.
2. ¿Tiquʼn ilxix tiʼj tuʼn tbʼaj kynukʼun kyibʼ axix tok okslal?
Tej tel tpan tibʼ tnam Israel tiʼj Jehová, e jaw tjyoʼn Jehová qe okslal te t-xel (tchʼixel) tnam lu (Mateo 21:43; 23:37, 38). Iktzun tten toj ambʼil jaʼlo (jaʼla), aʼyeqe axix tok okslal (nimel) in che ajbʼen te Jehová te ttestiw ex nya aʼyeqe aj Israel. Jyonkuxa Hechos 15:14, 17.
E bʼaj tnukʼuʼn Jesús qeju lepchiqeʼk tiʼj tuʼn t-xi pakbʼet Tyol Dios ex tuʼn t-xi qʼet xnaqʼtzbʼil kye xjal twitz tkyaqil Txʼotxʼ (Mateo 10:7, 11; 24:14; 28:19, 20). Jaʼlo, toj bʼajsbʼil tqʼijlal, mas in xi pakbʼet tbʼanel tqanil. Toj ambʼil jaʼlo aju nimxix toklen, in che tzaj tiʼn Jehová xjal te tkyaqil tnam tuʼn kyoktz toj axix tok okslabʼil tuʼn kyten junx (Apocalipsis 7:9, 10). Tuʼnju nukʼuʼn kyten axix tok okslal, jaku che onin kyibʼ ex jaku tzʼok kyqʼuqbʼaʼn kykʼuʼj kyxolx. Ax ikx, ax xnaqʼtzbʼil in kubʼ kyxnaqʼtzaʼn tiʼj Tyol Dios kyoj kychmabʼil twitz tkyaqil Txʼotxʼ. Jyonkuxa Hebreos 10:24, 25.
3. ¿Alkye tten tzaj tzyet juntl maj aqʼuntl kyuʼn testigos de Jehová toj ambʼil jaʼlo?
Toj abʼqʼi 1870, jun kʼloj xnaqʼtzal tiʼj tyol Dios tzaj tzyet tuʼn tel kynikʼ tiʼj axix tok xnaqʼtzbʼil toj Tyol Dios aju mitiʼ (tiloʼ) el nikʼ tiʼj toj nimku ambʼil. Ojtzqiʼntaq kyuʼn qa e bʼaj tnukʼuʼn Jesús qe okslal tuʼn kypakbʼan, tuʼntzen aju, xi tzyet tuʼn t-xi kypakbʼaʼn tbʼanel tqanil tiʼj tKawbʼil Dios twitz tkyaqil Txʼotxʼ. Toj abʼqʼi 1931 ok kyqʼoʼn kybʼi te testigos de Jehová. Jyonkuxa Hechos 1:8; 2:1, 4, 11, ex 5:42.
4. ¿Alkye tten nukʼun kyten testigos de Jehová?
Toj tnejel syent abʼqʼi, attaq jun kʼloj xjal qʼil twitz aqʼuntl onil kyiʼj kykyaqil kʼloj okslal, aju kʼloj xjal lu in neltaq tnikʼ qa a Jesús Wibʼaj kye okslal (Hechos 16:4, 5). Ax ik kye testigos de Jehová toj ambʼil jaʼlo at jun Kʼloj Xjal Qʼil Twitz Aqʼuntl kyxol aʼyeju at kynabʼil, aʼyeju in nok kyqʼoʼn kywitz tiʼj aqʼuntl in bʼant kyojele ninja qʼil twitz aqʼuntl twitz tkyaqil Txʼotxʼ. Kyoj ninja lu, in che kubʼ qʼet uʼj kyoj txqantl yol, in che etz uʼj toj kʼuxbʼil ex in chex sipet uʼj tuʼn tel kynikʼ xjal tiʼj Tyol Dios toj mas twitz waqaq syent yol. In najbʼen Tyol Dios tuʼn kʼloj xjal lu tuʼn tok tqʼuqbʼaʼn kykʼuʼj ex tuʼn t-xi tyekʼun kybʼe qeju mas twitz jun syent mil kʼloj okslal. Kyxolele kʼloj okslal ateʼ xinaq, moqa ichan, at kynabʼil aʼyeju in che xqʼuqin kyiʼj t-ẍneʼl, moqa t-rit, Dios tukʼe kʼujlabʼil. Jyonkuxa 1 Pedro 5:2, 3.
Nukʼuʼn kyten testigos de Jehová tuʼn kypakbʼan tiʼj tbʼanel tqanil ex tuʼn t-xi kyqʼoʼn xnaqʼtzbʼil kye xjal. Ik tzeʼn bʼant kyuʼn apóstol, in che pakbʼan kyojele ja (Hechos 20:20). Ax ikx in xi kyqʼoʼn xnaqʼtzbʼil tiʼj Tyol Dios kye xjal aʼyeju kʼujlaʼn axix tok kyuʼn. Nya oʼkx jun okslabʼil qe testigos de Jehová; quʼn ax ikx kyerman kyibʼ kykyaqil ik tzeʼn jun ja xjal ex in nokxix kykʼujlan kyibʼ ex in che tzalaj tuʼnju in che ok xqʼuqin tuʼn kyTat aju at toj kyaʼj (2 Tesalonicenses 1:3). In bʼaj kynukʼun kyibʼ tmajen Dios tuʼn ttzalaj kyuʼn ex tuʼn kyonin kyiʼj xjal, ex tuʼnju in bʼant kyuʼn mas in che tzalajxix twitz alkyexku ja xjal twitz tkyaqil Txʼotxʼ. Jyonkuxa Salmo 33:12 ex Hechos 20:35.
