Taj Jehová tuʼn tjapun kyuʼn qeju o che kubʼ mojeʼ aju yol xi tqʼamaʼn jun te juntl tej kykubʼ mojeʼ. Tej kykubʼ tmojbʼaʼn Jehová tnejel xjal, tqʼama jlu: «Kyjel tqʼoʼn xinaq tman ex ttxuʼ, kʼokeltzun mojeʼ tukʼil t-xuʼjil, ex kykabʼil che okel te junx». Tej tikʼ nim ambʼil, tqʼama Jesús aʼyex yol jlu ax ikx tqʼamatl: «Kyjaʼtzun, aju ok tmojbʼaʼn Dios, miʼn tzʼel tpaʼn xjal» (Génesis 2:24; Mateo 19:3-6). Ik tzeʼn in qo xnaqʼtzan tiʼj, toj twitz Jehová ex toj twitz Jesús aju kymojbʼabʼil kyibʼ kabʼe xjal ktel toj tkyaqil kyanqʼibʼil, oʼkx kbʼajel jlu qa ma kyim jun kyxol qeju o che kubʼ mojeʼ (1 Corintios 7:39). Quʼn xjan aju kymojbʼabʼil kyibʼ, moqa kymejebʼleʼn, kabʼe xjal, mitiʼ (tiloʼ) tuʼn tbʼaj kyximen naj tuʼn tkubʼ kynajsaʼn. Axpe ikx, in  nel tikʼen Jehová qa ma kubʼ tnajsaʼn tmojbʼabʼil tibʼ jun xjal twitz jun ajkawil ex mitiʼ in tzaj tqʼamaʼn Tuʼjil Tyol qa bʼaʼn jlu (Malaquías 2:15, 16).

Ik tzeʼn in tzaj tqʼamaʼn Tyol Dios, ¿tiquʼn jaku kubʼ tnajsaʼn tmojbʼabʼil tibʼ jun xjal? O tzaj tqʼamaʼn Jehová qa in nelxix tikʼen aju qa ma tzʼok ten jun kyxol qeju o che kubʼ mojeʼ tukʼe juntl (Génesis 39:9; 2 Samuel 11:26, 27; Salmo 51:4). Tuʼnju in nelxix tikʼen jlu, in tzaj tqʼoʼn ambʼil tuʼn tkubʼ kynajsaʼn kymojbʼabʼil kyibʼ kabʼe xjal qa at jun kyxol qe jlu in yaẍin (in kyʼaʼjin). (Toj xnaqʼtzbʼil 9, taqikʼ 7, in tzaj chikʼbʼaʼn aju at toklen tukʼe yaẍbʼil.) Atz o tzaj tqʼoʼn Jehová ambʼil teju mitiʼ til tuʼn tkubʼ t-ximen qa kukx ktel tmojbʼabʼil moqa ok kbʼel tnajsaʼn (Mateo 19:9, TNM). Tuʼntzunju, qa ma kubʼ t-ximen aju mitiʼ til tuʼn tkubʼ tnajsaʼn tmojbʼabʼil tibʼ, mitiʼ in kubʼ tbʼinchen jun nya bʼaʼn toj twitz Jehová. Naqtzen tuʼnj, mitiʼ tuʼn tok ten jun okslal (nimil) qʼamalte te tuʼn tbʼant jlu tuʼn. Tuʼnju at maj, aj tok ten ximel tiʼj junjun tiʼchaq at toklen toj kyanqʼibʼil, jaku kubʼ t-ximen aju mitiʼ til tuʼn miʼ tkubʼ tnajsaʼn tmojbʼabʼil tibʼ, mas qa ma tzʼok tqʼoʼn twitz tiʼj tukʼil qa ax tok (bʼaʼn ax) ma tzʼajtz tiʼj tanmi tiʼjju xbʼant tuʼn. Tkyaqil jlu in tzaj tyekʼun qa aju mitiʼ til o tzaj tqʼoʼn Tyol Dios toklen tuʼn tkubʼ t-ximen tiʼ kbʼantel tuʼn ex tuʼn t-xi tiqan tex tiqatz (Gálatas 6:5).

Naqtzen tuʼnj, ax ikx at maj in tzaj nimxix nya bʼaʼn kyxol qeju o che kubʼ mojeʼ ex tuʼn jlu jakulo kubʼ t-ximen jun okslal tuʼn tel tpan tibʼ, axpe ikx jakule kubʼ tnajsaʼn tmojbʼabʼil tibʼ, inchq, moqa maske, mitiʼ ma tzʼok ten tukʼil tukʼe juntl. Qa ma bʼaj jlu, in tzaj tqʼamaʼn Tyol Dios teju xkubʼ t-ximen tuʼn tel tpan tibʼ tuʼn «kukx tuʼn tkyaj ten, mintiʼ tuʼn tmojeʼ tukʼil juntl, ex qa tuʼn tbʼant tten» tukʼe tukʼil (1 Corintios 7:11). Qa ma tzʼel tpan tibʼ okslal, nya tzaqpiʼn taʼ tuʼn tok tqʼoʼn twitz tiʼj juntl tuʼn tkubʼ mojeʼ tukʼe (Mateo 5:32, TNM). Qo xnaqʼtzan tiʼj junjun tiʼ in tzajxix nya bʼaʼn tuʼn kyxol qeju o che kubʼ mojeʼ, ex tuʼn jlu at junjun in nel tpan tibʼ.

Nya taj tuʼn t-xi tqʼoʼn aju at tajbʼen kye toj tja. At chmilbʼaj mitiʼ in xi tqʼoʼn aju at tajbʼen kye toj tja, naqtzen tuʼnj, nya tuʼnju mitiʼ in kanet tuʼn, quʼn tuʼnju nya taj tuʼn t-xi tqʼoʼn; ex, tuʼn jlu, kwest-xix in che anqʼin toj tja. ¿Tiʼ in tzaj tqʼamaʼn Tyol Dios tiʼj  jlu? «Qa at jun okslal [...] mintiʼ in che ok tkwentin qeju ateʼ tuj tja, ma kyaj tkolin tokslabʼl, ex mas ploj tmod twitz jun xjal mya okslal.» (1 Timoteo 5:8.) Qa at jun chmilbʼaj in bʼant jlu ex nya taj tuʼn tkubʼ tchʼixpuʼn t-xim, a xuʼj kbʼajel ximente qa il tiʼj tuʼn tel tpan tibʼ tiʼj twitz jun jwes tuʼntzen miʼn ttzaj nya bʼaʼn tiʼj ex kyiʼj tal. Qa ma tzaj qʼamaʼn qa nya taj jun okslal tuʼn t-xi tqʼoʼn aju at tajbʼen kye toj tja, ok kbʼajelxix kyjyoʼn ansyan tqanil tiʼj jlu, quʼn tuʼn jlu jaku tzʼex lajet okslal lu.

Qa in kʼixbʼisan. At junjun naq tuʼn chʼin in jaw lipen naj, a jlu jaku tzaj tyabʼ tukʼe tuʼn, axpe ikx jakule kyim tuʼn. Qa jun okslal aju in nok lipen tiʼj tukʼe, ilxix tiʼj tuʼn kyyolen ansyan tiʼj jlu, quʼn aju xjal in jaw kyaqpaj naj ex aju in nok ten bʼiyel jaku tzʼex lajet tuʼn jlu (Gálatas 5:19-21).

Jaku tzaj nya bʼaʼn tiʼj tamiwbʼel aju in najbʼen te Dios tuʼn. At chmilbʼaj moqa xuʼjilbʼaj in nokxix tilel tuʼn, tuʼn miʼn tajbʼen tukʼe te Jehová, axpe ikx at maj in nok tchaqʼoʼn tukʼe tuʼn miʼn tjapun tuʼn aju in tqʼamaʼn Tyol Dios. Qa ma bʼaj ikju, a okslal kbʼajel ximente qa mas bʼan tuʼn tel tpan tibʼ tuʼn tjapun jlu tuʼn: «Tnejel ilxix tiʼj tuʼn t-xi qnimane Dios, ex mya qe xjal» (Hechos 5:29).

Bʼaʼn tuʼn ttzaj qnaʼn juntl maj qa ma tzaj nimxix nya bʼaʼn kyxol qeju o che kubʼ mojeʼ ik tzeʼn ma qo yolen tiʼj mitiʼ tuʼn t-xi qʼamet teju mitiʼ til tuʼn tel tpan tibʼ tiʼj tukʼe moqa tuʼn kukx tnajan tukʼe tukʼil. Jaku txi kyqʼoʼn ansyan ex junjuntl ermano at kynabʼil onbʼil ex kawbʼil aju tkuʼx toj Tyol Dios, naqtzen tuʼnj, ilxix tiʼj tuʼn tel kynikʼ tiʼj qa oʼkx Jehová ojtzqilte aju in bʼaj kyxol qeju o che kubʼ mojeʼ. Qa at jun xuʼj okslal (moqa at jun xinaq, moqa ichan, okslal) in xi tnimsaʼn aju nya bʼaʼn in tzaj kyxol naq tuʼn tel tpan tibʼ tiʼj tukʼe, in kubʼ tyekʼun qa mitiʼ toklen tmojbʼabʼil tibʼ toj twitz ex qa mitiʼ toklen Dios toj twitz. Ax ikx ojtzqiʼn tuʼn Jehová qa at jun in jyon tten tuʼn tel tpan tibʼ tiʼj tukʼil tukʼe sbʼubʼil, naq alkyexku sbʼubʼil in bʼajxix t-ximen. Ikju, «mintiʼ jun tchʼisbʼen Dios miwt qʼanchaʼl twitz, ex mintiʼ jun maqsiʼn; tkyaqil qʼanchaʼl twitz Dios jatum tuʼn qpon qʼol tajlal» (Hebreos 4:13). Naqtzun tuʼnj, qa at jun tiʼ jaku tzajxix nya bʼaʼn tiʼj okslal tuʼn ex, qa tuʼn jlu, kbʼajel t-ximen tuʼn tel tpan tibʼ, miʼwtle aʼl jun kjawel yolen tiʼj okslal. «Quʼn qkyaqil qotenbʼil twitz Dyos tuʼn qok toj xjel tibʼaj tkyaqiljuʼ xqbʼincha.» (Romanos 14:10-12, Xjan Tuʼjil.)