Jyoʼnktza tqanil jaku tzʼok qeʼ qkʼuʼj tiʼj. Jaku yolina tiʼjju in tzaj tqʼamaʼn Tyol Dios ex uʼjinktza toj qa jaku bʼant. Qa ma yolina tiʼj jun tiʼ o tzʼel kynikʼ xjal tiʼj, tiʼj jun tqanil, tiʼj jun tiʼ o bʼaj moqa tiʼj alkyexku juntl tqanil, bʼaʼn tuʼn telxix tnikʼa tiʼj qa ax tok ex qa atzun akʼaj tqanil.

Qʼamanxa axix tok tqanil. Aj t-xi tchikʼbʼaʼna jun versículo, ximana tiʼj chʼintl tqanil, tiʼjju tqanil nim toklen in tzaj tqʼamaʼn Tyol Dios ex tiʼjju in tzaj kyqʼamaʼn uʼj in che etz tuʼn «majen in bʼant taqʼun [...] ex at tnabʼl» (Mt. 24:45). Qa ma kanet junjuntl tqanil tuʼna tuʼn t-xi tchikʼbʼaʼna chʼintl tiʼj jun xnaqʼtzbʼil, ik tzeʼn aj tok tbʼiʼna toj radio, miʼn kubʼ tchʼixpuʼna.

Tzʼonina kyiʼj qeju in che bʼin tiʼja tuʼn tel kynikʼ tiʼj jun xnaqʼtzbʼil. Otoqxi jaw tuʼjina jun taqikʼ Tyol Dios moqa otoqxi txi tqʼamaʼna jun tqanil, qaninxa junjun xjel toj tumel moqa qʼonkuya jun techel tuʼn tonin kyiʼj qeju in che bʼin tiʼja tuʼn kyximen tiʼj axix tok tzaqʼwebʼil.