Kye kykyaqil qeju kʼujlaʼn Jehová kyuʼn:

Tqʼama Jesús jlu: «Kʼelel kynikʼe tiʼj ju yol axix tok, ex che tzoqpetele tuʼnju yol axix tok» (Juan 8:32). ¡Tbʼanelxix qe yol lu! Ikju, jaku tzʼel qnikʼ tiʼj axix tok maske, moqa inchq, in qo anqʼin toj «mankbʼil tqʼijlalil», moqa toj bʼajsbʼil tqʼijlal, jatumel at nim nya ax tok (2 Timoteo 3:1). Axpe ikx, in tzajlo qnaʼn aju tzalajbʼil qnaʼ tej tel qnikʼ tiʼj axix tok tkuʼx toj Tyol Dios. ¡Tbʼanelxix tej tel qnikʼ tiʼj axix tok!

Naqtzun tuʼnj, nya oʼkx tuʼn telxix qnikʼ tiʼj axix tok ex nya oʼkx tuʼn kukx t-xi qqʼamaʼn kye xjal. Quʼn ilxix tiʼj tuʼn qanqʼin ik tzeʼn in tzaj tqʼamaʼn axix tok tkuʼx toj Tyol Dios. Tuʼn tbʼant jlu, ilxix tiʼj tuʼn kukx qten toj tkʼujlabʼil Dios. Naqtzen tuʼnj, ¿tiʼ kbʼantel quʼn tuʼn kukx qten toj tkʼujlabʼil Dios? Tzaj tqʼoʼn Jesús tzaqʼwebʼil tiʼj jlu tej chʼixtaq tpon ambʼil tuʼn tkyim, tej tqʼama kye tbʼanel apóstol: «Qa ma che japun qe nmandamyente kyuʼne, kukx ktel nkʼujlalile kyiʼje; ik tzaʼn weye ma che japun qe tmandamyent Nmane wuʼne ex kukx ma ten tkʼujlalil wiʼje» (Juan 15:10).

¿In nel qnikʼ tiʼ bʼant tuʼn Jesús tuʼn kukx tten toj tkʼujlabʼil Dios? E japun tkawbʼil tTat tuʼn. Ax ikx qe ilxix tiʼj tuʼn kyjapun quʼn. Tuʼn kukx qten toj tkʼujlabʼil qMan Dios, ilxix tiʼj tuʼn qok lepeʼ tiʼj axix tok tkuʼx toj Tyol Dios toj tkyaqil ambʼil. Tojx ambʼil tej chʼixtaq tkyim Jesús tqʼama jlu: «Qa ma tzʼel kynikʼe tiʼj jlu, at-xix tzalajbʼil kyeye qa ma kybʼinchaye» (Juan 13:17).

Qajxixe tuʼn tonin uʼj lu kyiʼje tuʼn kukx kyanqʼine ik tzeʼn in tzaj tqʼamaʼn axix tok tkuʼx toj Tyol Dios ex iktzen tten kukx che tele «tuj tkʼujlalil Dios; [...] tuʼn ttzaj tqʼoʼn kychwinqlale te jumajx» (Judas 21).