¿TIʼ JUNXITL at toj tilbʼilal (twutzbʼiyil) tzalu? Ikjo, aqe xjal. A tnejel xinaq, mo ichin, ex tnejil xuʼj, mo qya. ¿Alkye kubʼ bʼinchan kye? A qMan Dios. ¿Ojtzqiʼn tbʼi tuʼne? Aju Jehová, atzen kybʼi tnejel xjal ok qʼoʼn Adán tukʼe Eva.

Kubʼ tbʼinchin Jehová Adán ik tzeʼn jlu: jaw tiʼn chʼin quq twitz Txʼotxʼ ex kubʼ tbʼinchaʼn jun xmilalj tzʼaqle te xinaq. Xitzun t-xupin toj ttxaʼn, ex jaw itzʼji Adán.

Attaq jun taqʼen Adán tuʼn Dios. Xi tqʼmaʼn te tuʼn tok tqʼoʼn kybʼi tkyaqil wiq txkup. Xnaqʼtzanxixlo Adán kyiʼj txkup, tuʼntzun tok tqʼoʼn tbʼanel kybʼi kykyaqil. Nkubʼteq tbʼinchen Adán jlu, ex ok tkaʼyin jun tiʼ. ¿Ajtzqiʼn tuʼne tiʼ ok tkiʼn Adán?

Kakabʼtoq kybʼet txkup. Attoq tman ẍtun ttxaʼn ex attoq ttxuʼ ẍtun ttxaʼn, attaq tman león ex atteq ttxuʼ león. Atzen te Adán mitiʼteq jun tukʼil. Tuʼntzunjo, tzaj nim twatl Adán tuʼn Jehová ex jatz tiʼn jun t-xuʼk. Tukʼeju tbʼaqil lu, kubʼ tbʼinchan Jehová jun xuʼj, ajo ok te t-xuʼjil Adán.

¡Tzalajxixlo Adán tuʼn jlu! ¡Axle ikx te Eva ojelo tzalajxix tuʼnjo attaqtl tuj tbʼanel najbʼil! Atzun jaʼlin jakutoq chi ten kykʼwaʼl ex jakutaq chi anqʼin junx tuj tzalajbʼil.

Tajteq Jehová tuʼn kyanqʼin Adán tukʼe Eva te jumajx. Ax ikx tajbʼiltaq tuʼn tok tkyaqil twitz Txʼotxʼ kyuʼn, te jun tbʼanel najbʼil ik tzaʼn Edén. ¡Ojele chi tzalajxix Adán tukʼe Eva tej t-xi kyximen qa kbʼanteltoq tkyaqil jlu kyuʼn! ¿Tzalajwitlo teya naqwit tena tuʼn toniye tuʼn tok Txʼotxʼ te jun tbʼanel najbʼil? Nya nim ambʼil i ten Adán tukʼe Eva tuj tzalajbʼil. Qo xnaqʼtzal tiʼj tiquʼn.