XNAQʼTZBʼIL 1
¿Tiʼ tbʼanel tqanil at qe?
1. ¿Tiʼ tbʼanel tqanil at qe tuʼn Dios?
Taj (tgan) Dios tuʼn kyanqʼin xjal toj tzalajbʼil. Kubʼ tbʼinchen Txʼotxʼ ex tkyaqilju at twitz tuʼnju at tkʼuʼj kyiʼj xjal. Chʼix tpon ambʼil tuʼn tel tiʼn Dios tkyaqilju in tzaj kʼixkʼej tuʼn tuʼntzen kyanqʼin xjal te tkyaqil tnam toj tbʼanel. Jyonkuxa Jeremías 29:11.
Mi aʼlx jun ajkawil o bʼant tuʼn tel tiʼn bʼiybʼel, yabʼil ex kyimen. Naqtzun tuʼnj, at tbʼanel tqanil: chʼix tpon ambʼil tuʼn tkubʼ tnajsaʼn Dios tkyaqil kykawbʼil xjal ex oktzen kbʼel tqʼoʼn tkawbʼil. Ok che tel tmajen Dios toj tbʼanel ex mlay tzaj kyyabʼ. Jyonkuxa Isaías 25:8; 33:24, ex Daniel 2:44.
2. ¿Tiquʼn nimxix kyoklen tbʼanel tqanil lu?
Tuʼn miʼ ttentl kʼixkʼej, ilxix tiʼj tuʼn kykubʼ tnajsaʼn Dios kykyaqil xjal nya bʼaʼn twitz Txʼotxʼ (Sofonías 2:3). ¿Jtoj che kubʼ tnajsaʼn? Kyaj tqʼamaʼn Tyol Dios tiquʼn in tzaj nya bʼaʼn kyiʼj xjal. Aju in nikʼ toj ambʼil jaʼlo (jaʼla) in tzaj tyekʼun qa chʼixtl kykubʼ tnajsaʼn Dios nya bʼaʼn xjal. Jyonkuxa 2 Timoteo 3:1-5.
3. ¿Tiʼ il tiʼj tuʼn tbʼant quʼn?
Il tiʼj tuʼn tel qnikʼ tiʼj Dios aj qxnaqʼtzan tiʼj Tuʼjil Tyol (Biblia). Aju Tuʼjil Tyol Dios ik tten ik tzeʼn jun uʼj in xi t-samaʼn jun tbʼanel tatbʼaj kye tkʼwaʼl. In tzaj tqʼamaʼn qe alkye tten jaku qo anqʼin toj tzalajbʼil jaʼlo ex tiʼ kbʼantel quʼn tuʼn qanqʼin te jun majx (juneleʼx) toj ambʼil tzul. Ax tok (bʼaʼn ax) nya kykyaqil che jawil tzalaj tuʼnju in xnaqʼtzana tiʼj Tyol Dios. Naqtzen tuʼnj, miʼ txi tqʼoʼna ambʼil tuʼn ttzaj bʼaj tkʼuʼja tuʼn jlu, quʼn tbʼanelqexix kʼiwlabʼil che tzajel qʼoʼn. Jyonkuxa Proverbios 29:25 ex Apocalipsis 14:6, 7.
Bʼalo ax ikx tgana jlu
TQANIL KYIʼJ TESTIGOS DE JEHOVÁ
¿Tiquʼn bʼaʼn tuʼn t-xnaqʼtzana tiʼj Tyol Dios?—Video matij tqan
O tzʼonin Tyol Dios kyiʼj nimxix xjal tuʼn kykanet tzaqʼwebʼil nimxix kyoklen kyuʼn. In qo txokine tiʼja tuʼn t-xnaqʼtzana tiʼj Tyol Dios.
