XNAQʼTZBʼIL 9
¿Tzeʼn jaku qo tzalaj kyukʼe toj qja?
1. ¿Tiquʼn ilxix tiʼj tuʼn kykubʼ mojeʼ kabʼe xjal twitz jun ajkawil?
Aju tbʼanel tqanil atz tzajni tukʼil Jehová, aju Dios in tzalaj, aju taj (tgan) tuʼn qtzalaj kyukʼe toj qja (1 Timoteo 1:11). A kubʼ mojbʼan kye tnejel xjal. Qa ma che kubʼ mojeʼ kabʼe xjal twitz jun ajkawil, in nonin jlu tuʼn kychʼiy kʼwaʼl toj tbʼanel ex in nonin kyiʼj tuʼn kytzalaj toj kyja. Il tiʼj tuʼn tokx kybʼiʼn okslal (nimel) aʼyeju kawbʼil o che kubʼ qʼoʼn tiʼjju tuʼn tokx kytzʼibʼen xjal kymojbʼabʼil kyibʼ. Jyonkuxa Lucas 2:1, 4, 5.
Aju kymojbʼabʼil kyibʼ kabʼe xjal toj twitz Dios il tiʼj tuʼn kukx tten. Taj Jehová tuʼn tok ten xinaq oʼkx tiʼj t-xuʼjil, ax ikx te xuʼj oʼkx tukʼe tchmil (Hebreos 13:4). In nel tikʼun qa ma kubʼ kynajsaʼn kabʼe xjal kymojbʼabʼil kyibʼ (Malaquías 2:16). Naqtzun tuʼnj, in tzaj tqʼoʼn ambʼil tuʼn tel tpan tibʼ jun xjal tiʼj tukʼe ex tuʼn tkubʼ mojeʼ juntl maj qa o tzʼok ten tchmil tiʼj juntl moqa o tzʼok ten t-xuʼjil tukʼil juntl. Jyonkuxa Mateo 19:3-6, 9, NM.
2. ¿Tiʼ kbʼantel kyuʼn qeju o che kubʼ mojeʼ?
Kubʼ tbʼinchaʼn Jehová xinaq, moqa ichan, tuʼn tonin tiʼj xuʼj ax ikx te xuʼj tuʼn tonin tiʼj xinaq aj kykubʼ mojeʼ (Génesis 2:18). A chmilbʼaj wibʼaj toj tja, tuʼntzun aju, il tiʼj tuʼn tkubʼ nej tuʼn tkanet kywa toj tja ex tuʼn t-xi t-xnaqʼtzaʼn Tyol Dios kye. Ax ikx il tiʼj tuʼn tbʼant tiʼxku tuʼn tuʼnju at tkʼuʼj tiʼj t-xuʼjil. Aʼyeju o che kubʼ mojeʼ il tiʼj tuʼn tok kykʼujlan kyibʼ ex tuʼn tkubʼ kyyekʼun qa nim toklen jun toj twitz juntl. Tuʼnju aj il xjalqe, ax ikx il tiʼj tuʼn tok tilil kyuʼn tuʼn tkubʼ kynajsaʼn kyil tuʼntzen kytzalaj. Jyonkuxa Efesios 4:31, 32; 5:22-25, 33, ex 1 Pedro 3:7.
3. ¿Ilpe tiʼj tuʼn tkubʼ kypan kyibʼ kabʼe xjal aj ttzaj nya bʼaʼn kyxol?
Qa at nya bʼaʼn kyxol qeju o che kubʼ mojeʼ, il tiʼj tuʼn tok tilil kyuʼn kykabʼil tuʼn tkubʼ kyyekʼun kykʼujlabʼil aj kyyolin (1 Corintios 13:4, 5). Mitiʼ (tiloʼ) in tzaj tqʼamaʼn Tyol Dios qa aju tuʼn tel kypan kyibʼ qeju o che kubʼ mojeʼ, jun tten jlu tuʼn tbʼaj nya bʼaʼn in tzaj kyxol qeju o che kubʼ mojeʼ. Jyonkuxa 1 Corintios 7:10-13.
4. ¿Tiʼ taj Dios kye kʼwaʼl?
Taj Jehová tuʼn kytzalaj kʼwaʼl. Tuʼntzun aju, in xi tyekʼun kye alkyexix tten tuʼn kytzalaj toj kyqʼayil ex toj kytxinil. Ax ikx taj tuʼn tajbʼen kyuʼn kʼwaʼl aju kynabʼil kytat ex aju o tzikʼ toj kyanqʼibʼil kytat (Colosenses 3:20). Ax ikx, taj Jehová tuʼn kytzalaj kʼwaʼl aj kyajbʼen te ex te tKʼwaʼl. Jyonkuxa Eclesiastés 11:9–12:1; Mateo 19:13-15, ex 21:15, 16.
5. ¿Alkye tten jaku che onin tatbʼaj tuʼn kytzalaj qe kykʼwaʼl?
Il tiʼj tuʼn tok tilil kyuʼn tatbʼaj tuʼn t-xi kyqʼoʼn kywa, kyxbʼalun ex jatumel tuʼn kyanqʼin qe kykʼwaʼl (1 Timoteo 5:8). Naqtzen tuʼnj, nya oʼkx jlu kbʼantel kyuʼn. Ax ikx il tiʼj tuʼn kykubʼ kyxnaqʼtzaʼn tuʼn tok kykʼujlaʼn Dios ex tuʼn tel kykanoʼn tiʼj (Efesios 6:4). Qa in kubʼ kyyekʼun tatbʼaj kykʼujlabʼil tiʼj Dios, a jlu jaku tzʼoninxix kyiʼj kʼwaʼl. Qa aju xnaqʼtzbʼil in xi qʼet kye in jatz toj Tyol Dios jaku tzʼonin kyiʼj tuʼn tten tbʼanel kyximbʼetz. Jyonkuxa Deuteronomio 6:4-7 ex Proverbios 22:6.
Kyaj kʼwaʼl tuʼn t-xi qʼuqbʼet kykʼuʼj ex tuʼn t-xi qʼamet kye qa in qo tzalaj kyiʼj tuʼnju tbʼanel kybʼinchbʼen. Ax ikx at maj il tiʼj tuʼn kyxi kawit ex tuʼn t-xi jiqiset tiʼj kynabʼil, a jlu jaku tzʼonin kyiʼj tuʼn miʼ tkubʼ kybʼinchen junjun tiʼ aju jaku tzaj nya bʼaʼn kyiʼj tuʼn (Proverbios 22:15). Jaku chex kawit kʼwaʼl, naqtzun tuʼnj, chebʼe ex nya tukʼe nim qʼoj. Jyonkuxa Colosenses 3:21.
O tzʼetz nim (bʼampo) uʼj kyuʼn testigos de Jehová kye tatbʼaj ex kye kʼwaʼl. Aju xnaqʼtzbʼil tkuʼx kyoj atz in jatz toj Tyol Dios. Jyonkuxa Salmo 19:7, 11.
Bʼalo ax ikx tgana jlu
JAKU TZALAJA KYUKʼIL TOJ TJAYA
Che jyone onbʼil tukʼe Dios tuʼn kytzalaje toj kymejebʼleʼne
kabʼe xjelbʼitz nya kwest tuʼn tel tnikʼa tiʼj jaku tzʼonin tiʼja tuʼn tel bʼaʼn tmejebʼleʼna.
JAKU TZALAJA KYUKʼIL TOJ TJAYA
¿Tzeʼn jaku kubʼ naj jun nya bʼaʼn kyxol qeju o che kubʼ mojeʼ?
Aju alkye tten che ximale tuʼn kyexe twitz nya bʼaʼn jaku tzʼonin tuʼn tten kymejebʼleʼne kukx ex toj tzalajbʼil, moqa tuʼn tten toj bʼis ex tuʼn tkubʼ naj.
