XNAQʼTZBʼIL 8
¿Tiquʼn in tzaj tqʼoʼn Dios ambʼil te nya bʼaʼn ex te yajbʼil?
1. ¿Alkye tten tzaj tzyet nya bʼaʼn?
Toj ambʼil o kyaj tqʼoʼn Dios kye xjal tuʼn kykawin o tzʼel toj qʼanchaʼl qa mlay bʼant tuʼn tel kyiʼn nya bʼaʼn
Tzaj tzyet nya bʼaʼn twitz Txʼotxʼ tej tqʼama Satanás tnejel nya ax tok (nya bʼaʼn ax) yol. Aju anjel lu tbʼaneltaq ex tzʼaqlitaq, naqtzun tuʼnj, «el tpaʼn tibʼ tiʼj ju yol axix tok» (Juan 8:44). Chebʼe pon tkʼuʼj tuʼn tjaw nimsaʼn kyuʼn txqantl, aju oʼkxku Bʼinchal tkyaqil at toklen tiʼj. Tukʼil jun nya ax tok yol kubʼ tiʼj Eva tuʼn, aju tnejel xuʼj, tuʼn tnimen te ex nya te Dios. Ax ikx te Adán ok lepeʼ tiʼj t-xuʼjil tej mitiʼ (tiloʼ) xi tbʼiʼn Dios. Aju bʼant tuʼn Adán tzaj tiʼn yajbʼil ex kamik. Jyonkuxa Génesis 3:1-6, 19.
Tej t-xi tqʼamaʼn Satanás te Eva tuʼn miʼ tokx tbʼiʼn Dios, tzaj tzyet jun qʼoj tuʼn tiʼj Dios. Nyataq taj tuʼn tkubʼ tyekʼun qa a Jehová at toklen tuʼn tkawin, aju Nimxix Toklen. A Satanás «in kawin kyibʼaj kykyaqil xjal twitz txʼotxʼ» tuʼnju o che ok lepeʼ chʼixme kykyaqil xjal tiʼj ex ya mitiʼtl toklen Dios kye. Jyonkuxa Juan 14:30 ex 1 Juan 5:19.
2. ¿Nyapetzele tzʼaqliqetaq tbʼinchbʼen Dios?
Tzʼaqliqe tbʼinchbʼen Jehová. Aʼyeju tnejel xjal ex qe anjel jakutaq japun kyuʼn tkyaqilju in tzaj tqʼamaʼn Dios kye (Deuteronomio 32:4, 5). O tzaj tqʼoʼn Dios tzaqpibʼil qe tuʼn tjaw qjyoʼn aju bʼaʼn moqa aju nya bʼaʼn. Aju tzaqpibʼil lu in tzaj tqʼoʼn ambʼil qe tuʼn t-xi qbʼiʼn Dios tuʼnju kʼujlaʼn quʼn. Jyonkuxa Santiago 1:13-15 ex 1 Juan 5:3.
3. ¿Tiquʼn in tzaj tqʼoʼn Dios ambʼil te yajbʼil?
Nya nim ambʼil o tzaj tqʼoʼn Jehová tuʼn kyqʼojin ajqʼoj tiʼj toklen tuʼn tkawin. ¿Tiquʼn o tzaj tqʼoʼn ambʼil te jlu? Tuʼn tkubʼ yekʼet qa mi aʼlx jun kawil, aju mitiʼ in nonin Jehová tiʼj, jaku tzʼonin kyiʼj xjal (Eclesiastés 7:29; 8:9). Kyoj qeju waqaq mil abʼqʼi ma che ikʼ, ma tzʼelxix toj qʼanchaʼl qa mix aʼl jun nejenel kye xjal jaku tzʼel tiʼn nya bʼaʼn ik tzeʼn bʼiybʼel, qʼoj, yabʼil ex aju nya bʼaʼn in nok bʼinchaʼn kyiʼj xjal. Jyonkuxa Éxodo 9:16 ex Jeremías 10:23.
Naqtzun tuʼnj, qa ma txi qqʼoʼn ambʼil tuʼn tkawin Dios qibʼaj qex kajbʼel jlu (Isaías 48:17, 18). Chʼixtl tpon ambʼil tuʼn tkubʼ tnajsaʼn Jehová kykawbʼil xjal. Oʼkx qe xjal in nokx kyqʼon kyibʼ tjaqʼ tkawbʼil ok che anqʼil twitz Txʼotxʼ (Isaías 11:9). Jyonkuxa Daniel 2:44.
Qʼonka twitza tiʼj video ¿Tiquʼn in tzaj tqʼoʼn Dios ambʼil te yajbʼil?
4. ¿Tiʼ jaku bʼant quʼn tuʼnju kukx at tpasens Dios?
Tqʼama Satanás qa in che ajbʼen xjal te Dios naq tuʼnju nimku (bʼampo) tiʼchaq in xi tqʼoʼn kye. Tuʼnju tpasens Dios, qkyaqil jaku kubʼ qyekʼun tukʼe qbʼinchbʼen qa in yolin Satanás nya ax tok yol ex qa in qo onin tiʼj tkawbʼil Dios ex nya tiʼj kykawbʼil xjal. Jyonkuxa Job 1:8-12 ex Proverbios 27:11.
5. ¿Alkye tten jaku tzʼokx qqʼon qibʼ tjaqʼ tKawbʼil Dios?
Tukʼeju in kubʼ qximin tuʼn tbʼant quʼn, in kubʼ qyekʼun qa qaj moqa nya qaj tuʼn tKawin Dios qibʼaj
Tnejel, ilxix tiʼj tuʼn tel qnikʼ alkye tten taj (tgan) Dios tuʼn qajbʼen te, ex tuʼn t-xi tzyet quʼn tuʼn tkubʼ qbʼinchaʼn aju in tzaj t-xnaqʼtzaʼn axix tok okslabʼil (nimbʼil), aju in jatz tiʼn t-xnaqʼtzbʼil toj Tyol Dios (Juan 4:23). Ax ikx, qa ma qo ok lepeʼ tiʼj techel kyaj tqʼoʼn Jesús tuʼn miʼn tokx qqʼon qibʼ kyxol ajkawil nix kyoj qe qʼoj, ok kbʼel qyekʼun qa in nel qikʼen tkawbʼil Satanás. Jyonkuxa Juan 17:14.
In nok tilil tuʼn Satanás tuʼn tkubʼ kybʼinchaʼn xjal aju tajbʼil kychibʼjil aju in tzaj nya bʼaʼn kyiʼj tuʼn. Aj kyel qikʼen bʼinchbʼen lu, atlo maj jaku che ok ten qamiw ex qe toj qja xmayil qiʼj moqa kukx nya kyaj tuʼn tbʼant jlu quʼn (1 Pedro 4:3, 4). Qa ma bʼant jlu kyuʼn, qo jyon kyiʼj qukʼil aʼyeju kʼujlaʼn Dios kyuʼn ex qbʼinx qe tbʼanel tkawbʼil Dios. Iktzen tten kbʼel qyekʼun qa nya ax tok aju tqʼama Satanás tej tqʼamaʼn qa miʼ aʼl jun xjal jaku tzʼokx tbʼiʼn Dios aj tok weʼ twitz nya bʼaʼn. Jyonkuxa 1 Corintios 6:9, 10 ex 15:33.
Aju tkʼujlabʼil Dios at qiʼj in tzaj tyekʼun qa kʼelel tiʼn yajbʼil ex nya bʼaʼn. Aʼyeju in nok qʼuqeʼ kykʼuʼj qa mas bʼaʼn tuʼn tokx kyqʼon kyibʼ tjaqʼ tkawbʼil Dios ok che anqʼil te jun majx (juneleʼx) twitz Txʼotxʼ. Jyonkuxa Juan 3:16.
