XNAQʼTZBʼIL 5
¿Alkye t-xim Dios at tiʼj Txʼotxʼ?
1. ¿Tiquʼn kubʼ tbʼinchaʼn Dios Txʼotxʼ?
Kubʼ tbʼinchaʼn Jehová Txʼotxʼ tuʼn kyanqʼin xjal twitz. Tej tkubʼ tbʼinchaʼn Dios Adán tukʼe Eva, aʼyeju tnejel xjal e kubʼ mojbʼaʼn, mitiʼ (tiloʼ) e kubʼ tbʼinchaʼn tuʼn kyanqʼin toj kyaʼj ex tuʼn tnoj kyuʼn. Otaqxi che kubʼ tbʼinchaʼn Dios qe anjel tuʼn kyanqʼin toj kyaʼj (Job 38:4, 7). Kubʼ tqʼoʼn Jehová tnejel xjal toj jun tbʼanel najbʼil aju Edén tbʼi (Génesis 2:15-17). Ax ikx xi tqʼoʼn ambʼil te, ex kye kykyaqil tkʼwaʼl, tuʼn miʼn tten bʼajsbʼil kyanqʼibʼil tzalu twitz Txʼotxʼ. Jyonkuxa Salmo 37:29 ex 115:16.
Naqtzun tuʼnj, naq oʼkx jun piẍ Txʼotxʼ jaw jyoʼn tuʼn tok te tbʼanel najbʼil te Edén. Ok che ultaq kykʼwaʼl Adán tukʼe Eva tuʼn tnoj twitz Txʼotxʼ kyuʼn ex chebʼe tuʼn tok Txʼotxʼ kyuʼn te jun tbʼanel najbʼil (Génesis 1:28). Mlayx kubʼ xitin Txʼotxʼ, kukx che najal xjal twitz. Jyonkuxa Salmo 104:5.
Qʼonka twitza tiʼj video ¿Tiquʼn kubʼ tbʼinchaʼn Dios Txʼotxʼ?
2. ¿Tiquʼn nya jun tbʼanel najbʼil Txʼotxʼ jaʼlo?
Tuʼnju mitiʼ e nimen Adán tukʼil Eva te Dios ex i etz lajoʼn toj tbʼanel najbʼil te Edén. Tuʼntzen jlu, kubʼ naj aju Tbʼanel Najbʼil ten tnejel, ex mix aʼl jun xjal o bʼant juntl maj Tbʼanel Najbʼil lu tuʼn. Axpe ikx, in tzaj tqʼamaʼn Tyol Dios qa o kyaj qʼoʼn «txʼotxʼ toj kyqʼobʼjuʼ bʼinchal mya bʼaʼn» (Job 9:24, Xjan Tuʼjil). Jyonkuxa Génesis 3:23, 24.
Qa ikju, ¿mlaype japuntl t-xim Jehová at kye xjal? Ok kjapunel tuʼn, tuʼnju nimxix tipumal (tbʼalor) ex kukx in bʼant aju in kubʼ t-ximin (Isaías 45:18). Toj ambʼil tzul, ok che anqʼil xjal tuʼn Dios ik tzeʼn kubʼ t-ximin tnejel. Jyonkuxa Salmo 37:11, 34.
3. ¿Alkye tten kbʼantel juntl maj Tbʼanel Najbʼil?
Ok kʼokel Txʼotxʼ tuʼn Jesús te jun tbʼanel najbʼil, tuʼnju o txi qʼoʼn toklen tuʼn Tkawin toj tKawbʼil Dios. Ok che onil anjel tiʼj Jesús tuʼn kykubʼ tnajsaʼn kykyaqil qeju in che qʼojin tiʼj Dios toj qʼoj aju Armagedón tbʼi. Oktzen kbʼelex jupuʼn Satanás jun mil abʼqʼi tuʼn Jesús. Aʼyeju in che ajbʼen te Dios ok che kyjel anqʼin aj ttzaj xitbʼil, tuʼnju kbʼel nej Jesús kywitz ex kkolil kyiʼj. Oktzun che anqʼil xjal lu te jumajx (juneleʼx) toj Tbʼanel Najbʼil twitz Txʼotxʼ. Jyonkuxa Apocalipsis 20:1-3 ex 21:3, 4.
4. ¿Jtoj bʼaj yajbʼil?
¿Jtoj tzʼel tiʼn Dios nya bʼaʼn? Kyaj tqʼoʼn Jesús jun «señ» tuʼn ttzaj tyekʼun jtoj tzul ambʼil aju. Tkyaqil aju in bʼaj jaʼlo (jaʼla), aju jaku che naj xjal tuʼn, in tzaj tyekʼun qa chʼix «tjapun bʼaj tqʼijlalil» nya bʼaʼn. Jyonkuxa Mateo 24:3, 7-14, 21, 22.
Aj tkawin Jesús mil abʼqʼi tibʼaj Txʼotxʼ atz toj kyaʼj, ok kbʼel tnajsaʼn tkyaqil yajbʼil (Isaías 9:6, 7; 11:9). Nya oʼkx kʼokel te ajkawil, ax ikx ok kʼokel te tnejel pal tuʼn tkubʼ tnajsaʼn kyil qeju kʼujlaʼn Dios kyuʼn. Iktzun tten, kajbʼel Jesús tuʼn Dios tuʼn tel tiʼn yabʼil, tijel, ex kyimen. Jyonkuxa Isaías 25:8 ex 33:24.
5. ¿Alkyeqe che anqʼil toj Tbʼanel Najbʼil?
Toj Ja te Chmabʼil che okel tojtzqiʼna xjal aʼyeju kʼujlaʼn Dios kyuʼn ex kyaj tuʼn tbʼant tajbʼil Dios kyuʼn
Aʼyeju xjal in xi kybʼiʼn qMan Dios ok che anqʼil toj Tbʼanel Najbʼil (1 Juan 2:17). Xi tqʼamaʼn Jesús kye qeju lepchiqeʼk tiʼj tuʼn kyjyoʼn kyiʼj qeju xjal at jun tbʼanel kyanmi tuʼn t-xi kyxnaqʼtzaʼn kye alkye tten tuʼn kyel bʼaʼn toj twitz Dios. Toj ambʼil jaʼlo, in nonin Jehová kyiʼj nimxix (bʼampo) xjal tuʼn kyanqʼin toj Tbʼanel Najbʼil (Sofonías 2:3). Aʼyeju in nok kychmon kyibʼ kyoj Ja te Chmabʼil kye testigos de Jehová in nel kynikʼ alkye tten tuʼn kyok te tbʼanel chmilbʼaj, te tbʼanel xuʼjilbʼaj, te tbʼanel tatbʼaj, te tbʼanel txubʼaj, te tbʼanel kʼwalbʼaj ex in nel kynikʼ alkye tten jaku tzʼonin tbʼanel tqanil kyiʼj aju tkuʼx toj Tyol Dios. Jyonkuxa Miqueas 4:1-4.
