XNAQʼTZBʼIL 6
¿Okpe che jawil anqʼin kyimni?
1. ¿Alkye tbʼanel tqanil at kyiʼj kyimni?
Jun maj, tej attaq Jesús twitz Txʼotxʼ, kyim tamiw aju Lázaro tbʼi. In nanqʼintaq Lázaro toj tnam Betania, jun kojbʼil toktaq ttxlaj Jerusalén. Tej tpon Jesús, otaq tzikʼ kyaje qʼij tkyimlen Lázaro. Xiʼ Jesús junx tukʼe Marta ex María —aʼye tanabʼ kyimni— atz jatumel kux muquʼn Lázaro, ex tej tikʼ chʼin ambʼil e pon nim (bʼampo) xjal. ¿Jaku bʼant t-ximet tuʼna aju tzalajbʼil tnaʼ Marta ex María tej tjaw anqʼin Lázaro tuʼn Jesús? Jyonkuxa Juan 11:21-24, 38-44.
Otaq tzʼel tnikʼ Marta qa at tbʼanel tqanil kyiʼj kyimni. Ojtzqiʼntaq tuʼn qa che jawil anqʼin kyimni tuʼn Jehová tuʼn kyanqʼin juntl maj twitz Txʼotxʼ. Jyonkuxa Job 14:14, 15.
2. ¿Jatumel ateʼqe kyimni?
Xi tqʼamaʼn Dios jlu te Adán: «Tquqil txʼotxʼa, ex ax tquqil txʼotxʼ kʼokela ok tkyima.» (GÉNESIS 3:19)
Aqoʼ xjal o qo kubʼ bʼinchaʼn «tiʼj tquqil txʼotxʼ» (Génesis 2:7; 3:19). Nya jun xewbʼaj qoʼ ex mitiʼ (tiloʼ) in tzaj qmajenaʼn jun qxmilal tuʼn qanqʼin toj, tuʼnju xjal qoʼ ex nya kukx in qo anqʼin otaqxi qo kyim. Aj tnaj t-sesil qwiʼ, moqa qjolon (cerebro), in naj tkyaqil qximbʼetz. Tuʼntzun jlu, mitiʼtl in kynaʼn kyimni tzalajbʼil nix kʼixkʼej. Tuʼntzen aju, tej tjaw anqʼin Lázaro mitiʼ tqʼama jun tiʼ. Jyonkuxa Salmo 146:4 ex Eclesiastés 9:5, 6, 10.
At junjun in kubʼ ximente qa aj kykyim xjal in che kux tqʼoʼn Dios toj qʼaqʼ, moqa toj infierno, tuʼn kyten toj kʼixkʼej, naqtzun tuʼnj, nya ax tok (nya bʼaʼn ax) jlu. Ik tzeʼn ma qo xnaqʼtzan tiʼj, aʼye kyimni ya mitiʼtl in kynaʼn. A jlu in tzaj tyekʼun qa aju xnaqʼtzbʼil tiʼj qʼaqʼ in yolin nya bʼaʼn tiʼj Jehová ex nya ax tok, nyape bʼaʼn in nela toj twitz aju ximbʼetz tuʼn tkux qʼet jun xjal toj qʼaqʼ. Jyonkuxa Jeremías 7:31.
Qʼonka twitza tiʼj video ¿Jatumel ateʼqe kyimni?
3. ¿Jaku qo yolin kyukʼe kyimni?
Mlay bʼant kyyolin ex mlay bʼant kybʼiʼn kyimni (Salmo 115:17). Naqtzun tuʼnj, at junjun anjel nya bʼaʼn aʼyeju jaku bʼant kyyolin kyukʼil xjal ex in nok kyqʼon kyibʼ te kyimni (2 Pedro 2:4). Tuʼntzen aju, nya taj (nya tgan) Jehová tuʼn qjyon tumel tuʼn qyolin kyukʼe qeju xjal o che kyim. Jyonkuxa Deuteronomio 18:10, 11.
4. ¿Alkyeqe ok che jawil anqʼin juntl maj?
Aʼyeju nimxix xjal o che kyim ok che jawil anqʼin juntl maj tuʼn kyanqʼin twitz Txʼotxʼ. Axpe ikx ok che jawil anqʼin qe xjal aʼyeju mitiʼ ok kyojtzqiʼn Jehová ex kubʼ kybʼinchen nya bʼaʼn. Jyonkuxa Salmo 37:29 ex Hechos 24:15.
Aʼyeju che jawil anqʼin ok kʼelel kynikʼ tiʼj axix tok tiʼj Dios, ok kʼokel qʼuqeʼ kykʼuʼj tiʼj Jesús ex kbʼel kyyekʼun qa in chex kynimen tkawbʼil Dios (Apocalipsis 20:11-13). Qa ma bʼant ikju kyuʼn, ok che anqʼil te jun majx (juneleʼx) twitz Txʼotxʼ. Jyonkuxa Juan 5:28, 29, NM.
5. ¿Tiʼ in tzaj tyekʼun tiʼj Jehová aju qa ok che jawil anqʼin kyimni?
Ok che jawil anqʼin juntl maj kyimni naq tuʼn t-xtalbʼil Jehová, a jlu jun yekʼbʼil tiʼj tkʼujlabʼil ex tiʼj qa tbʼanel kyukʼe xjal. Tuʼnju tzaj t-samaʼn Dios tKʼwaʼl (tKyʼajol) tuʼn tkyim tuʼn tchjet qil, ok qo jawil anqʼin juntl maj qa ma qo kyim. Yejtzun teya, ¿alkye taja tuʼn tjaw anqʼin? Jyonkuxa Juan 3:16 ex Romanos 6:23.
