1-3. a) ¿Tiquʼn in nok kyqʼoʼn kywitz txubʼaj kyiʼj kyal qa saq kyiʼj ex qa otaq bʼaj kybʼinchaʼn kyten? b) ¿Tiquʼn taj Jehová tuʼn tkubʼ kysaqin kyibʼ tmajen, ex tiquʼn qaj tuʼn tkubʼ qsaqin qibʼ?

NAʼMXTAQ tex bʼet jun kʼwaʼl, in nok tqʼoʼn tnan twitz tiʼj qa otaq bʼaj ttxʼjoʼn tiʼj, qa saq (ẍnuʼl) t-xbʼalun tok ex qa otaq bʼaj tbʼinchaʼn tten. ¿Tiquʼn in bʼant jlu tuʼn? Tnejel, tuʼn miʼ ttzaj tyabʼ kʼwaʼl, tkabʼ, tuʼnju in che yolin xjal kyiʼj tatbʼaj naq tzeʼn qe kykʼwaʼl.

² Ax ikx te qTat toj kyaʼj taj (tgan) tuʼn tkubʼ kysaqin kyibʼ tmajen. Axpe ikx in tzaj tqʼamaʼn Tyol Dios jlu: «Bʼaʼna tukʼil ju xjal saq tuj tanmi» (Salmo 18:26). * ¿Tiquʼn tajxix Jehová  tuʼn tbʼant jlu? Tnejel, tuʼnju kʼujlaʼn qoʼ tuʼn ex ojtzqiʼn tuʼn qa qex tbʼanel tzul. Tkabʼ, tuʼnju qa saq qe tTestiw ok kʼelel kynikʼ xjal qa saq te. Ax tok (bʼaʼn ax) nya qaj tuʼn kyyolin xjal nya bʼaʼn tiʼj Dios ex tiʼj xjan tbʼi. Qaj tuʼn tjaw nimsen Dios ex aju tbʼi. Tuʼntzen aju, il tiʼj tuʼn tkubʼ qsaqin qibʼ ex tuʼn tkubʼ qbʼinchaʼn aju bʼaʼn (Ezequiel 36:22; kjawil uʼjit 1 Pedro 2:12).

³ ¿Tiquʼn ilxix tiʼj tuʼn tkubʼ qsaqin qibʼ? Tnejel, tuʼnju ojtzqiʼn quʼn qa kʼujlaʼn qe xjal tuʼn Dios aʼyeju in kubʼ kysaqin kyibʼ. Tkabʼ, tuʼnju kʼujlaʼn Jehová quʼn ex qaj tuʼn tjaw qnimsaʼn toj tkyaqil tten qanqʼibʼil. Toxin, tuʼnju qaj tuʼn kukx qten toj tkʼujlabʼil. Tuʼntzen aju, qo xnaqʼtzan tiʼj junjun tiʼ aju at toklen tukʼeju tuʼn tkubʼ qsaqin qibʼ: ¿Tiquʼn ilxix tiʼj? ¿Tiʼ t-xilen? ¿Tiʼ kbʼantel quʼn tuʼn kukx qten saq? A jlu kʼonil qiʼj tuʼn tel qnikʼ qa atx taj tuʼn tkubʼ qchʼexpun qibʼ.

4, 5. a) ¿Tiquʼn ilxix tiʼj tuʼn qok te saq? b) ¿Alkye tten in tzaj tyekʼun tbʼinchbʼen Jehová qa taj tuʼn tten tkyaqil te saq?

⁴ At nim (bʼampo) tten in qo tzaj t-xnaqʼtzaʼn Jehová. Jun tten aju in nok te jun yekʼbʼil qe. Axpe ikx in tzaj tqʼamaʼn Xjan Uʼj: «Kykanoʼmile tiʼj Dios» (Efesios 5:1). Ik tzeʼn in qo xnaqʼtzan tiʼj, ¿tiquʼn ilxix tiʼj tuʼn qok te saq? Tnejel tuʼnju in qo ajbʼen te jun Dios xjan ex saq (kjawil uʼjit Levítico 11:44, 45).

⁵ In nel qnikʼ qa saqxix te Jehová, ex qa ateʼ nim tbʼanel tmod, aj tok qqʼoʼn qwitz tiʼj tbʼinchbʼen (Romanos 1:20). Jun techel aju Txʼotxʼ. O bʼant nimku tiʼ tuʼn Jehová tuʼn miʼ tbʼaj yaj. Tuʼntzun aju e kubʼ tqʼoʼn junjun tten tuʼn t-saqix kyqʼiqʼ ex aʼ. Tbʼanelxix tuʼnju tuʼnx Txʼotxʼ in bʼaj t-saqen tibʼ. Tuʼn jlu in nel qnikʼ qa aju «o bʼant txʼotxʼ» tuʼn tajxix tuʼn tten tkyaqil te saq (Jeremías 10:12). Ax ikx qe qaj tuʼn tten tkyaqil te saq.

6, 7. ¿Alkye tten tzaj tyekʼun Ley qa ilxix tiʼj tuʼn kyok qeju in che ajbʼen te Dios te saq?

⁶ Juntl tiquʼn il tiʼj tuʼn qten saq tuʼnju in tzaj tqʼamaʼn  Jehová, aju qKawil, tuʼn qok te saq. Jun techel, aju Ley tzaj qʼoʼn te tnam Israel in yolintaq tiʼj qa attaq toklen aju tuʼn tkubʼ kysaqin kyibʼ tukʼeju tuʼn kyajbʼen te Jehová. In tzajtaq tqʼamaʼn ley tuʼn tel ttxʼjoʼn tnejel pal kabʼe maj tiʼj naʼmxtaq tok ten aqʼunal toj Qʼij te Najsbʼil Il (Levítico 16:4, 23, 24). Ax ikx in tzajtaq tqʼamaʼn qa kykyaqil pal iltaq tiʼj tuʼn tel kytxʼjoʼn kyqʼabʼ ex kyqan naʼmxtaq tkubʼ kyqʼoʼn chojbʼil twitz Jehová (Éxodo 30:17-21; 2 Crónicas 4:6). Ax ikx in tzajtaq tqʼamaʼn qa atle 70 tiʼ jakutaq tzʼilix t-xmilal jun aj Israel tuʼn ex jakutaq tzʼilex toj twitz Dios. Mlaytaq bʼant tuʼn tajbʼentl te Dios —at maj jakutaq kubʼ bʼiyoʼn— qa tzʼiltaq taʼ (Levítico 15:31). Ax ikx in tzajtaq tqʼamaʼn Ley qa alkyexku xjal otaq tzʼilix iltaq tiʼj tuʼn tkubʼ t-saqin tibʼ, attaq toklen jlu tukʼeju tuʼn tel ttxʼjoʼn tiʼj ex tuʼn tjatz ttxʼjoʼn t-xbʼalun; qa mitiʼ (tiloʼ) xbʼant jlu tuʼn, oktaq «kʼelex lajet [moqa ‹kbʼel bʼiyet›, TNM] tuʼntzun miʼn tten kyxol t-xjalil» (Números 19:17-20).

⁷ Ya mitiʼtl in najbʼen Ley tzaj qʼoʼn te Moisés, naqtzen tuʼnj, tuʼn jlu in nel qnikʼ tiʼj t-xim Jehová. Toj Ley lu, qʼanchaʼl qa in tzaj tqʼamaʼn Jehová tuʼn tkubʼ qsaqin qibʼ tuʼn qajbʼen te. Mitiʼx te Jehová in chʼixpuj t-xim (Malaquías 3:6). Oʼkx «aju ajbʼebʼl [...] saqxix ex mintiʼ tpaltil» in xi tkʼamoʼn Jehová (Santiago 1:27). Tbʼanel tuʼn qxnaqʼtzan tiʼ t-xilen aju in tzaj qʼamaʼn tzalu toj ambʼil jaʼlo (jaʼla).

8. ¿Alkye kyaje tten taj Jehová tuʼn tkubʼ qsaqin qibʼ?

⁸ Nya oʼkx in tzaj tqʼamaʼn Tyol Dios tuʼn tten qxmilal saq. Ax ikx in tzaj tqʼamaʼn qa tuʼn qten saq toj twitz Dios ilxix tiʼj tuʼn qok te saq toj tkyaqil tten qanqʼibʼil. Taj Jehová tuʼn tkubʼ qsaqen qibʼ toj kyaje tten: tuʼn miʼ tkubʼ qtzʼilen qajbʼebʼil, tuʼn tkubʼ qbʼinchen aju tbʼanel, tuʼn kyten tbʼanel qxim ex tuʼn tkubʼ qsaqen qxmilal ex aju at qe. Qo xnaqʼtzal tiʼ kyxilen jlu.

9, 10. ¿Tiʼ t-xilen aju tuʼn miʼ tkubʼ qtzʼilen qajbʼebʼil, ex tiʼ mitiʼ in bʼant kyuʼn ax tok okslal?

 ⁹ Tuʼn miʼ tkubʼ qtzʼilen qajbʼebʼil. At toklen jlu tukʼeju tuʼn miʼ tok mojbʼet ax tok okslabʼil tukʼe nya ax tok okslabʼil. Qo ximen kyiʼj aj Israel tej kyten toj Babilonia. Ajtaq kymeltzʼaj toj Jerusalén iltaq tiʼj tuʼn t-xi kybʼiʼn kawbʼil lu: «Kyetz naje tuj Babilonia, miʼn tzʼok kymakoʼne ju ttzʼilil [...]. Bʼaʼn tuʼn tkubʼ kykwentin kyibʼe tiʼj mya bʼaʼn» (Isaías 52:11). Ok che meltzʼajeltaq tuʼn kyajbʼen juntl maj te Jehová. Tuʼntzun aju, iltaq tiʼj tuʼn tel kyikʼen aju nya bʼaʼn toj twitz Dios, ik tzeʼn t-xnaqʼtzbʼil ex tbʼinchbʼen okslabʼil te Babilonia.

¹⁰ Ax ikx qeju ax tok okslal (nimil) toj ambʼil jaʼlo, ilxix tiʼj tuʼn miʼ tkubʼ kytzʼilen kyibʼ tukʼe nya ax tok okslabʼil (nimbʼil) (kjawil uʼjit 1 Corintios 10:21). At okslabʼil lu twitz tkyaqil Txʼotxʼ, qa mitiʼ sok qxqʼuqin qibʼ, jaku tzaj nya bʼaʼn qiʼj tuʼn. Toj nimku tnam aʼye kyxnaqʼtzbʼil xjal —ik tzeʼn qa mitiʼ in kyim tanmi xjal— at toj nimku ninqʼij, toj junjun tiʼ in kubʼ kynaʼn xjal ex tojju in bʼant kyuʼn xjal tkyaqil qʼij (Eclesiastés 9:5, 6, 10). Aʼye ax tok okslal mitiʼ in kubʼ kybʼinchaʼn aju at toklen tukʼe nya ax tok okslabʼil. * Tuʼntzen jlu, mlay txi qqʼoʼn ambʼil kye xjal tuʼn ttzaj kyqʼamaʼn alkye tten qo ajbʼel te Dios (Hechos 5:29).

11. ¿Tiʼ t-xilen aju tuʼn tkubʼ qbʼinchen aju tbʼanel, ex tiquʼn ilxix tiʼj?

¹¹ Tuʼn tkubʼ qbʼinchen aju tbʼanel. A jlu at toklen tukʼeju tuʼn tel qikʼen tkyaqil yaẍbʼil (kyʼaʼjil), tuʼntzen qten toj tkʼujlabʼil qMan Dios (kjawil uʼjit Efesios 5:5). Ilxix tiʼj tuʼn kyel oq okslal «tiʼj ju yaẍbʼil» ik tzeʼn qo xnaqʼtzal tiʼj toj juntl xnaqʼtzbʼil. Aʼyeju in kubʼ kybʼinchen il lu ex mitiʼ in najtz tiʼj kyanmi «mitiʼ kyoklen tiʼj tkawbʼil Dios» (1 Corintios 6:9, 10, 18). Aʼye xjal lu «ikʼbʼil qe» toj twitz Jehová ex qa mitiʼ xkubʼ kysaqin kyibʼ «che xeʼl tuj  najabʼ in kʼant tuʼn qʼaqʼ ex azufre, atzun tkabʼin kamikju» (Apocalipsis 21:8).

12, 13. ¿Tiʼ jaku bʼant tuʼn qxim ex tiʼ jaku tzʼonin qiʼj tuʼn kyten tbʼanel qxim?

¹² Tuʼn kyten tbʼanel qxim. Naq tiʼ in kubʼ qximen axju kbʼantel quʼn, qa ma che okx qqʼoʼn nya bʼaʼn ximbʼetz toj qwiʼ, kkupunel toj qanmi ex kbʼel qbʼinchen nya bʼaʼn (Mateo 5:28; 15:18-20). Qatzun ma tzʼokx qnojsaʼn qwiʼ tukʼe tbʼanel ex saq ximbʼetz, ok ktel qajbʼil tuʼn tkubʼ qbʼinchen aju tbʼanel (kjawil uʼjit Filipenses 4:8). ¿Tiʼ jaku tzʼonin qiʼj tuʼn kyten tbʼanel qxim? Tnejel, il tiʼj tuʼn tel qikʼen tkyaqil saqchbʼil jaku tzʼilix qxim tuʼn. * Tkabʼ, il tiʼj tuʼn kyokx qqʼoʼn tbʼanel ximbʼetz toj qwiʼ aj qxnaqʼtzan tkyaqil qʼij tiʼj Tyol Dios (Salmo 19:8, 9).

¹³ Ik tzeʼn in qo xnaqʼtzan tiʼj, tuʼn qten toj tkʼujlabʼil Dios, ilxix tiʼj tuʼn miʼ tkubʼ qtzʼilen qajbʼebʼil, tuʼn tkubʼ qbʼinchen aju tbʼanel ex tuʼn kyten tbʼanel qxim. Aʼyeju oxe tten lu in che yolin junjuntl xnaqʼtzbʼil tiʼj toj uʼj lu. Atz qo xnaqʼtzal jaʼlo tiʼjju tkyajen tten: aju tuʼn tkubʼ qsaqen qxmilal ex aju at qe.

14. ¿Tiquʼn nya teyelex te junjun kbʼel t-ximen qa kbʼel t-saqin tibʼ?

¹⁴ Il tiʼj tuʼn kukx tten qxmilal saq ex aju jatumel in qo anqʼin. At junjun in kubʼ ximinte qa a jlu teyelex te junjun kbʼel t-ximen ex qa mi aʼl juntl tuʼn t-xi tqʼamaʼn te. Nya bʼaʼn tuʼn tten t-xim okslal ikju. Ik tzeʼn saj qʼamaʼn tej saj tzyet xnaqʼtzbʼil lu, nya oʼkx taj Jehová tuʼn tkubʼ qsaqin qibʼ tuʼn qten toj tbʼanel, ax ikx tuʼnju naq tzeʼn qoʼ axtzun kyxim xjalju ktel tiʼj Dios. Bʼaʼn tuʼn ttzaj qnaʼn aju techel tkubʼ toj tnejel taqikʼ: qa tzʼil tiʼj kʼwaʼl ex qa nya bʼinchen tten jakule tzul nim ximbʼetz toj qwiʼ kyiʼj  ttat. Ax ikx qa nya bʼinchen qten moqa at jun nya bʼaʼn in kubʼ qbʼinchaʼn, jakulo che yolin xjal nya bʼaʼn tiʼj qTat toj kyaʼj ex tiʼjju in xi qpakbʼaʼn. Ilxix tiʼj tuʼn kykubʼ ten yol lu toj qwiʼ: «Mintiʼ in kubʼ qqʼoʼne tolsabʼl kywitz xjal tuʼntzun miʼn kyyolin xjal mya bʼaʼn tiʼj qaqʼunbʼene. Nnoʼk tilil quʼne tuʼn qele bʼaʼn tuj tkyaqil, porque ajbʼel qoʼye te Dios» (2 Corintios 6:3, 4). Tuʼntzen aju, qo xnaqʼtzan jachaq tumel il tiʼj tuʼn tkubʼ qsaqin qibʼ.

15, 16. ¿Tiʼ kbʼantel quʼn tuʼn qten saq, ex tzeʼn qxbʼalun kʼokel qqʼoʼn?

¹⁵ Tuʼn tel qtxʼajoʼn qiʼj ex tuʼn tbʼaj qbʼinchen qten. Jaxku tumel in qo anqʼin, alkyexku tten xqo tzaj xnaqʼtzaʼn, il tiʼj tuʼn tel qtxʼajoʼn qiʼj tkyaqil qʼij. Chʼixmi toj tkyaqil plaj at aʼ ex jabón tuʼn tel qtxʼajoʼn qiʼj ex kyiʼj qkʼwaʼl. Ax ikx il tiʼj tuʼn tel qtxʼajoʼn qqʼabʼ tukʼe jabón aj qxiʼ waʼl moqa aj tkubʼ qbʼinchen qwa ex aj qetz tzʼaʼlil moqa aj tel qchʼixpuʼn  kyiʼj neʼ. Iktzun tten mlayxix tzaj qyabʼ tuʼn nimku yabʼil, ik tzeʼn in nel quʼn. Qa mitiʼ tzʼalbʼil jatumel in qo anqʼin, il tiʼj tuʼn tkux qmuquʼn qkʼuʼj, ik tzeʼn bʼant kyuʼn aj Israel ojtxe (Deuteronomio 23:12, 13).

¹⁶ Ax ikx il tiʼj tuʼn tjatz qtxʼajoʼn qxbʼalun. Nya il tiʼj tuʼn t-xiʼ nim pwaq tiʼj qxbʼalun nix tuʼn tetz qlaqʼoʼn aju kʼitzqe tetzlen kyuʼn xjal, aju ilxix tiʼj aju tuʼn tel qtxʼajoʼn tiʼj qxbʼalun ex tuʼn tok qxbʼalumin qibʼ toj tbʼanel (kjawil uʼjit 1 Timoteo 2:9, 10). Toj tkyaqil ambʼil ex jaxku tumel, qaj tuʼn tel qtxʼajoʼn qiʼj ex tuʼn tbʼaj qbʼinchaʼn qten «tuʼntzun tel kynikʼ xjal tiʼj qa tbʼanilxix t-xnaqʼtzbʼil Dios aju Klol qe» (Tito 2:10).

17. ¿Tiquʼn il tiʼj tuʼn tjaw qiʼn tzʼis ex tuʼn tbʼaj qbʼinchaʼn aju jatumel in qo anqʼin ex tkyaqilju at qe?

¹⁷ Tuʼn tbʼaj qsaqen aju jatumel in qo anqʼin ex aju at qe. Qa tbʼanel qja ex qa at nim tbʼanel tiʼchaq toj moqa mitiʼ, ilxix tiʼj tuʼn tjaw qiʼn tzʼis ex tuʼn tbʼaj qbʼinchen, qa jaku bʼant. Axju kbʼantel quʼn qa at qkʼuxbʼil —mitiʼ tuʼn tel naj tiʼj qkʼuʼj tuʼn tbʼaj qsaqin tojxi—, mas il tiʼj tuʼn tbʼant jlu quʼn qa in najbʼen tuʼn qxiʼ toj chmabʼil ex pakbʼal. Ik kbʼantel quʼn tukʼe tkyaqilju at qe. Qa ma bʼant jlu quʼn, ok kbʼel qqʼoʼn jun tbʼanel techel. Quʼn ax tok in che kubʼ qxnaqʼtzaʼn xjal qa, tuʼnju kʼujlaʼn aju saq tuʼn Jehová, ok kpol «tqʼijlalil tuʼn kynaj qeju ma naj twitz txʼotxʼ kyuʼn» ex ok kajbʼel tKawbʼil tuʼn tok Txʼotxʼ te jun tbʼanel najbʼil (Apocalipsis 11:18; Lucas 23:43). Tuʼntzunju, qa saq taʼ tkyaqilju at qe, in kubʼ qyekʼun qa qaj tuʼn qten toj Tbʼanel Najbʼil.

18. ¿Alkye tten in kubʼ qyekʼun qa nim toklen Ja te Chmabʼil qe?

¹⁸ Tuʼn tten Ja te Chmabʼil te saq. Nim toklen Ja te Chmabʼil qe, tuʼnju atz in jaw qnimsaʼn qMan Dios aju kʼujlaʼn quʼn. Qaj tuʼn kukx tten saq ex tuʼn tok te jun tbʼanel yekʼbʼil kye qeju in che pon toj chmabʼil. Tuʼn tten Ja te Chmabʼil toj tbʼanel, ilxix tiʼj tuʼn tjaw qiʼn tzʼis tkyaqil maj ex tuʼn tbʼaj bʼinchet aju nyaxix bʼaʼn taʼ. Qa ma qo onin tuʼn tbʼant  aqʼuntl lu, in kubʼ qyekʼun qa nim toklen Ja te Chmabʼil qe atz jatumel in qo ajbʼen teju ax tok Dios. Jun qoklen aju tuʼn tbʼaj qsaqin ex ‹tuʼn tbʼaj qbʼinchaʼn tja Dios› (2 Crónicas 34:10). Axju kbʼantel quʼn kyukʼe ja jatumel in che ok nimaq qchmabʼil.

19. ¿Tiʼ kʼelel qikʼen tuʼn miʼ tbʼaj qtzʼilen qxmilal ex tzeʼn in qo tzaj tonin Tyol Dios tuʼn tbʼant jlu quʼn?

¹⁹ ¿Tiʼ mas t-xilen aju tuʼn tkubʼ qsaqen qximlal? Aju tuʼn tel qikʼen tkyaqilju in tzʼilix qxmilal tuʼn. Kyjuʼtzun mitiʼ in qo sichʼen, mitiʼ in xi qkʼaʼn nim qʼeʼn, mitiʼ in xi qkʼaʼn droga ex mitiʼ in najbʼen junjun qʼanbʼil quʼn aju jaku qo naqʼet tiʼj ex aju mitiʼ in tzaj tqʼamaʼn qʼanel tuʼn t-xi qkʼaʼn. Ax tok mitiʼ in tzaj tqʼamaʼn Tyol Dios tbʼi tkyaqilju jaku qo naqʼet tiʼj toj ambʼil jaʼlo, naqtzen tuʼnj, ateʼ junjun kawbʼil jatumel in tzaj qʼamaʼn qa ikʼbʼilxix in che ela jlu toj twitz Jehová. Qo xnaqʼtzan kyiʼj jweʼ kawbʼil aju qaj tuʼn kyxi qbʼiʼn tuʼnju kʼujlaʼn Dios quʼn ex aʼyeju jaku che onin qiʼj tuʼn qel bʼaʼn toj twitz Dios.

20, 21. ¿Alkye taj Jehová tuʼn tel qikʼen, ex tiʼ in tzaj ttziyen qe qa ma bʼant jlu quʼn?

²⁰ «Aqeye erman at nkʼuʼje kyiʼje, atzunju yol lu tzaj ttziyan Dios qe. Kyjaʼtzun qtxʼjoʼmel tkyaqilju in tzʼilsante qchibʼjal ex in tzʼilsante qanmi; ex atwit tchi Dios tuj qwitz ex tuʼn t-xi qqʼon qibʼ te Dios tuʼn qajbʼen oʼkx te te jumajx.» (2 Corintios 7:1.) A jlu in tzaj tyekʼun qa taj Jehová tuʼn tel qikʼen «tkyaqilju in tzʼilsante qchibʼjal» moqa aju «in tzʼilsante qanmi» (moqa qximbʼetz). Tuʼntzun jlu, nel qikʼen tkyaqilju jaku qo naqʼet tiʼj ex jaku tzaj qyabʼ tuʼn ex jaku tzkajti qnabʼil tuʼn.

²¹ Tojx piẍ Tyol Dios lu, in tzaj qʼamaʼn tiquʼn ilxix tiʼj tuʼn tel ‹qtxʼjoʼn tkyaqilju in tzʼilsante qchibʼjal›. Tej saj tzyet 2 Corintios 7:1 in tzaj tqʼamaʼn jlu: «Atzunju yol lu tzaj ttziyan Dios qe». ¿Tiʼ o tzaj ttziyan Dios qe? Aju in tzaj qʼamaʼn  kyoj taqikʼ Tyol Dios ma che kyaj: «Oktzun che kʼmetele wuʼne. Chin okele te Kymane» (2 Corintios 6:17, 18). ¡Tbʼanelxix jlu! In tzaj tqʼamaʼn Jehová qa qo okel t-xqʼuqin ik tzeʼn jun tatbʼaj in che ok t-xqʼuqin tkʼwaʼl tuʼnju kʼujlaʼn qe tuʼn. Naqtzen tuʼnj, il tiʼj tuʼn tel qtxʼjoʼn «tkyaqilju in tzʼilsante qchibʼjal ex in tzʼilsante qanmi». Bʼisbʼajilxix qa naq tuʼn jun tiʼ ikʼbʼilxix toj twitz Jehová kxel qnajsaʼn qamiwbʼil tukʼe.

22-25. ¿Alkyeqe kawbʼil ateʼkux toj Tyol Dios aʼyeju jaku che onin qiʼj tuʼn miʼ qnaqʼet tiʼj junjun tiʼ?

²² «Kykʼujlame Qman Dios tuʼn tkyaqil kyanmiye ex tuʼn tkyaqil kykʼuʼje ex tuʼn tkyaqil kynabʼle.» (Mateo 22:37.) Tqʼama Jesús qa mas nim toklen kawbʼil lu kyxol kykyaqil kawbʼil (Mateo 22:38). At toklen Jehová tuʼn tok qkʼujlaʼn tukʼe tkyaqil qkʼuʼj ex tukʼe tkyaqil qnabʼil. Tuʼntzen aju ilxix tiʼj tuʼn tel qikʼen tkyaqil aju jaku qo kyim naj tuʼn ex aju jaku yaj qximbʼetz tuʼn aju o tzaj tqʼoʼn Dios.

²³ «[A Jehová] in qʼonte qchwinqlal ex qxew qkyaqil ex tkyaqilju at.» (Hechos 17:24, 25.) Nimxix toklen qchwinqlal toj qwitz tuʼnju naq o tzaj toyin Dios qe. Tuʼntzun jlu, in nel qikʼen tkyaqilju jaku tzaj nya bʼaʼn qiʼj tuʼn. Qa mitiʼ xbʼant jlu quʼn, in kubʼ qyekʼun qa mitiʼ toklen qchwinqlal qe (Salmo 36:9).

²⁴ «Kykʼujlame qe kyukʼile ik tzaʼnx kyeye in kykʼujlan kyibʼe.» (Mateo 22:39.) Aju xjal naqʼli tiʼj jun tiʼ nya oʼkx te in tzaj nya bʼaʼn tiʼj, ax ikx in tzaj nya bʼaʼn kyiʼj qeju ateʼ ttxlaj. Ik in bʼaj tukʼe t-sibʼel t-sichʼ jun xjal. Qa ma bʼant jlu tuʼn jun xjal, mitiʼ toklen tkawbʼil Dios te aju tuʼn kyok kʼujlet txqantl xjal ex in kubʼ tyekʼun qa mitiʼ tkʼuʼj tiʼj Dios (1 Juan 4:20, 21).

²⁵ «Naʼnxa kye okslal tuʼn kyten tjaqʼ tkawbʼil gobierni ex tjaqʼ kykawbʼil aj sanjelal.» (Tito 3:1.) Mitiʼ in najbʼen droga kyuʼn ax tok okslal, tuʼnju kyoj nimku tnam jun il aju tuʼn t-xi kyiʼn xjal droga moqa tuʼn t-xi kykʼaʼn (Romanos 13:1).

26. a) ¿Tiʼ kbʼantel quʼn tuʼn kukx qten toj tkʼujlabʼil Dios? b) ¿Tiquʼn jaku txi qqʼamaʼn qa aju mas tbʼanel tuʼn tbʼant quʼn aju tuʼn qten saq twitz Dios?

 ²⁶ Tuʼn qten toj tkʼujlabʼil Dios, nya oʼkx tuʼn tkubʼ qsaqin qibʼ toj jun moqa toj kabʼe tten qanqʼibʼil, sino toj tkyaqil tten qanqʼibʼil. Atle maj kwest tuʼn tkyaj jun tiʼ naqʼle qoʼ tiʼj ex atlo maj jaku qo kubʼ tzʼaq juntl maj tuʼn; naqtzun tuʼnj jaku kyaj quʼn. * Aju mas tbʼanel tuʼn tbʼant quʼn aju tuʼn tkubʼ qsaqin qibʼ. Ax tok, qa a Jehová in tzaj qaninte, tajle tuʼn qten toj tbʼanel (kjawil uʼjit Isaías 48:17). Ax ikx in qo tzalaj tuʼnju in che yolen xjal bʼaʼn tiʼj Dios tuʼn jlu, aju Dios kʼujlaʼn quʼn ex kʼujlaʼn qoʼ tuʼn.