Aju uʼj saj ttzʼibʼin Kʼloj Xjal Qʼil Twitz Aqʼuntl
«Mawtlo che oke te xnaqʼtzal jaʼlo» (Heb. 5:12). ¡Noqpe ximana tiʼj! In tzaj tqʼoʼn Jehová txokbʼil qiʼj, aju mas tbʼanel aj Xnaqʼtzal twitz tkyaqil Txʼotxʼ, tuʼn t-xi qqʼamaʼn kye txqantl aju ojtzqiʼn quʼn tiʼj. Jun tbʼanelxix oklenj te qe tuʼn t-xi qxnaqʼtzaʼn axix tok tiʼj Jehová, ik tzeʼn toj qja, toj kʼloj okslal ex qa toj pakbʼabʼil, noqtzun tuʼnj nya jun saqchbʼil jlu. Tuʼntzunju, ¿tzeʼn jaku qo ok te tbʼanel aj xnaqʼtzal?
In kanet tzaqʼwebʼil quʼn kyoj yol xi ttzʼibʼin apóstol Pablo te Timoteo: «Schʼinxa tyol Dios kywitz okslal, qʼonxa kynabʼl, ex qʼonxa xnaqʼtzbʼil kye». Yajxitl tqʼama: «Qa ma tbʼinchaya jlu, axa ok kletel kyukʼix qeju in che bʼin tiʼj tyola» (1 Tim. 4:13, 16). Jaku che klet xjal tuʼn tqanil in xi qqʼamaʼn kye. Tuʼntzunju, nim toklen tuʼn tok tilil quʼn tuʼn tbʼant-xix quʼjin ex tuʼn tbʼant-xix qqʼon xnaqʼtzbʼil. Ma kubʼ bʼinchaʼn uʼj lu tuʼn tonin tiʼja tuʼn tbʼant jlu tuʼna. Qqʼonk qwitz tiʼj junjun tiʼ nim toklen tkuʼx toj uʼj lu.
Teyele junjun xnaqʼtzbʼil qʼiʼn jun taqikʼ Tyol Dios tuʼn aju tkuʼx jun nabʼil toj moqa jun techel.
A Jehová aju tbʼanel aj «xnaqʼtzal» (Is. 30:20). Aju uʼj lu kʼonil tiʼja tuʼn tbʼant-xix tuʼjina ex tuʼn tbʼant-xix tqʼona xnaqʼtzbʼil. Noqtzun tuʼnj, bʼaʼn tuʼn ttzaj tnaʼna qa atz tzajni tqanil tukʼil Jehová ex a in tzaj qʼinte kye xjal tuʼn kyok laqʼeʼ ttxlaj (Juan 6:44). Tuʼntzunju, kukx qaninxa xewbʼaj xjan te. Bʼaʼn tuʼn kukx tajbʼen Tyol Dios tuʼna qa jaku bʼant. Qʼamanxa t-ximbʼetz Jehová ex nya aju teya t-ximbʼetz. Bʼaʼn tuʼn tonina kyiʼj qeju in che bʼin tiʼja tuʼn tok kykʼujlaʼnxix Jehová.
O txi tqʼoʼn Dios txokbʼil tiʼja tuʼn t-xi qʼamet aju tqanil mas nim toklen twitz tkyaqil Txʼotxʼ. Qʼuqli qkʼuʼje tiʼj qa kbʼantel jlu tuʼna qa ma tzʼok qeʼ tkʼuʼja tiʼj «tipumal Dios» (1 Ped. 4:11).
Aʼyeju tukʼila in che aqʼunan tuʼn kyqʼon xnaqʼtzbʼil,
Kʼloj Xjal Qʼil Twitz Aqʼuntl kye Testigos de Jehová
