Ximana tiʼj tiquʼn kʼelex tqʼoʼna tchikʼbʼabʼila. Ximana tiʼjju taja tuʼn tbʼant tuʼna tukʼil tchikʼbʼabʼila: taja tuʼn t-xi tqʼoʼna jun tqanil kye qeju in che bʼin tiʼja, tuʼn tok qeʼ kykʼuʼj tiʼ jun xnaqʼtzbʼil moqa taja tuʼn tonina kyiʼj. Ximana tiʼj jlu aj tbʼaj tbʼinchaʼna ttena. Tzʼelx tnikʼa tiʼj qa che onil xnaqʼtzbʼil nim kyoklen kyiʼj txqantl aj tbʼaj tbʼinchaʼna ttena.

Qʼamanxa alqiʼj in yolina. Toj tkyaqil tchikʼbʼabʼila, kukx naʼnxa alqiʼj in yolina aj t-xi tqʼamaʼna elaʼ maj qe yol nim kyoklen ex aj kyajbʼen junjuntl yol tuʼna.

Chikʼbʼanxa qe xnaqʼtzbʼil nim kyoklen ex toj chʼin yol. Jyoʼnktza qe xnaqʼtzbʼil jaku txi tchikʼbʼaʼna toj ambʼil bʼantni tiʼj ex at kyoklen tukʼil tbʼi xnaqʼtzbʼil. Skʼonktza junjun xnaqʼtzbʼil nim kyoklen ex chikʼbʼanxa klarxix wen. Aj tbʼaj yolina tiʼj jun xnaqʼtzbʼil nim toklen, qʼonxa chʼin ambʼil aj t-xi tzyet tuʼn tyolina tiʼj juntl.