1, 2. Qʼamantza tukʼe jun techel tiquʼn in tzalaj Jehová qa in nok tilel quʼn tuʼn tkubʼ qbʼinchaʼn aju bʼaʼn.

JUN kʼwaʼl tzma in netz bʼet tukʼe tnan toj jun kʼaybʼil. Naq minabʼen in kyaj weʼ kʼwaʼl ex in tzaj bʼaj tkʼuʼj. ¿Tiʼ ma tzaj tiʼj? Mitiʼ (tiloʼ) naʼn tuʼn tej setz tiʼn jun saqchbʼil (chaqbʼaj). Tajtaq tuʼn t-xi tqʼamaʼn te tnan tuʼn tetz tlaqʼoʼn, naqtzen tuʼnj, ma tzʼel naj tiʼj tkʼuʼj. In tzaj tbʼis kʼwaʼl ex in nok ten oqʼel. In xi tqʼamaʼn tnan te tuʼn miʼ ttzajxix tbʼis ex in meltzʼaj tukʼe toj kʼaybʼil. Tuʼnju in naj tmeltzʼuʼn kʼwaʼl saqchbʼil ex tuʼnju in xi tqanin tuʼn tkubʼ najsaʼn til, ¡in tzalajxix txubʼaj tiʼj tal!

² In che tzalajxix tatbʼaj kyiʼj kykʼwaʼl aj tok kyqʼoʼn kywitz kyiʼj qa in nok tilel kyuʼn tuʼn tkubʼ kybʼinchaʼn aju bʼaʼn. Ax ikx te qTat toj kyaʼj mas in tzalajxix tiʼj jlu, tuʼnju a «Dios axix tok» (Salmo 31:5). Tbʼanelxix in nela toj twitz Jehová qa in nok tilel quʼn tuʼn tkubʼ qbʼinchen aju tzʼaqle toj twitz, tuʼnju at toklen jlu tukʼe qamiwbʼel tukʼil. Quʼn qaj tuʼn ttzalaj qiʼj ex tuʼn kukx qten toj tkʼujlabʼil, qajbʼil tuʼn tkubʼ qbʼinchen «aju bʼaʼn tuj tkyaqil», ik tzeʼn tqʼama apóstol Pablo (Hebreos 13:18). Tnejel qo xnaqʼtzal tiʼj kyaje tiʼ jatumel kwest tuʼn tkubʼ qbʼinchen aju tbʼanel ex yajxitl qo xnaqʼtzal chʼin tiʼj tzeʼn jaku tzʼonin qiʼj qa ma kubʼ qbʼinchaʼn aju bʼaʼn.

3-5. a) ¿Tzeʼn in qo tzaj tonin Tyol Dios tuʼn tel qnikʼ qa jaku kubʼ qsbʼun qibʼ? b) ¿Tiʼ jaku tzʼonin qiʼj tuʼn tel qnikʼ qa atx taj tuʼn tbʼaj qchʼexpun qibʼ?

³ Tnejel, ilxix tiʼj tuʼn miʼ tkubʼ qsbʼun qibʼ. Tuʼnju aj il  xjal qoʼ, lwey naj jaku kubʼ qsbʼun qibʼ. Ik bʼaj kyiʼj okslal (nimel) te Laodicea. Tqʼama Jesús qa otaq kubʼ kysbʼun kyibʼ tuʼnju in kubʼtaq kyximen qa qʼininqetaq, naqtzen tuʼnj, tqʼama jlu kyiʼj: «Mebʼa qeye, moẍ qeye, ex mintiʼ kyxbʼalune» toj twitz Dios (Apocalipsis 3:17). Nya oʼkx bʼisbʼajiltaq tuʼnju nya bʼaʼn ateʼqetaq, quʼn ax ikx jakutaq tzaj nya bʼaʼn kyiʼj, ex aju mas bʼisbʼajilxix aju in kubʼtaq kysbʼun kyibʼ.

⁴ Ax ikx tqʼama Santiago jlu: «Qa at jun kyxole tuj tnabʼl qa in niman Dios, pero qa mintiʼ in ajtz tjakʼuʼn tiʼj ttziʼ, in kubʼ t-sbʼun tibʼ, ex aju tokslabʼl noqx gan» (Santiago 1:26). Qa in qo yasen ex in kubʼ qximen qa in xi tkʼamoʼn Jehová aju in bʼant quʼn, ax ikx in kubʼ qsbʼun qibʼ. Quʼn a jlu mitiʼx tajbʼen toj twitz Dios. ¿Tiʼ kbʼantel quʼn tuʼn miʼ tikʼ jlu qiʼj?

⁵ Tej naʼmxtaq tyolin Santiago tiʼj jlu, yolen kyiʼj tzʼaqle tkawbʼil Dios, aju tkuʼx toj Xjan Uʼj, ex kubʼ tqʼoʼn jun espej te techel ex tqʼama tuʼn tokx qkaʼyin, mo tuʼn tokx qkiʼn, qwitz toj tuʼntzun tel qnikʼ qa il tiʼj tuʼn tbʼaj qbʼinchen chʼintl qten (kjawil uʼjit Santiago 1:23-25). Ik ttenju, in qo tzaj tonin Tyol Dios tuʼn tel qnikʼ qa in kubʼ qbʼinchaʼn aju bʼaʼn ex qa ilxix tiʼj tuʼn tbʼaj qchʼixpuʼn chʼintl qibʼ (Lamentaciones 3:40; Ageo 1:5). Ax ikx ilxix tiʼj tuʼn t-xi qqanin te Jehová tuʼn qbʼaj t-xpichʼen ex tuʼn qtzaj tonin tuʼn tel qnikʼ jatumel ilxix tiʼj tuʼn tkubʼ qchʼexpun qibʼ (Salmo 139:23, 24). At maj at junjun nya bʼaʼn in bʼant quʼn, aju mitiʼ in nok qqʼoʼn qwiʼ tiʼj. Naqtzun tuʼnj, mitiʼ tuʼn tel naj tiʼj qkʼuʼj tzeʼn in nela jlu toj twitz qTat toj kyaʼj. In tzaj tqʼamaʼn Proverbios 3:32, qa aju xjal bʼinchal nya bʼaʼn, moqa in sbʼun, «ikʼun tuʼn Qman [...]; atzun qeju in kybʼinchaʼn tzʼaqlxix, at tmojbʼabʼl tibʼ kyukʼil». Ok qo tzajel tonin Jehová tuʼn tten qxim ik tzeʼn t-xim at qiʼj ex tuʼn tten qgan tuʼn tbʼant tajbʼil (tvoluntad) quʼn. Iktzen tten jaku txi qqʼamaʼn ik tzeʼn tqʼama Pablo: «Qajbʼile tuʼn qbʼinchanteye aju bʼaʼn tuj tkyaqil». Ax tok, kwest tuʼn tel tkyaqil te tzʼaqle toj ambʼil jaʼlo (jaʼla),  naqtzun tuʼnj, ilxix tuʼn tok tilel quʼn tukʼe tkyaqil qanmi tuʼn tbʼant jlu.

6. ¿Tiquʼn ilxix tuʼn miʼ tkubʼ kysbʼun kyibʼ qeju o che kubʼ mojeʼ, ex alkyeqe nya bʼaʼn ilxix tiʼj tuʼn tel kyikʼen?

⁶ Ax ikx, ilxix tiʼj tuʼn tkubʼ qyekʼun kyukʼe toj qja qa in kubʼ qbʼinchen aju bʼaʼn. Aʼyeju o che kubʼ mojeʼ ilxix tiʼj tuʼn miʼ tkubʼ kysbʼun kyibʼ. Ilxix tiʼj tuʼn tel kyikʼen junjun bʼinchbʼen aju jaku tzaj tiʼn xitbʼil kyxol, ik tzeʼn tuʼn tpon kykʼuʼj tiʼj juntl, tuʼn kyyolen toj ewaj tukʼe juntl toj Internet moqa tuʼn tok kyqʼoʼn kywitz tiʼj alkyexku tilbʼilal nya bʼaʼn. Naqtzen tuʼnj, bʼisbʼajilxix tuʼnju at junjun okslal o kubʼ kybʼinchen jlu toj ewaj twitz kyukʼe. Nya bʼaʼn aju in bʼant kyuʼn. Qa o kubʼ mojeʼ teya, miʼ txi tqʼoʼna ambʼil kye qeju bʼinchbʼen aʼyeju jaku tzʼoka te xmeletzʼ kyuʼn. Mas bʼaʼn tuʼn tel tkanoʼna tiʼj kawil David, tej tqʼama: «Mi jun maj o chin tene junx kyukʼil qe xjal nikʼal yol ex mintiʼ o tzʼok njunin wibʼe kyukʼil qeju xmletzʼ qe» (Salmo 26:4).

7, 8. ¿Alkyeqe txʼolbʼabʼil ateʼkux toj Tyol Dios jaku che ajbʼen quʼn tuʼn t-xi qyekʼun kye kʼwaʼl qa nim toklen tuʼn tkubʼ bʼinchet aju bʼaʼn?

⁷ Ilxix tiʼj tuʼn t-xi kyyekʼun tatbʼaj kye kʼwaʼl qa nim toklen tuʼn tkubʼ bʼinchet aju bʼaʼn. Tuʼn tbʼant jlu, il tiʼj tuʼn tajbʼen Tyol Dios kyuʼn. At junjun techel tkuʼx toj tiʼjju mitiʼ tuʼn tbʼant quʼn, ik tzeʼn te Acán tej ttzaj telqʼan junjun tiʼ ex tej tajtaq (tgantoq) tuʼn tkubʼ tewen,  moqa aju txʼolbʼabʼil tiʼj Guehazí tej t-xi tqʼamaʼn nya ax tok yol naq tuʼn ttzaj qʼoʼn aju tajtaq tuʼn tten te, ax ikx, aju txʼolbʼabʼil tiʼj Judas, aju nya oʼkx ok ten elqʼal pwaq (tumi), ax ikx ok ten sbʼul naq tuʼn tok bʼinchen nya bʼaʼn tiʼj Jesús (Josué 6:17-19; 7:11-25; 2 Reyes 5:14-16, 20-27; Mateo 26:14, 15; Juan 12:6).

⁸ Naqtzen tuʼnj, ax ikx ateʼ tbʼanel techel toj Tyol Dios, ik tzeʼn te Jacob tej tok tbʼiʼn qa otaq jatz kanet pwaq toj kykostal tkʼwaʼl; xi tqʼamaʼn kye tuʼn taj kymeltzʼuʼn tuʼnju kubʼ t-ximen qa naqle e kubʼ tzpet (tzʼopet) xjal tej tkux kyqʼoʼn pwaq. Juntl techel, aju te Jefté tukʼex tmeʼl, aju japun tuʼn aju otaq txi ttziyen ttat inchq, moqa maske, kwesttaq tuʼn tjapun jlu tuʼn. Ax ikx aju techel kyaj tqʼoʼn Jesús tej mitiʼ tzaj xobʼ tuʼn t-xi tqʼamaʼn alkyetaq te kye qeju nimxix (bʼampo) xjal otaq tzaj kyqʼoj, iktzun tten kubʼ tyekʼun qa mastaq nim toklen toj twitz tuʼn tjapun twiʼ aju otaq kyaj qʼamaʼn toj Tyol Dios ex aju tuʼn miʼ tok bʼinchen nya bʼaʼn kyiʼj tamiw (Génesis 43:12; Jueces 11:30-40; Juan 18:3-11). Naq junjun yekʼbʼil jlu tiʼj nimxix techel atqeʼkux toj Tyol Dios aju jaku tzʼajbʼen quʼn tuʼn kykubʼ kyxnaqʼtzaʼn qe qkʼwaʼl tuʼn tok kykʼujlaʼn aju bʼaʼn ex tuʼn tel kynikʼ qa nim toklen tuʼn tkubʼ bʼinchet jlu.

9. ¿Tiquʼn ilxix tiʼj tuʼn kyok tatbʼaj te jun tbʼanel yekʼbʼil kywitz kykʼwaʼl, ex tiʼ ilxix tiʼj tuʼn tel kyikʼen?

⁹ Naqtzen tuʼnj, nya oʼkx kyukʼe yol jaku chex xnaqʼtzet kʼwaʼl, ax ikx ilxix tiʼj tuʼn kyok tatbʼaj te jun yekʼbʼil kywitz. Tuʼntzunju xi tqanin apóstol Pablo jlu: «Qatzun aya xnaqʼtzal te juntl, ¿tiquʼn mintiʼ in t-xnaqʼtzan tibʼa? Aya in pakbʼan kye xjal tuʼn miʼn kyelqʼan, ¿yajtzun teya, tiquʼntzun in elqʼaʼna?» (Romanos 2:21). Atqeʼ tatbʼaj in kyqʼamaʼn qa il tiʼj tuʼn tkubʼ bʼinchet aju bʼaʼn, naqtzen tuʼnj, at maj mitiʼ in bʼant jlu kyuʼn, atlo maj in xi kyqʼamaʼn junjun tiʼ aju nya ikxix ttenju moqa in kyaj kyiʼn junjun tiʼ aju mitiʼ kyoklen tiʼj. Ex in kyqʼamaʼn jlu te kolbʼil kyibʼ: «Ojtzqiʼntl kyuʼn qa in  nikʼ kyiqʼen xjal jlu» moqa «Nyaxix jun sbʼubʼil te jlu quʼn mitiʼ in tzaj nya bʼaʼn tiʼj juntl tuʼn». Naq jniʼxku twiʼ aju in netz elqʼaʼn, jun elqʼabʼil jlu; ex naq alqiʼjxku in qo yolen nya ax tok yol, qa nim toklen moqa nya nim toklen, jun nya ax tok yol jlu (kjawil uʼjit Lucas 16:10). * Ax ikx, in nel naj kynikʼ kʼwaʼl qa xmeletzʼ qe kytat, ex mitiʼ in nonin jlu kyiʼj tuʼn kyok te tbʼanel xjal (Efesios 6:4). Atzunte qa ma tzʼok tilel kyuʼn tatbʼaj tuʼn kyok te jun tbʼanel techel kywitz kʼwaʼl, ax tok aj kychʼiy kʼwaʼl kukxle kjawel kynimsaʼn Jehová kyxol qe xjal nya bʼaʼn (Proverbios 22:6).

10. Tuʼn miʼ tok qbʼinchen nya bʼaʼn tiʼj juntl, ¿tiʼ kbʼantel quʼn aj qyolen kyukʼe qerman?

¹⁰ At nim jatumel tuʼn qok te tbʼanel xjal kyukʼe qerman. O qo xnaqʼtzaʼn tiʼj toj xnaqʼtzbʼil 12 qa atoʼ kyxol qerman ilxix tiʼj tuʼn tok qxqʼuqen qibʼ aj qyolen, quʼn jaku txi qqʼamaʼn nya ax tok yol, ex aju mas nya bʼaʼn, aju qa ma qo ok ten siʼmil yol. Qa ma qo ok ten qʼamal junjun tqanil aju nya  ojtzqiʼnxix quʼn qa ik ttenju, jakule txi qqʼamaʼn nya ax tok yol, aju nya qaj tuʼn t-xi qqʼamaʼn. A jlu in tzaj tyekʼun qa mas bʼaʼn tuʼn tkubʼxix qximen naʼmxtaq t-xi qqʼamaʼn (Proverbios 10:19). Axpe ikx qa ax tok aju kxel qqʼamaʼn ilxix tiʼj tuʼn tbʼaj qximen tnejel. ¿Tiquʼn? Tuʼnju jaku qo ok ten yolel tiʼjju mitiʼ qoklen tiʼj moqa aju nya bʼaʼn jaku tzʼela toj twitz juntl (1 Tesalonicenses 4:11). Aj t-xi qqʼamaʼn axix tok nya il tiʼj tuʼn t-xi qqʼamaʼn tukʼe qʼoj (kjawil uʼjit Colosenses 4:6).

11, 12. a) ¿Tzeʼn in xiʼ nya bʼaʼn toj il kyuʼn junjun okslal otaq kubʼ kybʼinchaʼn nimaq il? b) ¿Alkyeqe nya ax tok yol kyiʼj nimaq il in xi t-sputen Satanás, ex tiʼ kbʼantel quʼn tuʼn miʼ qkubʼ tuʼn? c) ¿Alkye tten jaku txi qqʼamaʼn axix tok te ttnam Jehová?

¹¹ Nimxix toklen tuʼn t-xi qqʼamaʼn axix tok kye ansyan, aʼyeju in che xqʼuqen qiʼj. Qa at jun xkubʼ tewen nimaq il —ik tzeʼn qa ma txi tqʼamaʼn nya ax tok aj ttzaj qanen te qa otaq kubʼ tbʼinchaʼn il—, ok kxeʼl nya bʼaʼn tuʼn toj il. Axpe ikx, jaku tzʼok tqʼon tibʼ te jun ajbʼel te Jehová ex in kubʼ tbʼinchen il (Salmo 12:2). Juntl nya bʼaʼn aju qa naq oʼkx chʼin xi qʼamet kye ansyan tiʼj axix tok, ex qa ma kubʼ ewet aju nim toklen (Hechos 5:1-11). Kykyaqil qeju in bʼant jlu kyuʼn in che kubʼ sbʼun tuʼn Satanás (jyonkuxa aju « Aʼyeju nya ax tok tyol Satanás kyiʼj nimaq il»).

¹² Ax ikx ilxix tiʼj tuʼn t-xi qqʼamaʼn axix tok te ttnam Jehová aj tkux qnojsaʼn jun uʼj moqa aj t-xi qqʼoʼn jun tqanil. ¿Alkye tten jaku bʼant jlu quʼn? Jun techel, ik tzeʼn qa ma kux qtzʼibʼen aju jteʼxix or xqo pakbʼan moqa ma kux qtzʼibʼen tzeʼnxix taʼ qximlal —ex junjuntl tqanil qiʼjx— kyoj qeju uʼj in che tzaj qʼoʼn qe tuʼn tten junjun qoklen (kjawil uʼjit Proverbios 6:16-19).

13. ¿Tiʼ kbʼantel quʼn tuʼn miʼ tkubʼ qsbʼuʼn jun qerman aju at qoklen tukʼe tiʼj jun kʼaẍjel moqa tiʼj jun aqʼuntl?

¹³ Ax ikx mitiʼ tuʼn tkubʼ qsbʼuʼn jun qerman aju at qoklen tukʼe tiʼj jun kʼaẍjel moqa tiʼj jun aqʼuntl. Ax tok, mitiʼ tuʼn qyolen tiʼj jlu toj Ja te Chmabʼil nix toj pakbʼabʼil. Qa ma txi qqʼoʼn taqʼen jun qerman, ilxix tuʼn t-xi qqʼoʼn twi tkʼuʼj aju  otaq kyaj bʼant tiʼj quʼn ex toj ambʼil bʼantni tiʼj ex tuʼn t-xi qqʼoʼn te aju junjuntl chojbʼil in tzaj tqʼamaʼn ley (1 Timoteo 5:18; Santiago 5:1-4). Qatzen aqoʼ in qo aqʼunan tukʼe jun qerman, ilxix tiʼj tuʼn tbʼant tkyaqil qaqʼen (2 Tesalonicenses 3:10). Mitiʼ tuʼn qayon tuʼn tten mas tkʼuʼj qerman qiʼj kywitz txqantl aqʼunal ex tuʼn ttzaj tqʼoʼn mas ambʼil qe moqa junjuntl tiʼ naq tuʼnju qerman qibʼ (Efesios 6:5-8).

14. ¿Tiʼ kbʼantel quʼn qa ma txi qkʼayen moqa ma tzaj qlaqʼoʼn jun tiʼ tukʼe juntl qerman ex tiquʼn?

¹⁴ ¿Yejtzun qa ma tzaj jun qchʼex moqa ma kyaj bʼant qyol tiʼj jun qkʼaʼẍ? In tzaj tqʼamaʼn Tyol Dios qe alkyexix tuʼn tbʼant quʼn: qa mas bʼaʼn tuʼn tkubʼ qtzʼibʼen tkyaqil. Ik tzeʼn bʼant tuʼn Jeremías tej ttzaj tlaqʼoʼn jun piẍ txʼotxʼ, kubʼ tbʼinchen jun tuʼjil kywitz qe testiw ex bʼant kabʼe uʼj tuʼn ex xitzen tkʼuʼnxix (Jeremías 32:9-12; ax ikx jyonkuxa Génesis 23:16-20). Aj tbʼant tuʼjil jun tiʼ in xi kʼayet moqa in tzaj laqʼet, aj tkubʼ bʼinchet kywitz qe testiw, ex aj tkux sqitet qbʼi toj mitiʼ in tzaj tyekʼun jlu qa mitiʼ in nok qʼuqeʼ qkʼuʼj kyiʼj qerman, quʼn tbʼanel tuʼn tbʼant jlu quʼn tuʼn miʼn ttzaj xitbʼil qxol ex tuʼn miʼ tkubʼ qsbʼun qibʼ. Qa ma kubʼ qximen tuʼn tkyaj bʼant tiʼj jun qyol tukʼe juntl qerman, ilxix tiʼj tuʼn ttzaj qnaʼn qa mitiʼ tuʼn t-xi qqʼoʼn ambʼil tuʼn ttzaj xitbʼil qxol naq tuʼn junjun kʼaẍjel (1 Corintios 6:1-8). *

15. ¿Tzeʼn in nela toj twitz Jehová aju in bʼaj kysbʼun kyibʼ xjal toj kykʼaʼẍ, ex tiʼ qe kbʼantel quʼn aqoʼ okslal?

¹⁵ Ax ikx ilxix tiʼj tuʼn tkubʼ qbʼinchaʼn aju tbʼanel in nela toj kywitz txqantl xjal. Ik tzeʼn tqʼama Pablo: «Qajbʼile tuʼn qbʼinchanteye aju bʼaʼn tuj tkyaqil» (Hebreos 13:18). Nimxix toklen toj twitz Bʼinchel qe tuʼn tkyajxix bʼant tiʼj jun qyol aju at toklen tukʼe kʼaẍjel tukʼe alkyexku. Tuʼn tel qnikʼ qa nimxix toklen jlu, naqpe oʼkx toj uʼj te Proverbios in tzaj  qʼamaʼn nim maj aju malbʼil in najbʼen te sbʼubʼil (Proverbios 11:1; 20:10, 23). In che ajbʼentaq malbʼil toj ambʼil ojtxe tuʼn ttzaj laqʼet ex tuʼn t-xi kʼayet jun tiʼ, ik tzeʼn tuʼn tbʼaj malet talil qʼan pwaq ex saq pwaq tuʼn tchjet jun tiʼ. Nimqetaq kʼayel in che kubʼtaq kysbʼuʼn xjal aj kyajbʼen kabʼe wiq malbʼil ex kabʼe wiq balans kyuʼn te sbʼubʼil. * Naqtzen tuʼnj, in nel tikʼen Jehová aju sbʼubʼil lu. Qa qaj tuʼn kukx qten toj tkʼujlabʼil, mitiʼx tuʼn kykubʼ qsbʼuʼn qe xjal tukʼe alkyexku wiq sbʼubʼil.

16, 17. ¿Tiʼ in bʼant kyuʼn xjal tuʼn kykubʼ kysbʼuʼn txqantl, ex tiʼ o bʼaj kyximen axix tok okslal tuʼn tbʼant kyuʼn?

¹⁶ Tuʼnju a Satanás in kawin kyibʼaj xjal at nim xjal in che sbʼun kyiʼj txqantl, kyjuʼtzun, ax ikx at maj in pon kykʼuʼj okslal tuʼn kyok ten sbʼul. Aj t-xi kyqanin xjal tuʼn ttzaj qʼoʼn kyaqʼun in xi kyqʼamaʼn qa at nim kyojtzqibʼil ex qa jaku bʼant nim aqʼuntl kyuʼn —moqa mitiʼ in tzaj kychʼixwe aj kyok ten sbʼul— naq tuʼn ttzaj qʼoʼn kyaqʼun. Ax ikx mitiʼ in xi kyqʼamaʼn axix tok aj kykux kynojsaʼn uʼj tiʼj chojbʼil, tiʼj onbʼil otaq kyaj bʼant kyyol tiʼj, tiʼj uʼj aj kyxiʼ toj juntl tnam ex junjuntl. At junjuntl in che ok ten sbʼul aj kyok toj malbʼil ex aj ttzaj qanin junjun aqʼuntl kye toj tja xnaqʼtzbʼil, at maj in kutz kyiʼn junjun xnaqʼtzbʼil toj Internet ex in xi kyqʼamaʼn qa kyuʼn xbʼant. Atpe maj in xi kyqʼoʼn pwaq kye qeju at kyoklen. Tkyaqil jlu in bʼant kyuʼn xjal tuʼnju «nneʼl kyikʼun aju bʼaʼn», «oʼkx tok kykʼuʼj kyiʼjx, ex oʼkx tok kykʼuʼj tiʼj pwaq» (2 Timoteo 3:1-5).

¹⁷ Atle maj kwest tuʼn tel qikʼen alkyexku sbʼubʼil. Jakulo kubʼ qximen qa oʼkx qeju in che sbʼun in ten tkyaqil kye, aʼyetzen tmajen Dios kwest in kanet aju at tajbʼen kye tuʼnju in kubʼ kybʼinchen aju tbʼanel «tuj tkyaqil» (Salmo 73:1-8). Naqtzun tuʼnj, ilxix tiʼj tuʼn ttzaj qnaʼn jlu: aju in bʼant quʼn  tbʼanelxix. ¿Tiquʼn? Tuʼn tel qnikʼ tiʼj qo xnaqʼtzan tiʼj alkye tten jaku tzʼonin qiʼj aju qa ma kubʼ qbʼinchen bʼaʼn toj tkyaqil.

18. ¿Tiquʼn nimxix toklen tuʼn tok ojtzqiʼn qwitz qa mitiʼ in che kubʼ qsbʼuʼn txqantl?

¹⁸ Tbʼanelxix qa ojtzqiʼn qwitz kyuʼn xjal qa tbʼanel xjal qoʼ ex qa in japun quʼn aju in xi qqʼamaʼn (jyonkuxa aju « ¿In xipe nqʼamaʼne aju axix tok?»). Qkyaqil jaku bʼant jlu quʼn. Mitiʼ toklen jlu tukʼeju jaku bʼant quʼn, tukʼe qqʼinumabʼil, tukʼe qilbʼilal moqa tukʼe qoklen kyxol xjal. Naqtzen tuʼnj, qa ojtzqiʼn qwitz tuʼnju tbʼanel qbʼinchbʼen, jun tbʼanel qʼinumabʼil jlu (Miqueas 7:2). At junjun xjal in che ok ten xmayel qiʼj tuʼnju mitiʼ in che kubʼ qsbʼuʼn txqantl, naqtzun tuʼnj, ax ikx at xjal tbʼanel in nela jlu toj kywitz ex jaku tzʼok qʼuqeʼ kykʼuʼj qiʼj. Axpe ikx atle maj jaku tzaj qʼoʼn qaqʼen tuʼn jlu. ¿Alkye tten in bʼaj jlu? Toj nimku maj kukx in tzaj qʼoʼn kyaqʼun testigos de Jehová aj tel iqʼen kyaqʼun qeju xjal bʼaʼn che sbʼun, moqa in xi qʼoʼn juntl kyaqʼun jatumel ilxix tiʼj jun xjal mibʼan sbʼun.

19. ¿Alkye tten in nonin tiʼj qnabʼil ex tiʼj qamiwbʼel tukʼe Jehová aju qa in kubʼ qbʼinchen aju bʼaʼn?

¹⁹ At maj mitiʼ in nikʼ aju ma qo yolen tiʼj, naqtzen tuʼnj, at txqantl aʼyeju nimxix kyoklen ex in japen kywiʼ. Tnejel, in qo tzalaj tuʼnju in qnaʼn qa in kubʼ qbʼinchaʼn aju tbʼanel, ik tzeʼn tqʼama Pablo: «In qbʼinchaʼne bʼaʼn ik tzaʼnx in tmaʼn qanmiye» (Hebreos 13:18). Ex tkabʼ, in qo tzalaj tuʼnju ojtzqiʼn quʼn qa kukx atoʼ toj tkʼujlabʼil qTat toj kyaʼj, aju nimxix toklen toj twitz aju qa in che bʼinchen tmajen aju bʼaʼn toj tkyaqil (kjawil uʼjit Salmo 15:1, 2; Proverbios 22:1). Tbʼanelxix jlu, tuʼnju mitiʼx juntl tiʼ jaku kanen tiʼj. Atzun jaʼlo qo xnaqʼtzan tiʼj juntl tiʼ aju at toklen tukʼe jlu: aju t-ximbʼetz Jehová tiʼj aqʼuntl.