1, 2. ¿Alkyeqe in che jaw tzalaj aj tjaw aʼ kywiʼ txqantl?

QA O bʼet-xi ambʼil in najbʼena te Jehová, nimxilo maj o tzʼok tbʼiʼna chikʼbʼabʼil in netz qʼoʼn kye qeju in jaw aʼ kywiʼ. Jteʼxku chikʼbʼabʼil o tzʼok qbʼiʼn, kukx in qo tzalajxix aj tok qqʼoʼn qwitz kyiʼj qeju qʼuqleqeʼ twitz kyoj tnejel txol qʼuqbʼil toj nimaq chmabʼil ex aj kyjaw weʼ tuʼn t-xi kytzaqʼweʼn aju tzul qanen kye tuʼn tjaw aʼ kywiʼ. Ex aj kyjatz toj aʼ, in qo paqʼchan toj qqʼabʼ tuʼnju in qo tzalaj, axpe ikx at maj in qo jaw oqʼ tuʼn tzalajbʼil. ¡Nimxix in qo tzalaj tuʼnju in nok qqʼoʼn qwitz tiʼj juntl kʼloj xjal in nokx kyqʼon kyibʼ tjaqʼ tkawbʼil Jehová!

² Oʼkx junjun maj in nok qqʼoʼn qwitz tiʼj jlu toj jun abʼqʼi, atzun kye anjel in nok kyqʼoʼn kywitz nimku (bʼampo) maj tiʼj jlu. ¿Jaku bʼant t-ximit quʼn aju tzalajbʼil in kynaʼn «qeju ateʼ tuj kyaʼj» aj tok kyqʼoʼn kywitz tiʼj nimku mil xjal in che ok te ajbʼel te Dios toj tkyaqil seman twitz tkyaqil Txʼotxʼ? (Lucas 15:7, 10.) Ax tok, nimxixle in che tzalaj aj tok kyqʼoʼn kywitz tiʼj ttnam Jehová xiʼni tchʼiy tzalu twitz Txʼotxʼ (Ageo 2:7).

3. ¿Tiquʼn «in tzanun» Satanás «ik tzaʼn jun bʼalun», ex tiʼ taj tuʼn tbʼant tuʼn?

³ Naqtzun tuʼnj, nya kykyaqil anjel in che jaw tzalaj aj tel kyikʼun nimku xjal aju nya bʼaʼn ex aj tjaw aʼ kywiʼ. In che qʼojinxix taqʼunal Tajaw il. In che qʼojin tuʼnju ax Satanás qʼamante qa mix aʼl jun xjal jaku tzʼajbʼen te Jehová tuʼnju  kʼujlaʼnxix tuʼn ex qa mix aʼl jun jaku tzʼajbʼen te aj tok weʼ twitz nimku nya bʼaʼn (kjawil uʼjit Job 2:4, 5). Tuʼntzen jlu, aj t-xi tqʼamaʼn jun xjal te Jehová qa taj (tgan) tuʼn tajbʼen te, in kubʼ tyekʼun qa in yolen Satanás nya ax tok yol, a jlu ik tten ik tzeʼnku, in nok tzʼajen ttziʼ Satanás. Ex tuʼnju in nok tzʼajen nimku maj ttziʼ Satanás, tkyaqil seman, tuʼntzen jlu, «in tzanun ik tzaʼn jun bʼalun, in jyon tiʼj alkye jun tuʼn t-xi tchyoʼn» (1 Pedro 5:8). Tuʼntzunju, in nok tilel tuʼn, tuʼn chebʼe tnaj qamiwbʼel tukʼe Jehová moqa bʼiʼx tuʼn tnaj (Salmo 7:1, 2; 2 Timoteo 3:12).

4, 5. a) ¿Alkyeqe kabʼe tiʼchaq mitiʼ in xi tqʼoʼn Jehová ambʼil te Satanás tuʼn tbʼant tuʼn? b) ¿Tiʼ in tzaj tqʼamaʼn Tyol Dios kye okslal?

⁴ Qa «in tzanun» Satanás «ik tzaʼn jun bʼalun», mitiʼ (tiloʼ) tuʼn qtzaj xobʼ tuʼn. ¿Tiquʼn? Tuʼnju mitiʼ in xi tqʼoʼn Jehová ambʼil te Satanás tuʼn tbʼant kabʼe tiʼchaq tuʼn. ¿Alkyeqe? Tnejel,  aju qa mlayx che kubʼ tnajsaʼn kykyaqil qe tmajen Dios. Axpe ikx ojtzqiʼnlo jlu tuʼn Satanás, quʼn kyaj tqʼama Jehová qa «nimxix kyajlal» axix tok (bʼan ax) okslal ok che kyjel anqʼin «tuj nimxix yajbʼil», ex quʼn aju in tzaj tqʼamaʼn Jehová, kukx in japun twiʼ (Apocalipsis 7:9, 14).

⁵ Tkabʼ, mlayx bʼant tuʼn t-xi tchyoʼn Satanás nijun xjal aju kukx in nok laqʼeʼ ttxlaj Jehová. In nel qnikʼ tiʼj jlu tuʼnju xi tqʼamaʼn Azarías, aju t-sanjel Dios, te ajkawil Asá: «Ate Qman at kyukʼile qa kukx ma che nimane te» (2 Crónicas 15:2; kjawil uʼjit 1 Corintios 10:13). In yolin Tyol Dios kyiʼj nimku xjal aʼyeju mitiʼ e kubʼ tzʼaq tej tok lipen Satanás kyiʼj (Hebreos 11:4-40). Ik tzeʼn qe xjal lu, qa kukx xqo ok laqʼeʼ ttxlaj Dios, nya oʼkx qo kbʼel weʼ twitz ajqʼoj lu aju in tzanun wen, quʼn ax ikx ok kbʼel quʼn. Ikju, in tzaj tqʼamaʼn Tyol Dios jlu qe: «Che weʼxixe twitz tajaw il, ex kʼeleltzun oq kywitze» (Santiago 4:7).

6. ¿Alkye tten in kubʼ jun okslal tuʼn Satanás?

⁶ Ik tzeʼn in qo xnaqʼtzan tiʼj, mlayx kambʼan Tajaw il tiʼj ttnam Dios. Naqtzen tuʼnj, jaku che kubʼ junjun tmajen Dios tuʼn aʼyeju mitiʼ in nok kyxqʼuqin kyibʼ. ¿Alkye tten? Chebʼe ex chebʼe in nel tpaʼn jun okslal tiʼj Jehová tuʼn t-xi tchyoʼn. Tuʼn tbʼant jlu tuʼn, in qʼojinxix kyiʼj okslal, in qʼojin qiʼj qjunalx, ex in che ajbʼen nim sbʼubʼil tuʼn. Qo xnaqʼtzan kyiʼj qe jlu.

7. ¿Tiquʼn mas in qʼojinxix Satanás tiʼj ttnam Dios toj ambʼil jaʼlo?

⁷ In qʼojinxix kyiʼj okslal. Tqʼama apóstol Juan jlu: «Kykyaqil xjal twitz txʼotxʼ ateʼ tjaqʼ tipumal tajaw il» (1 Juan 5:19). Aʼye yol lu in tzaj kyyekʼun kye axix tok okslal tuʼn tok kyxqʼuqin kyibʼ. Tuʼnju ya ateʼkxtl xjal tjaqʼ tkawbʼil Satanás —aʼyeju nya nqa (qayni) ateʼ ttxlaj Dios—, mas in qʼojinxix tiʼj ttnam Jehová tuʼn tkubʼ tuʼn, aju kukx o tzaqpaj toj tqʼabʼ (Miqueas 4:1; Juan 15:19; Apocalipsis 12:12, 17). Ex tuʼnju naq chʼinxtl ambʼil atx te, mas in qʼojinxix, kyjuʼtzun, mas  in nokxix tilil tuʼn. Toj ambʼil jaʼlo (jaʼla) chʼix qok weʼ twitz bʼajsbʼil tqʼoj, aju mas nya bʼaʼn ex aju jaku kubʼ tnajsaʼn tkyaqil.

8. ¿Tiʼ in tzaj tyekʼun qe aju yol ajbʼen tuʼn Pablo toj yol griego tiʼjju «in qo qʼojin» kyukʼil nya bʼaʼn anjel?

⁸ In qʼojin qiʼj qjunalx. Xi ttzʼibʼen apóstol Pablo jlu kye okslal: «In qo qʼojin, [...] kyukʼil qe juʼẍ mya bʼaʼn qe nim kyajlal ateʼ twitz kyaʼj» (Efesios 6:12). ¿Tiʼ tajtaq tuʼn ttzaj tqʼamaʼn kyukʼil qeju yol «in qo qʼojin»? Aju yol ajbʼen toj griego tiʼj «in qo qʼojin», atz in yolin tiʼj aj kyok ten kabʼe xjal bʼiyel tukʼe kyqʼabʼ. Iktzen tten, tzajxix tyekʼun Pablo qa teyele junjun qe in qʼojin kyukʼil qe taqʼunal Tajaw il. Qa in qo anqʼin toj jun tnam jatumel in kubʼ kyximin xjal qa atqeʼ nya bʼaʼn anjel moqa jatumel in kubʼ kyximin qa mitiʼqe, mitiʼ tuʼn tel naj tiʼj qkʼuʼj qa tej t-xi qqʼamaʼn te Jehová tuʼn qajbʼen te ik tten jlu ik tzeʼnku tzaj tzyet tuʼn qbʼiyen tukʼe juntl tukʼe qqʼabʼ. A jlu in tzaj tyekʼun qa atxix tej qjatz toj aʼ in nok jun qʼoj quʼn kyukʼe nya bʼaʼn anjel atz jatumel kukx qo qʼojel. Tuʼn jlu in nel qnikʼ tiʼj tiquʼn xi tqʼamaʼn Pablo oxe maj kye okslal te Éfeso tuʼn kukx tok kyxqʼuqin kyibʼ (Efesios 6:11, 13, 14).

9. a) ¿Tiquʼn in che ajbʼen nimku «sbʼubʼl» tuʼn Satanás ex qe taqʼunal? b) ¿Tiquʼn taj Tajaw il tuʼn tten nya bʼaʼn qximbʼetz, ex tiʼ jaku bʼant quʼn tuʼn miʼn qkubʼ tuʼn? (Jyonkuxa aju « Miʼn txi qqʼoʼn ambʼil tuʼn qkubʼ t-sbʼuʼn satanás».) c) ¿Alkye sbʼubʼil qo xnaqʼtzal tiʼj?

⁹ In che ajbʼen nim sbʼubʼil tuʼn. Xi tqʼamaʼn Pablo kye okslal tuʼn miʼn t-xi kyqʼoʼn ambʼil tuʼn kykubʼ kyuʼn qeju «sbʼubʼl» in che ajbʼen tuʼn Satanás (Efesios 6:11). Toj yol griego, aju yol ajbʼen tuʼn Pablo tiʼj yol «sbʼubʼl», in yolin tiʼj nimku sbʼubʼil. A jlu in tzaj tyekʼun qa in najbʼen nimku wiq sbʼubʼil tuʼn Tajaw il ex qe taqʼunal tuʼn kykubʼ kysbʼuʼn xjal. Ex at tiquʼn in bʼant jlu kyuʼn. O tzʼok kyqʼoʼn kywitz kyiʼj junjun okslal qa mitiʼ in che kubʼ tuʼn jun sbʼubʼil, naqtzun tuʼnj, in che kubʼ tuʼn juntl. Tuʼntzun jlu, in nokxix kyqʼoʼn kywitz tiʼjju in bʼant quʼn. Kyaj tuʼn tel kynikʼ jatumel nyaxix bʼaʼn atoʼ twitz Dios tuʼn qel kypaʼn tiʼj. Naqtzen tuʼnj, jaku  tzʼel qnikʼ kyiʼj sbʼubʼil in che ajbʼen tuʼn Satanás tuʼnju in tzaj tqʼamaʼn Tyol Dios qe alkyeqe jlu (2 Corintios 2:11). Toj uʼj lu o qo xnaqʼtzan tiʼj junjun sbʼubʼil ik tzeʼn qʼinumabʼil, qe nya bʼaʼn amiw ex yaẍbʼil (kyʼaʼjil). Atzun jaʼlo qo xnaqʼtzan tiʼj juntl: aju at toklen tukʼeju in bʼant kyuʼn chman (ajyoʼẍ).

10. a) ¿Tiʼchaq at toklen tukʼeju in bʼant kyuʼn chman? b) ¿Tiʼ t-xim Jehová at tiʼjju in bʼant kyuʼn chman ex tiʼ teya t-xim at tiʼj jlu?

¹⁰ Aju in bʼant kyuʼn chman at toklen tukʼeju in bʼant tqʼamet kyuʼn xjal tiʼ tzul, tukʼeju bʼaʼn che kʼaʼn xjal, tukʼeju in che yolin xjal kyukʼe kyimni ex junjuntl bʼinchbʼen aju at toklen kyukʼe taqʼunal Tajaw il. Aju xjal in bʼant jlu tuʼn o kubʼ tzʼaq toj kyqʼabʼ taqʼunal Tajaw il, tuʼnju in yolin kyukʼe nya bʼaʼn anjel. Ik tzeʼn o tzʼel qnikʼ tiʼj, tkyaqil jlu «ikʼun tuʼn Qman» Jehová (Deuteronomio 18:10-12; Apocalipsis 21:8). Tuʼnju in tzaj tqʼamaʼn qTat toj kyaʼj jlu: «Kyikʼun ele aju mya bʼaʼn», tuʼntzen jlu, mlayx kubʼ qximin tuʼn qyolin kyukʼe nya bʼaʼn anjel (Romanos 12:9). Qa ma qo yolin kyukʼe nya bʼaʼn anjel, kʼokel qkʼixbʼisaʼn tanmi Dios.

11. ¿Tiʼ in bʼant tuʼn Satanás qa ma kubʼ qbʼinchen aju in bʼant kyuʼn chman? Qʼamantza tukʼe jun techel.

¹¹ Ax tok, aju in kubʼ kybʼinchaʼn chman jun nimaq il jlu toj twitz Jehová. Tuʼntzunju, in nok tilil tuʼn Satanás tuʼn qkubʼ tzʼaq toj il lu. Tkyaqil maj aj tkubʼ tzʼaq jun tmajen Dios tuʼn Satanás toj kybʼinchbʼen chman, in jaw tnimsaʼn tibʼ tuʼnju otaq kambʼan. ¿Alkye tten? Qo ximin tiʼj techel lu: qa ma txi tqʼoʼn jun soldad ambʼil tuʼn tkubʼ tiʼj kyuʼn qe ajqʼoj ex qa ma tzikʼx kyukʼe, aju nejenel kye ajqʼoj ok kjawil tzalajxix; axpe ikx, jakulo kubʼ t-ximen nejenel kye ajqʼoj tuʼn tok ten xmayil tiʼj nejenel kye soldad ex tuʼn t-xi tyekʼun aju soldad otaq tzikʼx kyukʼe ik tzeʼn jun trofeo. Ax ikx qa ma kubʼ t-ximen jun okslal tuʼn tkubʼ tbʼinchen aju in bʼant kyuʼn chman, ojtzqiʼn tuʼn qa kjel ttzaqpiʼn Jehová, ex kʼokex tqʼonxix tibʼ  tjaqʼ tkawbʼil Satanás. ¡Jakule jaw tzalajxix Satanás aj ttzaj tyekʼun aju otaq kambʼet tuʼn toj qʼoj! ¿Qajpetzulo tuʼn ttzalaj quʼn? Nya qaj, tuʼnju nya qaj tuʼn qok te ajqʼoj tiʼj Jehová.

12. ¿Tiʼ in najbʼen tuʼn Satanás tuʼn tkubʼ tchʼexpuʼn qxim tiʼj kyaqʼun chman?

¹² Qa ikʼun kyaqʼun chman quʼn mlay qo kubʼ tzʼaq toj jlu. Ojtzqiʼn jlu tuʼn Satanás, ex tuʼntzen aju, taj tuʼn tkubʼ tchʼexpuʼn qximbʼetz. ¿Alkye tten in bʼant jlu tuʼn? In nel tzpet qnabʼil tuʼn, tuʼn tok qqʼoʼn «te bʼaʼn aju mya bʼaʼn» ex tuʼn tok qqʼoʼn «te mya bʼaʼn aju bʼaʼn» (Isaías 5:20). Tuʼn tbʼant jlu tuʼn, in najbʼen nimku maj jun sbʼubʼil tuʼn aju kukx o che kubʼ tzʼaq junjun tuʼn: in kux tawaʼn toj qanmi qa nya ax tok aju o tzʼel qnikʼ tiʼj.

13. Qʼamantza junjun techel alkye tten in kux tawaʼn Satanás toj qanmi qa nya ax tok aju o tzʼel qnikʼ tiʼj.

¹³ Qo xnaqʼtzan tiʼj junjun techel tiʼj alkye tten in najbʼen jlu tuʼn Satanás. Toj Edén, xi tqanin Satanás jlu te Eva: «¿Maj o tzaj tmaʼn Dios kyeye tuʼn miʼn t-xi kyloʼne twitz tkyaqil tzeʼ kyxol awal lu?». Tej tbʼet ambʼil, okx Satanás kyxol anjel aʼyeju otaq tzʼok kychmon kyibʼ toj kyaʼj ex tqʼama jlu tiʼj Job, aju kukxtaq in najbʼen te Dios: «Bʼaqa noq kukx in ajbʼen teya». Tej tikʼ nimkutl syent abʼqʼi, tej tzmataq in xi tzyet tuʼn tpakbʼan Jesucristo tzalu twitz Txʼotxʼ xi tqʼamaʼn jlu te: «Qa Tkʼwaʼl Diosa, qʼmanxa tuʼn kyok abʼj lu te wabʼj». Naqpe ximana tiʼj jlu, tej tqʼama qe yol lu in xmayintaq kyiʼj qeju yol e tzaj tqʼamaʼn Jehová tej otaq tzikʼ junlo waqaq seman: «Atzun Nkʼwaʼle jlu kʼujlaʼnxix wuʼne, in chin tzalaje tiʼj» (Génesis 3:1; Job 1:9; Mateo 3:17; 4:3).

14. a) ¿Tzeʼn o kux tawaʼn Satanás toj kyanmi junjun okslal qa at junjun tiʼjju in bʼant kyuʼn chman bʼaʼn taʼ? b) ¿Tiʼ kbʼel qxnaqʼtzaʼn jaʼlo?

¹⁴ Toj ambʼil jaʼlo, ik tzeʼn toj ambʼil ojtxe, kukx in najbʼen sbʼubʼil lu tuʼn Tajaw il. Jun tten in najbʼen jlu tuʼn, aju aj tkux tawaʼn toj qanmi qa at junjun tiʼjju in bʼant kyuʼn  chman bʼaʼn taʼ. Ex, bʼisbʼajilxix tuʼnju o tzʼokx tqʼoʼn Satanás jlu toj kywiʼ junjun okslal aj tkubʼ kyximen: «¿Tkyaqilpe aju in bʼant kyuʼn chman nya bʼaʼn?» (2 Corintios 11:3). Naqtzun tuʼnj, ¿tzeʼn jaku qo onin kyiʼj tuʼn tkubʼ kychʼexpuʼn kyxim? ¿Ex tiʼ jaku tzʼonin qiʼj tuʼn miʼ qkubʼ tuʼn sbʼubʼil lu? Tuʼn kytzaqʼwet xjel (pregunta) lu, qo xnaqʼtzan tiʼj kabʼe jatumel chebʼe o tzʼokx tqʼoʼn Satanás aju in bʼant kyuʼn chman: toj saqchbʼil ex aj ttzaj yabʼil.

15. a) ¿Tzeʼn in nela aju in bʼant kyuʼn chman toj kywitz qe xjal te Europa ex Norteamérica? b) ¿Alkye tten o ten kyximbʼetz junjun okslal ik tzeʼn kyximbʼetz xjal tiʼjju in bʼant kyuʼn chman?

¹⁵ Aj tikʼ jun qʼij ex juntl qʼij, mas bʼaʼn in nela toj kywitz xjal aju in bʼant kyuʼn chman ex txqantl bʼinchbʼen aju at toklen tukʼe Tajaw il ex qe taqʼunal, atzxix in bʼaj jlu toj Europa ex Norteamérica. In che etz nimxix película, uʼj, saqchbʼil toj computadora ex yekʼbʼil toj televisión aʼyeju in che yolin tiʼj qa tbʼanel qe bʼinchbʼen at toklen kyukʼe taqʼunal Tajaw il ex qa mlay tzaj nya bʼaʼn qiʼj kyuʼn. Axpe ikx, at uʼj ex película in che yolenxix tiʼjju in bʼant kyuʼn chman ex tbʼanel in nela toj kywitz nimku xjal. Ax tok, aʼyeqe taqʼunal Tajaw il ma bʼant kyuʼn tuʼn tkubʼ kyximin xjal qa aju in bʼant kyuʼn chman mlay tzaj nya bʼaʼn qiʼj tuʼn. ¿Ope ten kyximbʼetz junjun okslal (nimel) ik tzeʼn jlu? Oje. ¿Alkye tten? Jun techel tiʼjju in bʼaj, jun okslal ok tqʼoʼn twitz tiʼj jun película aju nojne tukʼe kybʼinchbʼen chman, tqʼama jlu: «Ax tok ok nqʼoʼn nwitze tiʼj película, naqtzun tuʼnj, mitiʼ in kubʼ qbʼinchen aju in bʼant kyuʼn chman aj tok qqʼoʼn qwitz tiʼj jun película». ¿Tiquʼn nya tbʼanel xim lu?

16. ¿Tiquʼn jaku tzaj nya bʼaʼn qiʼj qa ma tzʼok qqʼoʼn qwitz tiʼjju in bʼant kyuʼn chman?

¹⁶ Ax tok, aj tok qqʼoʼn qwitz tiʼjju in bʼant kyuʼn chman nya ikxix tten jlu ik tzeʼn aj tkubʼ qbʼinchaʼn; naqtzen tuʼnj, a jlu mitiʼ in tzaj tyekʼun qa mlay tzaj jun nya bʼaʼn qiʼj  tuʼn. ¿Tiquʼn? Tnejel, ilxix tiʼj tuʼn tel qnikʼ tiʼj jun tiʼ in tzaj tqʼamaʼn Tyol Dios: aju qa mitiʼ ojtzqiʼn tuʼn Satanás ex qe taqʼunal aju in kubʼ qximen. * Naqtzun tuʼnj, tuʼnju kyaj tuʼn tel kynikʼ tiʼjju in kubʼ qximin ex tuʼn qel kypaʼn tiʼj Dios, in che xqʼuqin —ik tzeʼn o qo xnaqʼtzan tiʼj— tiʼj tkyaqilju in bʼant quʼn ax ikx tiʼjju alqiʼj in qo saqchan. Tuʼntzen jlu, qa at jun in kubʼ tyekʼun tukʼe tbʼinchbʼen qa tgan qe película ex qe uʼj aʼyeju in che yolin tiʼjju in bʼant kyuʼn chman, kyiʼj qe xjal bʼaʼn che kʼaʼn ex kyiʼj xjal o che okx taqʼunal Tajaw il toj kyanmi ex junjuntl tiʼ, in xi t-samaʼn jun tqanil kye qe nya bʼaʼn anjel. Ax tok, in xi tyekʼun kye alkye tten jaku kubʼ tzʼaq kyuʼn. Ex a jlu jaku tzʼajbʼen kyuʼn tuʼn kyqʼojen «tukʼe kyqʼabʼ» tiʼj ex tuʼn tkubʼ tzʼaq kyuʼn twitz txʼotxʼ. Axpe ikx, at junjun kyxol qeju in nok kyqʼoʼn kywitz kyiʼj jlu o ten kygan tiʼjju in bʼant kyuʼn chman ex o che ok ten bʼinchal te (kjawil uʼjit Gálatas 6:7).

17. ¿Alkye tten jaku tzʼajbʼen tbʼis jun yabʼ tuʼn Satanás?

¹⁷ Nya oʼkx in najbʼen tuʼn Satanás aju qaj tuʼn tok qqʼoʼn qwitz tiʼj junjun tiʼchaq, quʼn ax ikx in najbʼen tuʼn aju qajbʼil tuʼn qqʼanet. Jun techel, jun okslal yabʼ jakule tzaj bʼaj tkʼuʼj tuʼnju mitiʼ jun qʼanbʼil in nonin tiʼj tuʼn tqʼanet (Marcos 5:25, 26). ¿Tzeʼn jaku tzʼajbʼen tbʼis okslal tuʼn Satanás ex kyuʼn nya bʼaʼn anjel? Jakulo tzʼajbʼen bʼis kyuʼn tuʼn ttzaj bʼaj tkʼuʼj yabʼ, ex tuʼn jlu mlay txi tbʼiʼn kawbʼil in tzaj tqʼamaʼn Tyol Dios ex jaku tzʼok tkʼamoʼn qʼanbʼil moqa jun tten aju at toklen kyukʼe «qeju onil kye bʼinchal il», moqa tukʼeju in bʼant kyuʼn chman (Isaías 1:13). Qa ma kubʼ tzʼaq toj sbʼubʼil lu ok knajel tamiwbʼel tukʼe Dios. ¿Alkye tten?

18. ¿Alkye qʼanbʼil ex tten in najbʼen kyuʼn qʼanel aju ilxix tiʼj tuʼn tel kyikʼen okslal, ex tiquʼn?

 ¹⁸ Aʼyeju aj Israel in kubʼtaq kybʼinchaʼn «mya bʼaʼn», * xi tqʼamaʼn Jehová jlu kye: «Ok tjaw kyqʼoʼn kyqʼabʼe twitz kyaʼj tuʼn kynaʼne Dios, mlay che tzaj nbʼiʼne, porque nojni kyiʼj kyqʼabʼe tuʼn chikʼ» (Isaías 1:15). Ax tok nya qaj tuʼn qok ik tzeʼn qe aj Israel. Mlay kubʼ qbʼinchen aju nya bʼaʼn in nela toj twitz Jehová qa qaj tuʼn qtzaj tonen ex tuʼn qtzaj tbʼiʼn ex mas qa otaq ttzaj qyabʼ (Salmo 41:3). Tuʼntzunju, ¿tiʼ kbʼantel quʼn qa ma qbʼi qa at toklen jun qʼanbʼil moqa jun tten in najbʼen kyuʼn qʼanel tukʼeju in bʼant kyuʼn chman? Ilxix tiʼj tuʼn tel qikʼen (Mateo 6:13). * Iktzun tten mlayx txi qqʼoʼn ambʼil tuʼn tnaj qamiwbʼel tukʼil Jehová (jyonkuxa aju « ¿At toklen jlu kyukʼe chman?»).

19. a) ¿Alkye tten o che kubʼ t-sbʼuʼn Satanás junjun xjal? b) ¿Alkyeqe txʼolbʼabʼil ilxix tiʼj tuʼn tel kyikʼen axix tok okslal?

¹⁹ Chʼixme kyoj kykyaqil tnam te Europa ex Norteamérica in kubʼ kyximin qa mlay tzaj nya bʼaʼn kyiʼj tuʼn Satanás,  atzun toj junjuntl plaj twitz Txʼotxʼ nya ik kyximju. At nim xjal in kubʼ kyximin qa at mas tipumal (tbʼalor) Satanás twitzju tipun at. Kyjuʼtzun in che anqʼin, in che waʼn, in che aqʼunan ex in che jtan tukʼe tchiylal kyiʼj tuʼnju in kubʼ kyximin qa at nim kyipumal taqʼunal Tajaw il. Naqtzen tuʼnj, ax ikx tbʼanel in nela toj kywitz tuʼn tok kybʼiʼn ex tuʼn t-xi kytxʼolbʼaʼn jun ex juntl txʼolbʼabʼil tiʼjju in bʼant kyuʼn qe nya bʼaʼn anjel. Yejqetzun tmajen axix tok Dios, ¿bʼaʼnpetzele tuʼn tok kybʼiʼn qeju txʼolbʼabʼil lu moqa tuʼn kukx t-xi kyqʼamaʼn kye txqantl? Nya bʼaʼn, ex at kabʼe tiquʼn nya bʼaʼn tuʼn tbʼant jlu kyuʼn.

20. ¿Alkye tten jaku mlay qnaʼ aj qonin tiʼj Satanás?

²⁰ Tnejel, qa kukx xi qtxʼolbʼaʼn aju in bʼant kyuʼn taqʼunal Tajaw il, in qo onin tiʼj Satanás. Ax tok in tzaj tqʼamaʼn Tyol Dios qa at tipumal Satanás tuʼn tbʼant junjun tiʼ tuʼn, naqtzun tuʼnj, ax ikx in tzaj tqʼamaʼn qa in najbʼen «qe señ kyukʼix  tbʼinchbʼen nim kyipumal, pero mya ax tok» ex in najbʼen tkyaqil wiq sbʼubʼil tuʼn, tuʼn kykubʼ «t-sbʼuʼn qe xjal» (2 Tesalonicenses 2:9, 10). Puro sbʼulxix, ex ojtzqiʼn tuʼn alkye tten tuʼn tkubʼ tiʼj kynabʼil qeju at kygan tiʼjju in bʼant kyuʼn chman. Iktzen tten in che kubʼ t-sbʼuʼn xjal tuʼn tkubʼ kyximin qa ma tzʼok kyqʼoʼn kywitz ex qa ma tzʼok kybʼiʼn aju mitiʼ sikʼ. Yajxitl atlo maj in xi kyqʼamaʼn qa ax tok jlu, ex aj t-xi tqʼamaʼn jun te juntl, junxi chʼintl tten in xi kyqʼamaʼn. ¿Tiʼ jaku tzaj qa ax ikx at jun okslal xbʼant jlu tuʼn? Qa ma bʼant jlu tuʼn in nonin tiʼjju jatumel «in tzaj nikʼaj yol». ¡In xi tqʼamaʼn aju in bʼant tuʼn Satanás! (Juan 8:44; 2 Timoteo 2:16.)

21. ¿Alqiʼj qo yolil?

²¹ Atlo maj ax tok aju in tqʼamaʼn jun xjal qa otaq tzʼok kʼixbʼisaʼn kyuʼn taqʼunal Tajaw il, naqtzen tuʼnj, at juntl tiquʼn mitiʼ tuʼn t-xi qtxʼolbʼaʼn jun maj ex juntl maj jlu kye qerman. Qaj tuʼn qyolin tiʼj Jesús ex nya tiʼj Satanás. Quʼn ilxix tiʼj tuʼn tok qqʼoʼn «qwitz tiʼj Jesús aju nejenel qwitz tuj qokslabʼl, ex kyaj tzʼaqet-xix qokslabʼl tuʼn» (Hebreos 12:2). Tej tten tzalu twitz Txʼotxʼ mitiʼ xi tqʼamaʼn nim txʼolbʼabʼil kyiʼj nya bʼaʼn anjel kye qeju lepchiqeʼktaq tiʼj, ex ojtzqiʼntaq nim tqanil tuʼn tiʼjju jaku bʼant ex tiʼjju mlay bʼant tuʼn Satanás. Quʼn aju bʼant tuʼn Jesús, ok tilil tuʼn, tuʼn t-xi tqʼamaʼn aju tqanil tiʼj tKawbʼil Dios. Tbʼanelxix qa ma tzʼel qkanoʼn tiʼj Jesús ex kyiʼj apóstol aj qyolin tiʼjju jaku tzʼonin kyiʼj txqantl, ik tzeʼn «tiʼj tbʼinchbʼen Dios nim tipumal» (Hechos 2:11; Lucas 8:1; Romanos 1:11, 12).

22. ¿Alkye tten jaku qo onin tuʼn kytzalaj «qeju ateʼ tuj kyaʼj»?

²² Ik tzeʼn ma qo xnaqʼtzan tiʼj, in nok tilil tuʼn Satanás tuʼn tnaj qamiwbʼil tukʼe Jehová aj kyajbʼen nimku wiq sbʼubʼil tuʼn, ik tzeʼn kyaqʼun chman. Naqtzun tuʼnj, qa kukx sel qikʼen aju nya bʼaʼn ex qa kukx xqo ok lepeʼ tiʼj aju bʼaʼn, mlayx txi qqʼoʼn ambʼil te Satanás tuʼn qkubʼ tuʼn tukʼe tkyaqil aju in bʼant kyuʼn chman (kjawil uʼjit Efesios 4:27). ¡«Mas che tzalajel qeju ateʼ tuj kyaʼj» qa ma qo weʼxix kywitz qeju «sbʼubʼl tuʼn tajaw il» ajxi tkubʼ najsaʼn! (Lucas 15:7; Efesios 6:11.)