Yolin apóstol Pablo toj 1 Corintios 6:1-8, tiʼj qʼoj in netz kyxol okslal (nimil). Tnejel, kubʼ tyekʼun qa nya bʼaʼn otaq tzʼel toj twitz tuʼnju at junjun okslal te tnam Corinto «in xiʼ xtisil kywitz qe aj sanjelal mya okslal» (versículo 1). Ax ikx tqʼama tuʼn tkyaj jun qʼoj toj tbʼanel kyuʼn okslal tojx ttnam Dios ex nya tuʼn kyxiʼ kywitz jwes. Qo xnaqʼtzan tiʼj junjun tiquʼnxix tqʼama Pablo tukʼe onbʼil tzaj tqʼoʼn xewbʼaj xjan te tuʼn miʼ kyxiʼ okslal kywitz jwes ex yajxitl qo xnaqʼtzal tiʼj jatumel atle maj mlay tzʼajbʼen aju tqʼama Pablo.

Aj tetz jun qʼoj tiʼj kʼaẍjel kyxol okslal, taj (tgan) Jehová tuʼn tok tilil quʼn tuʼn tkyaj toj tumel ik tzeʼn taj, ex nya ik tzeʼn qaj (Proverbios 14:12). Ik tzeʼn tzaj tqʼamaʼn Jesús, mas bʼaʼn tuʼn tok tilil quʼn tuʼn tkyaj naj nya bʼaʼn toj tbʼanel ex tuʼn miʼ t-xi qqʼoʼn ambʼil tuʼn t-xiʼ toj il (Mateo 5:23-26). Naqtzun tuʼnj, bʼisbʼajilxix tuʼnju at junjun okslal kyaj tuʼn kyqʼojin ex in cheʼx kywitz jwes. Naqtzen tuʼnj, tqʼama Pablo jlu: «Tuʼnju at kyqʼoje kyxolxe», «ax tok at kypaltile tiʼj jlu». ¿Tiquʼn? Tnejelxix tuʼnju jaku tzaj nya bʼaʼn tiʼj tbʼi Dios kyuʼn ex jaku che yolin xjal nya bʼaʼn tiʼj ttnam Dios. Tuʼn miʼn tbʼaj jlu, ilxix tiʼj tuʼn t-xi qbʼiʼn kawbʼil lu: «¿Myapelo mas bʼaʼn tuʼn tikʼx kyuʼne aju mya bʼaʼn in bʼinchanjtz kyiʼje?» (versículo 7).

Ax ikx tqʼama apóstol Pablo qa o che kubʼ tqʼoʼn Dios junjun xinaq, moqa ichan, kyojele Ja te Chmabʼil aʼyeju jaku che onin tuʼn tkyaj jun qʼoj toj tbʼanel. Aʼyeju ansyan lu at kynabʼil tuʼnju in che xnaqʼtzan tiʼj Tyol Dios ex jaku che ok «te jwes kyxol» kyerman tuʼn tkyaj jun nya bʼaʼn «in bʼaj» toj ambʼil jaʼlo (jaʼla) toj tbʼanel (versículos 3-5). Ax ikx tqʼama Jesús oxe tten tzeʼn jaku kyaj jun nya bʼaʼn toj ttxolil, ik tzeʼn siʼmij (stzʼimej) yol moqa sbʼubʼil. Tnejel, aju tuʼn kyyolin qeju in che qʼojin kyjunalx; qa mitiʼ (tiloʼ) xkyaj bʼant tiʼj jlu, jaku kubʼ bʼinchet aju tkabʼ, aju tuʼn kyyolin juntl maj twitz jun moqa kabʼe testiw, qa ax ikx mitiʼx sajbʼen jlu, jakutzen kubʼ bʼinchet aju toxin, aju tuʼn t-xi qʼamet kye ansyan toj Ja te Chmabʼil (Mateo 18:15-17).

 Naqtzen tuʼnj, nya il tiʼj tuʼn kyok ansyan te abogado moqa te qʼol nabʼil tiʼj kʼaẍjel, ex mitiʼ tuʼn tbʼant junjun tiʼ kyuʼn aju jaku kubʼ tyekʼun qa ik qe ik tzeʼn qe jlu. Ax ikx mitiʼ tuʼn t-xi kyqʼamaʼn kye qeju ermano ma tzʼetz kyqʼoj tiʼj kykʼaʼẍ tiʼxix kbʼantel kyuʼn. Quʼn aju kbʼantel kyuʼn, aju tuʼn kyonin kyiʼj qeju ma tzʼetz kyqʼoj tuʼn tkubʼ kybʼinchaʼn aju in tzaj tqʼamaʼn Tyol Dios ex tuʼn tkanet jun tten kyuʼn tuʼn tkyaj qʼoj toj tbʼanel. Qa mitiʼxix in nel kynikʼ ansyan tiʼ kbʼantel kyuʼn, jakulo kubʼ kyximin tuʼn t-xi kyqanin teju ansyan in bʼent kyojele Ja te Chmabʼil moqa tuʼn t-xi kyqanin toj ninja qʼil twitz aqʼuntl kye testigos de Jehová. Naqtzen tuʼnj, at junjun tiʼ in nikʼ atz jatumel atle maj mlay tzʼajbʼen aju tqʼama Pablo. Qo xnaqʼtzan kyiʼj junjun.

At maj bʼaʼn tuʼn t-xiʼ jun okslal qʼol jun tqanil kye ajkawil. Atle maj kbʼantel jlu tuʼn naq tuʼn tjapun aju in tzaj tqanin ley moqa naq tuʼn tkyaj jun tiʼ tuʼn toj ttxolil. Ik tzeʼn qa taj tuʼn tkubʼ tnajsaʼn tmojbʼabʼil tibʼ, qa taj tuʼn ttzaj qʼoʼn toklen tiʼj jun kʼwaʼl, qa taj tuʼn ttzaj qʼoʼn twiʼ kywa kʼwaʼl, qa taj tuʼn ttzaj chjoʼn jun seguro te, qa taj tuʼn tkyaj bʼant tiʼj twitz jun jwes qa at toklen tuʼn ttzaj chjoʼn jun pwaq (tumi) te, moqa taj tuʼn tkyaj bʼant tuʼjil jun tiʼ tuʼn twitz jun abogado. Axpe ikx qa at jun xjal otaq txiʼ qʼol jun tqanil te jun jwes tiʼj jun okslal, jakulo kubʼ t-ximin okslal tuʼn t-xi qʼol juntl tqanil te jwes te kolbʼil tibʼ. *

Qa nya naq tuʼn tqʼojin jun okslal in xiʼ qʼol tqanil kye jwes tiʼj junjun tiʼ in nikʼ ik tzeʼn ma qo yolin tiʼj, mitiʼ in nikʼ tibʼaj kawbʼil tzaj tqʼoʼn Pablo. * Mitiʼ tuʼn tel naj tiʼj qkʼuʼj alkye nimxix toklen qe: aju tuʼn tkubʼ xjanset tbʼi Dios, aju Jehová, ex tuʼn tten tzalajbʼil ex mojbʼabʼil toj ttnam. In nel nikʼ kyiʼj qeju lepchiqeʼk tiʼj Jesús tuʼnju in kubʼ kyyekʼunxix kykʼujlabʼil, aju kʼujlabʼil lu «mya noq oʼkx tiʼjx tok tkʼuʼj» (1 Corintios 13:4, 5; Juan 13:34, 35).