Junjunx tiʼ in tzaj nimxix qbʼis tuʼn ik tzeʼn aj tex lajoʼn jun toj qja moqa jun tbʼanel qamiw toj ttnam Jehová tuʼnju mitiʼ (tiloʼ) sajtz tiʼj tanmi tiʼj til. Naqtzun tuʼnj, aju alkye tten kxel qbʼiʼn aju in tzaj tqʼamaʼn Tyol Dios tiʼj jlu, ok kbʼel tyekʼun qa kʼujlaʼnxix Dios quʼn ex qa qajxix (qganxix) tuʼn tkubʼ qbʼinchaʼn aju in tzaj tqʼamaʼn. * Tuʼntzen jlu, qo xnaqʼtzan tiʼj junjun tiʼ jaku tzikʼ.

¿Tiʼ kbʼantel quʼn aj tex lajoʼn jun okslal? «Qa at jun tok tbʼi erman, ex qa in tbʼinchaʼn aj pajil, ex qa in pon tkʼuʼj tiʼj nimku, ex qa in kʼulun kywitz tilbʼilal, ex qa in yasun, ex qa kʼal qʼeʼn, ex qa eleqʼ, miʼn tzʼok kymojbʼan kyibʼe tukʼil, ex miʼn che waʼne junx tukʼil.» (1 Corintios 5:11.) Ax ikx in tzaj tqʼoʼn Tyol Dios kawbʼil lu: «Qa at jun xjal [...] mintiʼ in kyaj ten tuj t-xnaqʼtzbʼil Crist, [...] miʼn tzʼokx kykʼmoʼne tuj kyjaye ex miʼn txi kyqʼolbʼeʼne; porque alkyeju ma txi qʼolbʼen te, at toklen tiʼj ju tbʼinchbʼen xjal mya bʼaʼn lu» (2 Juan 9-11). Aju uʼj La Atalaya te 15 te noviembre te 1981, toj t-xaq 19, in tzaj tqʼamaʼn jlu: «Oʼkx aj t-xi qʼamet ‹¿chi tok?›, moqa ‹¿jeʼk?›, te jun xjal jakule txi tzyet tuʼn qyolin tukʼe ex axpe ikx jaku tzʼok te qamiw. ¿Qajpe tuʼn t-xi tzyet tuʼn qyolin tukʼe jun xjal o tzʼex lajoʼn?». Iktzun tten, aj tex lajoʼn jun okslal toj ttnam Jehová, ilxix tiʼj tuʼn tel qpan qibʼ tiʼj ex tuʼn miʼ qyolintl tukʼe tiʼjju at toklen tukʼil Dios.

¿Ilxixpe tiʼj tuʼn miʼ qyolentl tukʼeju otaq tzʼex lajoʼn? Ilxix tiʼj tuʼn miʼ qyolintl tukʼe, ex at nim (bʼampo) tiquʼn mitiʼ tuʼn tbʼant jlu quʼn. Tnejel, tuʼnju kʼujlaʼn Dios quʼn ex aju Tuʼjil Tyol. Tuʼnju kʼujlaʼnxix Jehová quʼn qaj tuʼn kukx qbʼin te, axpe ikx qa kwest-xix tuʼn tbʼant quʼn aju in tzaj tqʼamaʼn qe. Ax ikx qaj tuʼn tokx qbʼiʼn tuʼnju ojtzqiʼn quʼn qa tzʼaqlixix te ex qa at tkʼuʼj qiʼj, ex qa in che tzaj tqʼoʼn tkyaqil tkawbʼil tuʼn kyajbʼen qe (Isaías 48:17; 1 Juan 5:3). Tkabʼ, tuʼnju jaku tzaj nya bʼaʼn kyiʼj txqantl tuʼnju aj il mitiʼ sajtz tiʼj tanmi. Tuʼntzunju, qa mitiʼtl sok qmojbʼan qibʼ tukʼe mlay tzaj nya bʼaʼn tiʼj qamiwbʼel tukʼe Dios tuʼn ex mlay tzaj nya bʼaʼn qiʼj  tuʼn tbʼinchbʼen, ex ok qo onel tuʼn kukx tten ttnam Jehová te saq ex tuʼn miʼ kyyolen xjal nya bʼaʼn tiʼj (1 Corintios 5:6, 7). Ex toxen, tuʼnju aj tex lajet aj il lu jaku tzʼonin tiʼj. ¿Tzeʼn jaku tzʼonin tiʼj? Qa kukx ẍex qbʼiʼn tkawbʼil Dios ex qa ma qo onin tuʼn tbʼant aju ma bʼaj kyximin kʼloj ansyan ẍe yolin tukʼe aj il, jakulo tzʼonin jlu tiʼj aj il, aju mitiʼ ma txi tbʼiʼn aju onbʼil saj qʼoʼn te kyuʼn ansyan. Iktzun tten, qa kukx ẍe okx qbʼiʼn tkawbʼil Dios jakule tzʼonin tiʼj tuʼn tajtz tiʼj tanmi ex tuʼn tkubʼ tchʼexpun t-xim. Aj tel tnikʼ qa otaq naj aju tbʼanelxix attaq kyxol kyukʼe qeju kʼujlaʼnqe tuʼn, jakulo tzul «tiʼj tkʼuʼj» qa otaq kubʼ tbʼinchen jun matij il ex jakule tzʼok tilil tuʼn, tuʼn tmeltzʼaj juntl maj tukʼe Jehová (Lucas 15:17).

¿Yejtzen qa jun toj qja aju otaq tzʼex lajoʼn? Jakulo tzʼok qkʼujlabʼil tiʼj Jehová toj malbʼil qa jun toj qja aju sex lajoʼn. Qa ma tzikʼ jlu, ¿tiʼ kbʼantel quʼn tukʼeju otaq tzʼex lajoʼn? Ax tok (bʼaʼn ax) mlay bʼant tuʼn qyolin tzalu tiʼj tkyaqilju jaku tzikʼ, naqtzun tuʼnj, ok qo yolil tiʼj kabʼe tiʼ nim toklen.

At maj atz in nanqʼin aju otaq tzʼex lajoʼn kyukʼe toj tja. Aj tex lajoʼn jun okslal nya tuʼn jlu knajel toklen kyukʼe toj tja, jakux che yolen qe toj tja tukʼe ex jaku che aqʼunan junx tuʼn tbʼant junjun aqʼuntl kyja. Naqtzen tuʼnj, tuʼnju kʼujlaʼn Jehová kyuʼn, mlay che yolen tiʼjju at toklen tukʼe Dios tukʼe aj il tuʼnju ax o kubʼ ximente tuʼn tel tpan tibʼ kyiʼj okslal. Jakule txi kyqʼoʼn ambʼil te tuʼn tten aj kyxnaqʼtzaʼn kyukʼe toj kyja toj ambʼil in xi qʼet te Jehová, naqtzen tuʼnj, mlay yolen. Yejtzen qa tzma kʼwaʼlx aju sex lajoʼn, moqa naʼmx tjapen toj tabʼqʼi, jaku txi kyqʼoʼn tatbʼaj xnaqʼtzbʼil te tiʼj Tyol Dios, tuʼnju atx kyoklen tuʼn t-xi kyqʼoʼn xnaqʼtzbʼil te ex tuʼn t-xi kykawen (Proverbios 6:20-22; 29:17). *

¿Yejtzen qa nyatz in nanqʼin kyukʼe toj tja aju o tzʼex lajoʼn? Qa ikju, aʼyeju okslal kʼujlaʼn Dios kyuʼn mitiʼxix in che yolintl tukʼe toj kyja o tzʼex lajoʼn, oʼkx in che yolen tukʼe qa at jun tiʼ ilxix tiʼj tuʼn tkubʼ kyyolen tiʼj aju at toklen kyukʼe toj kyja. Mitiʼ in che jyon ambʼil tuʼn tkubʼ kychmon kyibʼ tukʼil. Tuʼnju kʼujlaʼn Jehová kyuʼn ex aju ttnam, in nokx kybʼiʼn aʼyeju kawbʼil in che tzaj qʼamaʼn toj Tyol Dios kyiʼj qeju in che ex lajoʼn. Kyaj tuʼn tten toj kyja  toj tbʼanel, ex tukʼeju kbʼantel kyuʼn jakule che onin tiʼj tuʼn tajbʼen kawbʼil otaq tzaj qʼoʼn te (Hebreos 12:11). *