1, 2. ¿Tiʼ kbʼel qxnaqʼtzaʼn, ex tiquʼn?

QA O kubʼ mojeʼ teya, ¿tzeʼn in nela tmejebʼleʼna toj twitza? ¿Jaku tqʼamaya qa in che tzalaje, moqa in che bʼisune? ¿In tnaʼna qa mitiʼxixtl tbʼanel kyxole, moqa kwest tuʼn kyanqʼintle junx? Qa ikju, in tzajle tbʼisa tuʼnju ma chewix kykʼujlabʼile kyxole. Ax ikx, qa jun okslal (nimel) teya, atle maj in tzaj bʼaj tkʼuʼja ex atlo maj in tnaʼna nya bʼaʼn tuʼnju mitiʼ (tiloʼ) in bʼant tuʼn tjaw tnimsaʼna Jehová, aju kʼujlaʼn tuʼna, tukʼe tmojbʼabʼil tibʼa. Naqtzun tuʼnj, ¡miʼn tzaj bʼaj tkʼuʼja! At qʼanbʼil te jlu.

² Bʼaʼn tuʼn ttzaj qnaʼn qa nimku (bʼampo) okslal tzaj nim nya bʼaʼn kyxol, atzen jaʼlo (jaʼla) jun tbʼanel techel qe tuʼnju in che anqʼin toj tbʼanel. Qʼanchaʼl qa kanet jun tumel kyuʼn tuʼn kyten toj tbʼanel. Ax ikx teya jaku kanet tuʼna. Naqtzen tuʼnj, ¿tiʼ kbʼantel tuʼna tuʼn tten tzalajbʼil kyxole?

3, 4. ¿Tiquʼn in nok laqʼeʼ jun tiʼj juntl qa kykabʼel qeju o che kubʼ mojeʼ in nok tilel kyuʼn tuʼn kyxi laqʼeʼ ttxlaj Dios? Qʼonkuya jun techel.

³ Qa kykabʼel qeju o che kubʼ mojeʼ in nok tilel kyuʼn tuʼn kyxi laqʼeʼ ttxlaj Dios, ax ikx in nok laqʼeʼ jun tiʼj juntl. Jun techel: at jun xinaq, moqa ichan, ex jun xuʼj t-xeʼ jun matij witz juchʼ twiʼ. At jun toj jun plaj ex juntl toj juntl plaj, ex nimxix tqan jatumel taʼ jun tiʼj juntl.  Naqtzun tuʼnj, junx in che ok ten bʼetel tuʼn kyjapun twi witz. ¿Tiʼ in bʼaj? Aj kyok ten bʼetel chebʼe in che ok laqʼeʼ ex junx che japunel toj tjuchʼel twi witz. ¿Tzeʼn in nok tqʼuqbʼaʼn qkʼuʼj aju techel lu?

⁴ Aju in nok tilil kyuʼn kabʼe xjal tuʼn kyjapun twi witz in nok te techel aju in nok tilil kyuʼn okslal tuʼn kyajbʼen te Jehová tukʼe tkyaqil kykʼuʼj. Ax tok (bʼaʼn ax) atlo kykʼuʼje tiʼj Jehová ex in nokle tilel kyuʼne tuʼn kyxi laqʼeʼye ttxlaj. Atzen qa nya nqa (qayni) taʼ jun tiʼj juntl, ik tten jlu ik tzeʼn aj tjax bʼet jun toj jun plaj ex juntl toj juntl plaj. ¿Tiʼ kbʼajel qa chʼinaq kyjax bʼet tiʼj witz? Tnejel nya nqa taʼ jun tiʼj juntl, naqtzen tuʼnj, qa ma tzʼok tilil kyuʼn tuʼn kyjax bʼet —toj juntl yol tuʼn kyxi laqʼeʼ ttxlaj  Dios—, chebʼe ex chebʼe kʼokel laqʼeʼ jun tiʼj juntl. Ax tok, tuʼn tok laqʼeʼ jun tiʼj juntl, ilxix tiʼj tuʼn kyxi laqʼeʼ ttxlaj Dios. ¿Tzeʼn jaku bʼant jlu kyuʼn?

5. a) ¿Alkye jun tbʼanel tten tuʼn kyok laqʼeʼ qeju o che kubʼ mojeʼ tiʼj Jehová ex tiʼj kyukʼe? b) ¿Tzeʼn in nela toj twitz Jehová aju kymojbʼabʼil kyibʼ kabʼe xjal?

⁵ Jun tbʼanel tten tuʼn kyjax bʼet qeju o che kubʼ mojeʼ tiʼj witz aju qa ma chex kybʼiʼn qeju tbʼanel tkawbʼil Dios (Salmo 25:4; Isaías 48:17, 18). Qo xnaqʼtzanxix tiʼj jun kyxol qe jlu, aju tqʼama apóstol Pablo: «Nimanxwit ju mejebʼleʼn kyuʼn kykyaqil» (Hebreos 13:4). ¿Tiʼtaq taj (tgan) tuʼn ttzaj tqʼamaʼn kyukʼe yol lu? Tnejel, bʼaʼn tuʼn tok qqʼoʼn qwitz tiʼjju yol «nimanxwit». Aju yol lu toj yol griego, a t-xilen: nim toklen ex tbʼanel. A jlu in tzaj tyekʼun qe tzeʼn in nela toj twitz Jehová aju kymojbʼabʼil kyibʼ kabʼe xjal: nimxix toklen.

6. Aj qxnaqʼtzan kyiʼj txqantl yol ateʼk ttxlaj aju tqʼama Pablo tiʼj mejebʼleʼn, ¿tiʼ in nel qnikʼ tiʼj ex tiquʼn il tiʼj tuʼn tkubʼ ten toj qnabʼil?

⁶ Qa in najbʼena tukʼex t-xuʼjila te Dios, ojtzqiʼn kyuʼne qa nim toklen kymojbʼabʼil kyibʼe ex, axpe ikx xjan, tuʼnju a Jehová kubʼ mojbʼan kye qeju tnejel xjal (kjawil uʼjit Mateo 19:4-6). Naqtzen tuʼnj, aj ttzaj nya bʼaʼn kyxole, nya oʼkx tuʼn tel kynikʼe qa nim toklen kymojbʼabʼil kyibʼe. Atlo juntl tiʼ nimxix toklen jaku tzʼonin kyiʼje tuʼn tok kykʼujlan kyibʼe ex tuʼn kyyoline toj tbʼanel. ¿Alkye? Tuʼn tel qnikʼ tiʼj, qo ximen juntl maj kyiʼj Tyol Pablo. Mitiʼ tqʼama: «Nimsaʼn taʼ mejebʼleʼn»; quʼn tqʼama: «Nimanxwit ju mejebʼleʼn». A jlu in tzaj tyekʼun qa tzaj tqʼoʼn jun kawbʼil, nya oʼkx tzaj tqʼamaʼn. * Il tiʼj tuʼn tkubʼ ten jlu toj qnabʼil tuʼnju in qo tzaj tonin tuʼn tel qnikʼ tiʼjju juntl tiʼ aju jaku  tzʼonin qiʼj tuʼn tten juntl maj tbʼanel qxol tukʼil qukʼe. ¿Tiquʼn in qqʼamaʼn jlu?

7. a) ¿Alkyeqe tkawbʼil Dios in che japun quʼn ex tiquʼn? b) ¿Tiʼ tbʼanel in tzaj qe aj kyokx qbʼiʼn?

⁷ Qo ximen chʼin tiʼj jlu: ¿tzeʼn in che ela txqantl kawbʼil toj twitza aʼyeju ateʼkux toj Tyol Dios, ik tzeʼn tuʼn qpakbʼan moqa tuʼn tok qchmon qibʼ tuʼn tjaw qnimsaʼn Dios? (Mateo 28:19; Hebreos 10:24, 25.) Atle maj kwest in nela toj twitza, naqtzun tuʼnj, in che japen tuʼna. Atlo maj mitiʼ in nok kybʼiʼn xjal Tyol Dios, naqtzen tuʼnj kukx in pakbʼana. Ax ikx atle maj siktni taʼya aj tula toj aqʼuntl, naqtzun tuʼnj in xiʼya kyoj chmabʼil. Tiʼxku in nok weʼya twitz, mitiʼ in kyaj ttzaqpiʼna tuʼn texa pakbʼal ex tuʼn t-xiʼya kyoj chmabʼil. Mix aʼl jun in kubʼ tzyun teya, nixpe Satanás. ¿Tiquʼn? Tuʼnju kʼujlaʼn Jehová tuʼna tukʼe tkyaqil tanmiya, ex a jlu in nonin tiʼja tuʼn kyokx tbʼiʼna tkawbʼil (1 Juan 5:3). ¿Tiʼ tbʼanel in tzaj teya kyuʼn jlu? In tnaʼna tzalajbʼil toj tanmiya tuʼnju ojtzqiʼn tuʼna qa in kubʼ tbʼinchaʼna tajbʼil (tvoluntad) Dios ex in nonin tiʼja (Nehemías 8:10). ¿Tiʼ xnaqʼtzbʼil in tzaj tqʼoʼn jlu?

8, 9. a) ¿Tiʼ kʼonil qiʼj tuʼn tjaw qnimsaʼn qmojbʼabʼil qibʼ ex tiquʼn? b) ¿Alkye kabʼe xnaqʼtzbʼil qo xnaqʼtzal tiʼj?

⁸ Ik tzeʼn in qo xnaqʼtzan tiʼj, aju qkʼujlabʼil tiʼj Dios in nonin qiʼj tuʼn kyokx qbʼiʼn kawbʼil tiʼj pakbʼabʼil ex tiʼj chmabʼil tiʼxku qo ok weʼ twitz. Ax jlu kʼonil qiʼj tuʼn t-xi qbʼiʼn kawbʼil lu: «Nimanxwit ju mejebʼleʼn», tiʼxku qo ok weʼ twitz (Hebreos 13:4; Salmo 18:29; Eclesiastés 5:4). Ik tzeʼn in qo tzaj tkʼiwlaʼn Jehová tuʼnju in nok tilil quʼn tuʼn qex pakbʼal ex tuʼn tok qchmon qibʼ, ax ikx ok qo tzajel tkʼiwlaʼn qa ma tzʼok tilel quʼn tuʼn tkubʼ qyekʼun qa nim toklen qmojbʼabʼil qibʼ toj qwitz (1 Tesalonicenses 1:3; Hebreos 6:10).

⁹ ¿Alkye tten jaku jaw nimset mejebʼleʼn? Tnejel, qa  ma tzʼel qikʼen tkyaqil aju jaku tzaj nya bʼaʼn qxol tuʼn ex tkabʼ, tuʼn tbʼaj qximen tiʼ kbʼantel quʼn tuʼn tten tbʼanel qxol.

10, 11. a) ¿Alkye yol mitiʼ in jaw tnimsen mejebʼleʼn? b) ¿Tiʼ teya kxel tqanin te tukʼila?

¹⁰ O bʼet-xi ambʼil, tqʼama jun xuʼj okslal jlu: «In xi nqanin wipune te Jehová tuʼn tikʼx wuʼne». ¿Tiʼ tuʼn tikʼx tuʼn? Ax in tzaj tzaqʼwente: «In che kux chyon tyol nchmile tiʼj nkʼuʼje. Nya qʼanchaʼl ẍqʼoyen wiʼje, naqtzen tuʼnj, at nim ẍqʼoyen toj wanmiye, tuʼnju kukx in tzaj tqʼamaʼn jlu weye: ‹Jun iqtza› moqa ‹Mitiʼ tajbʼena›». Aju tqʼama xuʼj lu at jun tiʼ in tzaj bʼaj qkʼuʼj tuʼn, ¿alkye? Aju nya bʼaʼn yol in kyqʼamaʼn qeju o che kubʼ mojeʼ kyxolx.

¹¹ ¡Bʼisbʼajilxix qa in che yolin qeju okslal o che kubʼ mojeʼ tiʼj nya bʼaʼn yol kyxolx, aʼyeju yol in tzaj chyon kyuʼn aju kwest tuʼn tqʼanet! Aʼyeju in najbʼen nim maj yol lu kyuʼn mitiʼ in jaw kynimsen kymejebʼleʼn. Yejtzun teya, ¿tzeʼn taʼ tmojbʼabʼil tibʼa? Tuʼn tel tnikʼa tiʼj, mansinku tibʼa ex qaninxa te tukʼila: «¿Tiʼ teya in tnaʼn aj t-xi nqʼamaʼne junjun tiʼchaq teya?». Qa ma tzaj tqʼamaʼn qa nim maj in che kux chyon tyola tiʼj tanmi, il tiʼj tuʼn tok tilil tuʼna tuʼn tkubʼ tchʼexpun tibʼa (Gálatas 5:15; kjawil uʼjit Efesios 4:31).

12. ¿Alkye tten jaku naj toklen aju in xi qqʼoʼn te Dios?

¹² Bʼaʼn tuʼn ttzaj qnaʼn qa jaku naj tbʼanel qxol tukʼe Jehová qa ma txi qqʼamaʼn nya bʼaʼn yol te qukʼe. In tzaj tqʼamaʼn Tyol Dios jlu: «Qa at jun kyxole tuj tnabʼl qa in niman Dios, pero qa mintiʼ in ajtz tjakʼuʼn tiʼj ttziʼ, in kubʼ t-sbʼun tibʼ, ex aju tokslabʼl noqx gan» (Santiago 1:26). Mitiʼ tuʼn tkubʼ qximen qa aju yol in najbʼen  quʼn mitiʼ toklen tukʼeju in qo ajbʼen te Dios. Mitiʼ in tzaj t-xnaqʼtzaʼn Tyol Dios tuʼn tkubʼ qximen qa mitiʼ toklen aju in bʼaj toj qja qa lu qoʼ in qo ajbʼen te Dios. Mitiʼ tuʼn tkubʼ qsbʼun qibʼ, tuʼnju nim te jlu toklen (kjawil uʼjit 1 Pedro 3:7). Jaku bʼant nim tiʼchaq tbʼanel tuʼn jun xjal toj ttnam Jehová, naqtzun tuʼnj, qa ma che ajbʼen nya bʼaʼn yol tuʼn toj tja, mitiʼ in jaw tnimsen tmejebʼleʼn ex mlay txi tkʼamoʼn Dios aju in bʼant tuʼn, toj juntl yol, mitiʼ tajbʼen.

13. ¿Alkye junjuntl tten jaku tzʼok tbʼinchen jun okslal nya bʼaʼn tiʼj tukʼe?

¹³ Ax ikx il tiʼj tuʼn tok kyxqʼuqen kyibʼ qeju o che kubʼ mojeʼ tuʼn miʼ tok kybʼinchen junjun nya bʼan aju nyaxix qʼanchaʼl. Qo xnaqʼtzan kyiʼj kabʼe techel. Jun tatbʼaj in nok tqʼoʼn nim ambʼil aj t-xi yolen jun txubʼaj aju in nok tchmon tibʼ junx tukʼe aju in anqʼin tjunalx kyukʼe tal ex taj txubʼaj lu tuʼn t-xi tqanin consej te. Aju juntl techel, jun ermana at tchmil in pakbʼan nim ambʼil tkyaqil seman tukʼil jun qʼa mitiʼ t-xuʼjil. Aj tbʼant jlu tuʼn tatbʼaj ex tuʼn ermana at tchmil, mitiʼle jun nya bʼaʼn in kubʼ kyximin; naqtzun tuʼnj, ¿tiʼ in kynaʼn kyukʼe? Tqʼama jun xuʼj okslal tiʼj jlu: «In tzaj nbʼise tuʼnju in nok tqʼoʼn nchmile nim ambʼil tuʼn tonin tiʼj jun ermana jatumel in nok qchmon qibʼe. Tuʼn jlu in nnaʼne qa mitiʼxix woklene te».

14. a) Ik tzeʼn in tzaj tqʼamaʼn Génesis 2:24, ¿tiʼ kbʼantel kyuʼn qeju o che kubʼ mojeʼ? b) ¿Alkyeqe xjel il tiʼj tuʼn kyximin qeju o che kubʼ mojeʼ tiʼj?

¹⁴ In nel qnikʼ tiquʼn in tzaj nim tbʼis ermana. Axju jaku txi qqʼamaʼn tiʼjju in kynaʼn qeju o che kubʼ mojeʼ aj tok kyqʼoʼn kywitz tiʼj qa mitiʼ in xi kybʼiʼn kyukʼil aju kawbʼil o tzaj tqʼoʼn Dios kye: «Kyjel tqʼoʼn xinaq tman ex ttxuʼ, kʼokeltzun mojeʼ tukʼil t-xuʼjil» (Génesis 2:24). Mitiʼ in tzaj tyekʼun texto lu qa aju xjal in kubʼ mojeʼ ya mlay tzʼonintl kyiʼj ttat. Quʼn aju taj tuʼn ttzaj tqʼamaʼn aju qa  aj tkubʼ mojeʼ jun xjal, atz kyximeltl tnejel tiʼj tukʼe. Axju kbʼantel tuʼn kyukʼe qe erman: ax tok at-xixle tkʼuʼj kyiʼj, naqtzun tuʼnj, atz kyximil tnejel tiʼj tukʼe. Tuʼntzen jlu, qa ma tzʼok tqʼoʼn nim ambʼil tuʼn tonin kyiʼj, moqa in yolenxix kyukʼe —mas qa jun xuʼj moqa jun xinaq— ok tzul nya bʼaʼn kyxol tukʼe t-xuʼjel moqa tukʼe tchmil. Bʼaʼn tuʼn t-ximana tiʼj jlu: «¿Tuʼnpe jlu in tzaj nya bʼaʼn toj njaye?  ¿In nel npaʼne ambʼil tuʼn ntene tukʼe wukʼile, tuʼn tok nbʼiʼne ex tuʼn tok nkʼujlaʼne?».

15. Ik tzeʼn in tzaj tqʼamaʼn Mateo 5:28, ¿tiquʼn mitiʼ tuʼn tkubʼ kyyekʼun qeju o che kubʼ mojeʼ tukʼe junjun tiʼ qa at kykʼuʼj tiʼj juntl?

¹⁵ Ax ikx qa at jun kyxol qeju o che kubʼ mojeʼ in kubʼ tyekʼun tukʼe junjun tiʼ qa at tkʼuʼj tiʼj juntl ex moqa in yolenxix tukʼe, in xi laqʼeʼ tiʼj nya bʼaʼn. Bʼisbʼajilxix tuʼnju at junjun okslal o kubʼ kybʼinchen jlu ex o ten kykʼujlabʼil tiʼj juntl (Mateo 5:28). Toj nimku maj, tuʼn jlu o kubʼ kybʼinchen il aju mitiʼ in jaw tnimsaʼn kymojbʼabʼil kyibʼ. Qo xnaqʼtzan tiʼ tqʼama apóstol Pablo tiʼj jlu.

16. ¿Alkyetl kawbʼil tzaj tqʼoʼn Pablo kye qeju o che kubʼ mojeʼ?

¹⁶ Tej tbʼaj tqʼamaʼn Pablo qa «nimanxwit ju mejebʼleʼn», tqʼamatl kawbʼil lu: «Tuʼn miʼn tknet jun kyyaẍ, porque jun tzʼil jlu; porque aqeju yaẍil ex qe aj pajil kbʼel kykastiw tuʼn Dios» (Hebreos 13:4). Oʼkx che kbʼel koẍeʼ kabʼe xjal qa o che kubʼ mojeʼ, ik tzeʼn in tzaj kyqʼamaʼn yol aju tzaj tqʼamaʼn Dios: «Tzalajxa tukʼil xuʼj aju mojeʼya tukʼil tuj tkuʼxumala» (Proverbios 5:18).

17. a) ¿Tiquʼn mitiʼ tuʼn tten qxim ik tzeʼn kyximbʼetz xjal tiʼj ajpajil? b) ¿Alkye tten jaku tzʼel qkanoʼn aju techel kyaj tqʼoʼn Job?

¹⁷ Aju ajpajil —aju aj tok ten jun kyxol qeju o che kubʼ mojeʼ tukʼe juntl— jun matij il jlu tuʼnju mitiʼ in che japun qeju tbʼanel tkawbʼil Dios. Tbʼanel in nela bʼinchbʼen lu toj kywitz nimku xjal, naqtzen tuʼnj, aʼyeqe axix tok okslal mitiʼ tuʼn tten qximbʼetz ik tzeʼn kye xjal. In nel qnikʼ qa «aqeju yaẍil ex qe aj pajil kbʼel kykastiw tuʼn Dios» ex nya tuʼn jun xjal (Hebreos 10:31; 12:29). Tuʼntzun jlu, in japun quʼn aju in tzaj tqʼamaʼn Jehová (kjawil uʼjit Romanos 12:9). In nel qkanoʼn tiʼj Job, aju tqʼama: «O kubʼ nqʼoʼne jun nleye ax wiʼje, tuʼn miʼn tpon nkʼuʼje tiʼj jun  qʼapoj» (Job 31:1). Ikju, il tiʼj tuʼn tbʼaj qximen tuʼn miʼ tok qqʼoʼn qwitz tiʼj juntl qa nya a qukʼe. Iktzun tten, mitiʼ in xi qqʼoʼn ambʼil tuʼn tten qajbʼil tuʼn qkubʼ koẍeʼ tukʼe juntl (jyonkuxa chʼintl xnaqʼtzbʼil tok tbʼi «¿Tiʼ in tqʼamaʼn Tyol Dios tiʼj najsabʼil mejebʼleʼn ex tiʼj pabʼil?»).

18. a) ¿Junpe matij il aju ajpajil toj twitz Jehová? b) ¿Tiquʼn chʼixme junx ajpajil tukʼeju aj kynimen xjal twitz juntl dios?

¹⁸ ¿Junpe matij il aju ajpajil toj twitz Jehová? In qo tzaj tonin Ley tzaj tqʼoʼn te Moisés tuʼn tel qnikʼ tiʼj, in tqʼamaʼntaq qa bʼiʼxtaq tuʼn kykubʼ bʼiyoʼn qeju aj Israel in che kubʼ koẍeʼ tukʼe juntl moqa in che ok ten nimel twitz juntl dios (Levítico 20:2, 10). ¿Tiquʼn chʼixme junx qe il lu? Tuʼnju attaq jun yol mitiʼ in japun twiʼ: aj tnimen jun xjal twitz juntl dios mitiʼtaq in japun aju yol otaq kyaj bʼant tiʼj tuʼn tukʼe Jehová, ex aj tok ten jun kyxol qeju o che kubʼ mojeʼ tukʼe juntl, mitiʼtaq in japen kyuʼn aju yol xi kyqʼamaʼn tej kykubʼ mojeʼ. Jun il qe jlu tuʼnju mitiʼtaq in japun aju otaq kyaj bʼant tiʼj (Éxodo 19:5, 6; Deuteronomio 5:9; kjawil uʼjit Malaquías 2:14). Tuʼntzen jlu, in kubʼtaq qʼoʼn kykastiw tuʼn Jehová, aju Dios tzʼaqli ex jaku tzʼok qʼuqeʼ qkʼuʼj tiʼj (Salmo 33:4).

19. ¿Tiʼ kʼonil qiʼj tuʼn tbʼajxix qximen tuʼn miʼ qkubʼ kuẍeʼ tukʼe juntl, ex tiquʼn?

¹⁹ Ax tok mitiʼ in nokx kybʼiʼn okslal aju Ley tzaj qʼoʼn te Moisés, ik tzeʼn qe aj Israel. Naqtzun tuʼnj, il tiʼj tuʼn ttzaj qnaʼn aju in tzajtaq tqʼamaʼn Ley qa iltaq tiʼj tuʼn tkubʼ bʼiyet aju ajpajil. ¿Tiquʼn? Tuʼnju in qo tzaj tonin tuʼn tbʼajxix qximin tuʼn miʼ qkubʼ kuẍeʼ tukʼe juntl. Qqʼonku jun techel. ¿Jaku kubʼ ẍmejeʼya naʼl dios twitz jun tilbʼilal? «Melayx», chileya. ¿Yejtzen qa ma tzaj qʼoʼn nimxix pwaq teya? «Ax ikx melayx», chiloya. In bʼant jlu quʼn tuʼnju aʼyeqe axix tok okslal mitiʼx in nul toj kyximbʼetz tuʼn kynimen twitz juntl dios qa nya a Jehová. Ax ikx mitiʼ tuʼn tul toj qximbʼetz tuʼn qkubʼ kuẍeʼ tukʼe juntl  tuʼnju nya bʼaʼn toj twitz Dios ex toj twitz qukʼil, tiquʼnxku qaj tuʼn tbʼant jlu quʼn (Salmo 51:1, 4; Colosenses 3:5). Nya qaj tuʼn ttzalaj Satanás tiʼj jlu ex nya qaj tuʼn tkubʼ tchʼixwi Jehová nix aju xjan qmojbʼabʼil qibʼ tuʼn jlu.

20. ¿Tiʼ o tzaj kyxol junjun xjal mojleqe? Qʼamantza tukʼe jun techel.

²⁰ Ax tok, tuʼn tchʼiy tbʼanel kyxol qeju o che kubʼ mojeʼ nya oʼkx tuʼn tel kyikʼen aju mitiʼ in jaw tnimsen kymojbʼabʼil kyibʼ. ¿Tiʼ txqantl kbʼantel kyuʼn? Tuʼn t-xi tzaqʼwet xjelbʼitz lu, qmojbʼanku mejebʼleʼn tukʼe jun ja. ¿Alkyeqe tbʼanel tiʼchaq jaku che okx qʼet toj? Aʼyeju tbʼanel yol, aju qa nim toklen jun toj twitz juntl ex junjuntl yekʼbʼil tiʼj kʼujlabʼil. Qa at mojbʼabʼil kyxol qeju o che kubʼ mojeʼ, at nim tbʼanel tiʼchaq tokx toj kyja. Naqtzun tuʼnj, qa mitiʼxixtl kʼujlabʼil kyxol, aʼyeju tbʼanel tiʼchaq junjun tkubʼ naj, ex aj tkubʼ naj tkyaqil tzul nimxix bʼis. Naqtzen tuʼnj, nya taja tuʼn ttzaj jlu. Taja tuʼn tjaw tnimsen tmejebʼleʼna, ikxix tzeʼn in tzaj tqʼamaʼn Dios. Ojtzqiʼn tuʼna qa kyajxix bʼinchaʼn ex qa nim toklen tuʼn kukx tten ex tuʼn miʼ tkubʼ xitj. Tuʼntzen aju, ilxix tiʼj tuʼn tok tilil tuʼna tuʼn tkyaj aju nya bʼaʼn toj tbʼanel. Ex in tzaj tqʼamaʼn Tyol Dios alkye tten tuʼn tbʼant jlu: «Tuʼn nabʼl in jaw bʼinchet jun ja ex tuʼn ximbʼetz in kubʼ qeʼ t-simyentil, tuʼn ojtzqibʼl in bʼaj noj kyuj qe kwart kyuʼn qe tiʼxti wiʼyilxix ex tbʼanilxix che keʼyin» (Proverbios 24:3, 4). Qo xnaqʼtzan tiʼj alkye tten jaku che ajbʼen qeju yol lu kyuʼn qeju o che kubʼ mojeʼ.

21. ¿Tzeʼn jaku chʼiy tbʼanel qxol tukʼe qukʼe? (Ax ikx jyonkuxa aju « ¿Tzeʼn jaku chʼiy tbʼanel qxole?».)

²¹ Kyxol «tbʼanilxix» tiʼchaq in che noj ja kyuʼn, ax ikx at aju axix tok kʼujlabʼil, aju tchiylal Dios ex aju qʼuqbʼil qkʼuʼj (Proverbios 15:16, 17; 1 Pedro 1:7). Aʼye mod lu ex txqantl in nonin tuʼn tchʼiy tbʼanel kyxol qeju o che kubʼ mojeʼ. Naqtzun tuʼnj, ¿o tzʼok tqʼoʼn twitza tiʼjju in tqʼamaʼn  Proverbios 24:4 tiʼj alkye tten tuʼn tokx noj kyoj ja kyuʼn «tbʼanilxix» tiʼchaq? «Tuʼn ojtzqibʼl.» Tuʼntzunju, qa kyaj qeju o che kubʼ mojeʼ tuʼn tkubʼ kychʼexpuʼn kyxim ex tuʼn tchʼiy juntl maj kykʼujlabʼil ilxix tiʼj tuʼn tten kyojtzqibʼil tiʼj Tyol Dios ex tuʼn tajbʼen kyuʼn (Romanos 12:2; Filipenses 1:9). Qa ma che kubʼ ten xnaqʼtzal tiʼjju piẍ Tyol Dios te tkyaqil qʼij moqa tiʼj jun xnaqʼtzbʼil in yolen tiʼj mejebʼleʼn toj uʼj La Atalaya moqa toj uʼj ¡Despertad! ok kʼonil jlu kyiʼj tuʼn tel kynikʼ alkyeqe «tbʼanilxix» tiʼchaq kʼokex kyqʼoʼn toj kyja. Yajxitl che okex kyqʼoʼn jlu «kyuj qe kwart». Toj juntl yol: tuʼnju kʼujlaʼn Jehová kyuʼn ok che ajbʼel kawbʼil kyuʼn aju otaq che xnaqʼtzan tiʼj. Iktzun tten kymeltzʼajel junjun tbʼanel tiʼchaq attaq toj kyja ex tbʼanelxix kʼokel toj ja kyuʼn.

22. Qa ma tzʼok tilil kyuʼn qeju o che kubʼ mojeʼ tuʼn tkubʼ kybʼinchen aju in tzaj qanin kye tuʼn tten tbʼanel kyxol, ¿tiquʼn ok che tzalajelxix?

²² Ax tok, kxel tiʼn nim ambʼil tuʼn kyokx qʼet juntl maj tbʼanel tiʼchaq lu, naqtzen tuʼnj, aʼyejo okslal in nok tilel kyuʼn tuʼn tkubʼ kybʼinchaʼn aju in tzaj qanin kye, ok che tzalajelxix tuʼnju in nokx kybʼiʼn aju kawbʼil in tzaj tqʼamaʼn Tyol Dios tuʼn tkubʼ kyyekʼun qa nim toklen jun toj twitz juntl (Romanos 12:10; Salmo 147:11). Ex aju mas nim toklen, kukx che tel toj tkʼujlabʼil Dios qa ma tzʼok tilel kyuʼn tuʼn tjaw kynimsaʼn kymojbʼabʼil kyibʼ.