XNAQʼTZBʼIL 12
¿Alkye tten jaku qo pon laqʼeʼ ttxlaj Dios?
1. ¿Tkyaqilpe naʼj Dios in che tzaj tbʼiʼn Jehová?
In txoken Dios kyiʼj kykyaqil kyyajil, moqa kyiyjil, xjal tuʼn kynaʼn Dios tuʼntzun kyxi laqʼeʼ ttxlaj (Salmo 65:2). Naqtzen tuʼnj, mitiʼ (tiloʼ) in tzaj tyekʼun jlu qa in xi tbʼiʼn, moqa in xi tkʼamoʼn, tkyaqil naʼj Dios. In tzaj tqʼamaʼn Tyol Dios qa at jun xinaq nya bʼaʼn tmod tukʼe t-xuʼjil a jlu jaku «tzʼok miyoʼnte» tnaʼj Dios, moqa mlay tzaj bʼiʼn tnaʼj Dios (1 Pedro 3:7, ATM). Ex tej in kubʼtaq kybʼinchaʼn aj Israel nim (bʼampo) maj nya bʼaʼn, nya tajtaq Dios tuʼn ttzaj tbʼiʼn kynaʼj Dios. Naqtzun tuʼnj, in tzaj tbʼiʼn kynaʼj Dios qeju o kubʼ kybʼinchaʼn nimaq il qa ma tzʼajtz tiʼj kyanmi. Jyonkuxa Isaías 1:15 ex 55:7.
Qʼonka twitza tiʼj video ¿Tkyaqilpe naʼj Dios in che tzaj tbʼiʼn Jehová?
2. ¿Alkye tten ilxix tiʼj tuʼn qnaʼn Dios?
Aju qnaʼj Dios at toklen tukʼeju in qo ajbʼen te Dios, tuʼntzen aju, ilxix tiʼj tuʼn qnaʼn Dios oʼkx te Jehová (Mateo 4:10; 6:9). Ax ikx, tuʼnju aj il qoʼ, il tiʼj tuʼn qnaʼn Dios toj tbʼi Jesús, tuʼnju kyim tuʼn qil (Juan 14:6). Nya taj Jehová tuʼn t-xi qqʼamaʼn ax qnaʼj Dios aju otaq kyaj toj qwiʼ moqa aju tzʼibʼan majtl, quʼn taj (tgan) tuʼn qnaʼn Dios tukʼe tkyaqil qanmi. Jyonkuxa Mateo 6:7 ex Filipenses 4:6, 7.
Axpe ikx aju Bʼinchal qe in tzaj tbʼiʼn aj qnaʼn Dios naqx toj qanmi (1 Samuel 1:12, 13). Ex in txoken qiʼj tuʼn qnaʼn Dios toj tkyaqil ambʼil, ik tzeʼn aj qjaw weʼ aj qkubʼ koẍeʼ, aj qok ten waʼl moqa aj qok weʼ twitz nya bʼaʼn. Jyonkuxa Salmo 55:22 ex Mateo 15:36.
3. ¿Alkye tten in che onin chmabʼil qiʼj?
Kwest tuʼn qxi laqʼeʼ ttxlaj Dios tuʼnju in qo anqʼin kyxol xjal mitiʼ qʼuqli kykʼuʼj tiʼj, axpe ikx in che xmayin tiʼjju o tzaj ttziyen Dios aju qa tzul tiʼn mojbʼabʼil tzalu twitz Txʼotxʼ (2 Timoteo 3:1, 4; 2 Pedro 3:3, 13). Tuʼntzun jlu, ilxix tiʼj tuʼn tok qchmon qibʼ kyukʼil qerman tuʼn ttzaj kyqʼuqbʼaʼn qkʼuʼj ex tuʼn t-xi qqʼuqbʼaʼn kykʼuʼj. Jyonkuxa Hebreos 10:24, 25.
Qa ma tzʼok qchmon qibʼ kyukʼe xjal in nok kykʼujlaʼn Dios ok qo tzajel tonin tuʼn qok laqʼeʼ ttxlaj Dios. Aʼyeju kychmabʼil testigos de Jehová in che onin qiʼj tuʼn tel qkanoʼn qʼuqbʼil kykʼuʼj txqantl. Jyonkuxa Romanos 1:11, 12.
4. ¿Tiʼ kbʼantel tuʼna tuʼn t-xi laqʼeʼya ttxlaj Dios?
Jaku txi laqʼeʼya ttxlaj Dios qa ma ximana tiʼjju o tzʼel tnikʼa tiʼj toj Tuʼjil Tyol. Bʼaʼn tuʼn t-ximana kyiʼj qe tbʼinchbʼen, kyiʼj qe tkawbʼil ex tiʼjju o tzaj ttziyen. Qa ma ximana ex qa ma naʼna Dios, a jlu kʼonil tiʼja tuʼn tel tnikʼa tiʼj nimxix tkʼujlabʼil ex tnabʼil Dios. Jyonkuxa Josué 1:8 ex Salmo 1:1-3.
Oʼkx jaku tena ttxlaj Dios qa ma tzʼok qʼuqeʼ tkʼuʼja tiʼj. Naqtzen tuʼnj, aju qʼuqbʼil qkʼuʼj ik tten ik tzeʼn jun wiʼ awal aju il tiʼj tuʼn kukx tkux qʼet aʼ t-xeʼ, ax ikx il tiʼj tuʼn kukx qximen tiquʼn in nok qʼuqeʼ qkʼuʼj tiʼjju in qo xnaqʼtzan tiʼj. Jyonkuxa Mateo 4:4 ex Hebreos 11:1, 6.
5. ¿Tzeʼn in nonin qiʼj qa ma qo ok laqʼeʼ ttxlaj Dios?
In che ok tkʼujlaʼn Jehová xjal at kykʼuʼj tiʼj. Jaku kolin kyiʼj tuʼn miʼ ttzaj jun nya bʼaʼn tiʼj qʼuqbʼil kykʼuʼj ex jaku tzʼonin kyiʼj tuʼn kyanqʼin te jun majx (juneleʼx) (Salmo 91:1, 2, 7-10). In xi tqʼamaʼn kye alkyeqe bʼinchbʼen jaku tzaj kyyabʼ tuʼn ex jaku tzaj kybʼis tuʼn, ex in xi tyekʼun kye alkye tten tuʼn kyanqʼin toj tbʼanel. Jyonkuxa Salmo 73:27, 28 ex Santiago 4:4, 8.
Bʼalo ax ikx tgana jlu
TQANIL KYIʼJ TESTIGOS DE JEHOVÁ
¿Tiquʼn bʼaʼn tuʼn t-xnaqʼtzana tiʼj Tyol Dios?—Video matij tqan
O tzʼonin Tyol Dios kyiʼj nimxix xjal tuʼn kykanet tzaqʼwebʼil nimxix kyoklen kyuʼn. In qo txokine tiʼja tuʼn t-xnaqʼtzana tiʼj Tyol Dios.
