Tukʼe onbʼil tzaj tqʼoʼn xewbʼaj xjan te apóstol Pablo, tzaj tchikʼbʼaʼn qa at maj ilxix tiʼj tuʼn tjax kyqʼoʼn ermana jun tiʼ toj kywiʼ aj tbʼant junjun aqʼuntl kyuʼn aju at toklen tukʼe Jehová. ¿Toj alkye ambʼil ilxix tiʼj tuʼn tbʼant jlu kyuʼn ex tiquʼn? Qo xnaqʼtzan kyiʼj tyol Pablo toj 1 Corintios 11:3-16 tuʼn tel qnikʼ kyiʼj junjun kawbʼil jaku che onin kyiʼj qerman xuʼj tuʼn tel kynikʼ toj alkye ambʼil il tiʼj tuʼn tjax kyqʼoʼn jun tiʼ toj kywiʼ tuʼn tjaw kynimsaʼn Dios. Tqʼama Pablo tuʼn qximen tiʼj oxe tiʼ: 1) aʼye aqʼuntl in che bʼant jatumel ilxix tiʼj tuʼn tjax kyqʼoʼn ermana jun tiʼ toj kywiʼ; 2) aju jatumel in kubʼ bʼinchet aqʼuntl lu, ex 3) aju tiquʼn il tiʼj tuʼn tokx kybʼiʼn kawbʼil lu.

Aʼye aqʼuntl. Tqʼama Pablo kabʼe: aj kynaʼn Dios ex aj t-xi kychikʼbʼaʼn aju in tzaj tqʼamaʼn Dios kye (versículo 4, 5). Aju aj qnaʼn Dios, ik tzeʼn ojtzqiʼn quʼn, jun tten jlu tuʼn tjaw qnimsaʼn Jehová; atzentl te tuʼn t-xi qchikʼbʼaʼn aju in tzaj tqʼamaʼn Dios qe atz in yolin tiʼj aj t-xi kyqʼoʼn okslal xnaqʼtzbʼil kye txqantl xjal tiʼj Tyol Dios. ¿Tqʼama Pablo qa ilxix tiʼj tuʼn tjax kyqʼoʼn ermana jun tiʼ toj kywiʼ tkyaqil maj aj kynaʼn Dios ex aj t-xi kyqʼoʼn xnaqʼtzbʼil tiʼj Tyol Dios? Mitiʼ (tiloʼ). Quʼn at toklen jlu tukʼeju tkabʼ tiʼ: aju jatumel in kubʼ bʼinchet aqʼuntl lu.

Aju jatumel. Yolin Pablo tiʼj kabʼe jatumel: toj ja ex toj Ja te Chmabʼil. Kubʼ ttzʼibʼen jlu: «Atzunte xinaq nejenel te xuʼj, [...] qa at jun xuʼj in naʼn Dios ex in xi tchikʼbʼaʼn aju in tmaʼn Dios te ex mintiʼ jun xbʼalun tjax tuj twiʼ, jun chʼixbʼajil jlu tiʼj twiʼ» (versículo 3, 5). Toj ja, o txi tqʼoʼn Jehová toklen chmilbʼaj tuʼn tok te wibʼaj te xuʼj. Tuʼntzen jlu, ¿tiʼ in bʼaj qa ma kubʼ tbʼinchaʼn xuʼj jun aqʼuntl aju  oʼkxku wibʼaj o tzaj tqʼoʼn Jehová toklen tuʼn tbʼant tuʼn? Jaku bʼant tuʼn, naqtzun tuʼnj, ilxix tiʼj tuʼn tkubʼ tyekʼun qa in kubʼ tnimen toklen tchmil, quʼn qa mitiʼ xbʼant tuʼn, ok kbʼel tqʼoʼn tchʼixwi tchmil. Qo xnaqʼtzan kyiʼj junjun techel. Jun ermana at tchmil ja aj t-xi tqʼoʼn xnaqʼtzbʼil te juntl. Tuʼnju in kubʼ tnimen toklen tchmil ilxix tiʼj tuʼn tjax tqʼoʼn jun tiʼ toj twiʼ. Qa o jaw aʼ twiʼ tchmil moqa naʼmx, axju kbʼantel tuʼn; quʼn a wibʼaj toj tja. * ¿Yejtzun qa ma naʼn Dios jun ermana moqa ma txi tqʼoʼn xnaqʼtzbʼil ex at jun tal aju tzma qʼax ex o jaw aʼ twiʼ? Ax tok (bʼaʼn ax) nya a qʼa wibʼaj toj tja, naqtzen tuʼnj, ilxix tiʼj tuʼn tjax tqʼoʼn txubʼaj jun tiʼ toj twiʼ. ¿Tiquʼn? Tuʼnju in kubʼ tnimen kyoklen xinaq, moqa ichan, o tzaj qʼoʼn toj ttnam Jehová aʼyeju o jaw aʼ kywiʼ.

Yolin Pablo tiʼj tkabʼ jatumel, toj ttnam Jehová, tej tkubʼ ttzʼibʼen jlu: «Qa at jun taj tuʼn tqʼojl tuʼn tlaj jlu, bʼaʼn tuʼn tel tnikʼ tiʼj, qeye mintiʼ in qbʼinchaʼne juntl costumr, ikx qe mastl okslal tuj junjun iglesi etzan qe tuʼn Dios» (versículo 16). O che kubʼ tqʼoʼn Jehová xinaq tuʼn t-xi kyiʼn twitz aqʼuntl toj ttnam aʼyeju o jaw aʼ kywiʼ (1 Timoteo 2:11-14; Hebreos 13:17). Oʼkx in tzaj tqʼoʼn Jehová ambʼil kye xinaq tuʼn kyok te ansyan moqa te onil kye ansyan tuʼn kyxqʼuqin kyiʼj T-ẍneʼl, moqa T-rit (Hechos 20:28). Naqtzen tuʼnj, at maj ilxix tiʼj tuʼn tkubʼ tbʼinchaʼn jun ermana junjun aqʼuntl aju oʼkx jun xinaq o jaw aʼ twiʼ ex at tnabʼil in kubʼ bʼinchante jlu. Jun techel, jakulo tzikʼx tqʼoʼn jun ermana chmabʼil tuʼn kyex jun kʼloj erman pakbʼal tuʼnju mix aʼl jun ermano jaku bʼant tuʼn. * Aju chmabʼil lu at toklen tukʼe xnaqʼtzbʼil in netz toj Ja te Chmabʼil ex ilxix tiʼj tuʼn tikʼx tqʼoʼn jun ermano. Tuʼntzun jlu, ilxix tiʼj tuʼn tjax tqʼoʼn ermana jun tiʼ toj twiʼ tuʼn tkubʼ tyekʼun qa in bʼant taqʼun jun xinaq tuʼn. Axju kbʼantel tuʼn qa in xi tqʼoʼn jun xnaqʼtzbʼil bʼantni tiʼj twitz jun ermano.

Naqtzen tuʼnj, nya il tiʼj tuʼn tjax tqʼoʼn ermana jun tiʼ toj twiʼ tkyaqil maj aj tajbʼen te Jehová ik tzeʼn aj t-xi tqʼoʼn tyol kyoj chmabʼil, aj tpakbʼan kyojele ja (inchq, moqa maske, in pakbʼan tukʼe tchmil moqa tukʼil juntl ermano) ex aj tnaʼn Dios moqa aj t-xi tqʼoʼn  xnaqʼtzbʼil kye tal naʼmx tjaw aʼ kywiʼ. ¿Yejtzun qa ma tzʼok weʼ twitz jun tiʼ jatumel mitiʼxix in nel tnikʼ qa kjawix tqʼoʼn jun tiʼ toj twiʼ moqa miʼn? Tnejel, bʼaʼn tuʼn ttzaj tjyoʼn mastl tqanil tiʼj jlu. * Naqtzen tuʼnj, qa kukx in jawje tkʼuʼj, ex qa in tnaʼn qa il tiʼj tuʼn tjax tqʼoʼn jun tiʼ toj twiʼ, bʼaʼn tuʼn tjax tqʼoʼn ik tzeʼn te ermana tkubʼ toj tilbʼilal.

Aju tiquʼn. Toj versículo 10 in tzaj qʼamaʼn kabʼe tiquʼn kjawix tqʼoʼn jun ermana jun tiʼ toj twiʼ: «Il tiʼj tuʼn tjax tqʼoʼn xuʼj jun xbʼalun tuj twiʼ, tuʼn tok te jun techal qa at toklen tchmil [...], tuʼn kylaj qe anjel». Aju tnejel tiquʼn in tzaj qʼamaʼn toj txol yol «tuʼn tok te jun techal qa at toklen tchmil». Ikju, aju jun tiʼ in jax tqʼoʼn jun ermana toj twiʼ jun techel tiʼj qa in nel tnikʼ qa o tzaj tqʼoʼn Jehová kyoklen xinaq o jaw aʼ kywiʼ toj ttnam. Jun tten jlu tuʼn tkubʼ tyekʼun qa kʼujlaʼn Dios tuʼn ex qa kukx in nimen te Dios. ¿Alkye tkabʼ tiquʼn? Tojx versículo ma qo yolin tiʼj in tzaj qʼamaʼn qa «tuʼn kylaj qe anjel». Naqtzun tuʼnj, ¿tiʼ jaku kynaʼ anjel nim kyipumal (kybʼalor) aj tjax tqʼoʼn jun xuʼj jun tiʼ toj twiʼ?

In che keʼyin anjel kyiʼj kykyaqil ajbʼel te Jehová, qa toj kyaʼj ex qa twitz Txʼotxʼ, ex kukx in nok kyqʼoʼn kywitz kyiʼj qa in nokx kyqʼon kyibʼ tjaqʼ tkawbʼil Jehová. Axpe ikx, in nonin kyiʼj aju in nokx kybʼiʼn xjal Dios ex aj il qe. Quʼn ax ikx kye ilxix tiʼj tuʼn tkubʼ kyyekʼun qa in nokx kyqʼon kyibʼ tjaqʼ tkawbʼil Dios, a jlu nya kykyaqil anjel bʼant kyuʼn toj ambʼil ojtxe (Judas 6). Toj ambʼil jaʼlo (jaʼla), tkyaqil maj aj tokx tqʼon tibʼ jun ermana tjaqʼ tkawbʼil jun xinaq o jaw aʼ twiʼ in kubʼ tqʼoʼn jun tbʼanel yekʼbʼil kywitz anjel, axpe ikx qa at mas o tzikʼ twitz ermana tiʼj, qa at mas tojtzqibʼil moqa at mas tnabʼil. Ex qa jun ermana o jaw jyoʼn in kubʼ bʼinchante jlu mas tbʼanelxix in nela toj kywitz. ¿Tiquʼn? Tuʼnju toj ambʼil tzul aju ermana lu kyukʼix txqantl ok che kawil tukʼe Jesús toj kyaʼj, aju kyoklen kxel  qʼoʼn mas nim toklen twitz kyoklen anjel. Ik tzeʼn in qo xnaqʼtzan tiʼj, at jun tbʼanelxix kyoklen ermana. Tukʼe tbʼanel kybʼinchbʼen in kubʼ kyqʼoʼn jun tbʼanelxix yekʼbʼil kywitz nimxix anjel aj tokx kyqʼon kyibʼ tjaqʼ tkawbʼil Dios ex aj tkubʼ kyiʼn kyibʼ.