XNAQʼTZBʼIL 7
¿Tiʼ aju tKawbʼil Dios?
1. ¿Tiʼ aju tKawbʼil Dios?
¿Tiquʼn jaku txi qʼamet qa a Jesús jun tbʼanelxix ajkawil? (MARCOS 1:40-42)
Aju tKawbʼil Dios jun Kawbʼil te toj kyaʼj aju chʼixtl tel tiʼn tkyaqil kykawbʼil xjal ex ok kbʼantel tajbʼil (tvoluntad) Dios tuʼn tzalu twitz Txʼotxʼ ax ikx toj kyaʼj. Aju tKawbʼil Dios, aju kʼelel tiʼn tkyaqil nya bʼaʼn, ok ktel mojbʼabʼil kyxol xjal tuʼn twitz tkyaqil Txʼotxʼ. ¡Tbʼanelxix tqanil lu! Jyonkuxa Daniel 2:44; Mateo 6:9, 10, ex 24:14.
Tuʼnju toj tkyaqil kawbʼil il tiʼj tuʼn tten jun nejenel, o txi tqʼoʼn Jehová toklen tKʼwaʼl (tKyʼajol), aju Jesucristo, tuʼn Tkawin toj tKawbʼil. Jyonkuxa Apocalipsis 11:15.
Qʼonka twitza tiʼj video ¿Tiʼ aju Tkawbʼil Dios?
2. ¿Tiquʼn a Jesús jun tbʼanelxix ajkawil?
Aju tKʼwaʼl Dios jun tbʼanelxix kawil te tuʼnju tbʼanel kyukʼil xjal ex kukx in bʼant aju tzʼaqli tuʼn (Mateo 11:28-30). Ax ikx at tipumal (tbʼalor) tuʼn tonin kyiʼj xjal, ex ok kajbʼel tuʼn aj tkawin tibʼaj Txʼotxʼ tzmax toj kyaʼj. Tej otaqxi jaw anqʼin Jesús, jax toj kyaʼj, atz jatumel ayon ttxlaj Dios tzmaxi tej ttzaj qʼoʼn toklen tuʼn tkawin (Hebreos 10:12, 13). Tej tbʼet ambʼil, xi tqʼoʼn Dios toklen Jesús tuʼn tkawin. Jyonkuxa Daniel 7:13, 14.
3. ¿Atpe txqantl xjal che kawil tukʼil Jesús?
At jun kʼloj xjal aju tok kybʼi: «Qe xjal etzan tuʼn Dios [‹aʼyeju xjanqe›, NM]», aʼye jlu ok che kawil tukʼil Jesús toj kyaʼj (Daniel 7:27). Aʼyeju tnejel e jaw tjyoʼn Dios tuʼn kyok te xjan aʼyeju t-apóstol Jesús. Atxixtzen ttzajlen ttzyet tuʼn kyjaw tjyoʼn Jehová qe tbʼanel xinaq, moqa ichan, ex xuʼj tuʼn kyok te xjan, ex kukx kyjaw tjyoʼn toj ambʼil jaʼlo. In cheʼx xjal lu toj kyaʼj aj kykyim, ik tzeʼn te Jesús, ex in xi qʼoʼn jun kyximlal te toj kyaʼj. Jyonkuxa Juan 14:1-3 ex 1 Corintios 15:42-44.
¿Jteʼ xjal che xeʼl toj kyaʼj? Tqʼama Jesús qa «nya ilaʼ» kybʼaj, moqa nya nim kybʼet (Lucas 12:32, ATM). Ok che xeʼl 144.000 xjal tukʼe Jesús tuʼn kykawin tibʼaj Txʼotxʼ. Jyonkuxa Apocalipsis 14:1.
4. ¿Tiʼ bʼaj tej t-xi tzyet tuʼn tkawin Jesús?
Xi tzyet tuʼn tkawin Jesús toj abʼqʼi 1914. * Aju tnejel bʼant tuʼn, etz tlajoʼn Satanás kyukʼe nya bʼaʼn t-anjel toj kyaʼj ex e kutz t-xoʼn twitz Txʼotxʼ. Tzaj nim tqʼoj Satanás tuʼn jlu, ex ok ten bʼinchal nya bʼaʼn twitz tkyaqil Txʼotxʼ (Apocalipsis 12:7-10, 12). Atxix toj ambʼil aju, xiʼni t-xiʼ nya bʼaʼn toj il. At nim qʼoj, kyaqnajnabʼ, yabʼil ex waʼyij, tkyaqil jlu in tzaj tyekʼun qa in japun kywiʼ yol e kyaj qʼamaʼn tiʼjju qa chʼixtl t-xi tzyet tuʼn tkawin tKawbʼil Dios twitz tkyaqil Txʼotxʼ. Jyonkuxa Lucas 21:7, 10, 11, 31.
5. ¿Tiʼ in bʼant tuʼn tKawbʼil Dios jaʼlo, ex tiʼ kbʼantel tuʼn toj ambʼil tzul?
Tuʼnju in xi pakbʼet Tyol Dios twitz tkyaqil Txʼotxʼ, in nok tchmoʼn tKawbʼil Dios «nimxix kyajlal xjal» te tkyaqil tnam. At nimxix (bʼampo) xjal aʼyeju at jun tbʼanel kyanmi in nokx kyqʼon kyibʼ tjaqʼ tkawbʼil Jesús. Ok che kjel anqʼin kykyaqil xjal lu aj tkubʼ tnajsaʼn tKawbʼil Dios tkyaqil nya bʼaʼn. A jlu in tzaj tyekʼun qa qaj tuʼn qanqʼin tjaqʼ tKawbʼil Dios, ilxix tiʼj tuʼn t-xi qbʼiʼn Jesús. Jyonkuxa Apocalipsis 7:9, 14, 16, 17.
Toj mil abʼqʼi, ok kjapunel bʼaj twiʼ aju kubʼ t-ximen Dios tnejel kye xjal tuʼn tKawbʼil. Ok kʼokel Txʼotxʼ te jun tbʼanel najbʼil. Aj tbʼant tkyaqil jlu, ok kxel tqʼoʼn Jesús juntl maj Kawbʼil te tTat (1 Corintios 15:24-26). ¿Taj teya tuʼn t-xi tqʼama aju tbʼanel tqanil lu tiʼj tKawbʼil Dios? Jyonkuxa Salmo 37:10, 11, 29.
^ taqik' 6 Qa taja chʼintl tqanil kyiʼj qeju yol e kyaj qʼamaʼn toj Tyol Dios aʼyeju in che yolin tiʼj abʼqʼi 1914, jyonkuxa toj t-xaq 215 kpol toj 218 toj uʼj ¿Tiʼ in tzaj t-xnaqʼtzaʼnxix Tyol Dios?
