TEJ tchʼiy kybʼet xjal twitz Txʼotxʼ, chʼixme kykyaqil kubʼ kybʼinchen mya bʼaʼn ik tzeʼn Caín. Atzun jun xinaq junxitl tbʼinchbʼen. Enocteq tbʼi. Mitiʼtaq ntzaj xobʼ xjal lu. Nya tbʼanelqetoq xjal nchi anqʼin ttxlaj Enoc, atzun te kukxtoq najbʼen te Dios.

¿Nel tnikʼe tiquʼn nimxixtoq mya bʼaʼn nkubʼ kybʼinchen xjal? Ximiye tiʼj jlu: ¿Alquʼn xi qʼmaʼn te Adán tukʼe Eva tuʼn t-xi kyloʼn twitz tzeʼ aju mya bʼaʼnteq tuʼn t-xi kyloʼn? Tuʼn anjel mya bʼaʼn, aju Satanás tbʼi tuʼn Tyol Dios. Ax ikx ntjyoʼm tumel tzeʼn tuʼn qok qkyaqilx te mya bʼaʼn.

Jun maj, tzaj tmaʼn Jehová te Enoc tuʼn t-xi tqʼamaʼn jun tqanil kye xjal aju nyatoq kyaj tuʼn tok kybʼiʼn, a jlu xi tqʼmaʼn kye: ‹Kpol jun qʼij jatumel ok chi kbʼel tnajsaʼn Dios xjal mya bʼaʼn kybʼinchbʼen›. E jawle qʼojli xjal tuʼn jlu. Kyajtoqlo tuʼn tkubʼ kybʼiyoʼn Enoc. Tuʼntzunjo, ilteq tiʼj tuʼn tten tipumal Enoc tuʼntzen t-xi tqʼamaʼn kye xjal aju tzultaq tiʼn Dios.

Mitiʼ xi tqʼoʼn Dios nim ambʼil tuʼn tanqʼin Enoc kyxol xjal lu. Oʼkx anqʼin 365 abʼqʼi. ¿Tiquʼn nxi qqʼmaʼn qa naq «oʼkx 365 abʼqʼi»? Tuʼnjo nimtoq kyipumal xjal ojtxe ex nimteq ambʼil nchi anqʼin. ¡Ikjo; ik seʼn Matusalén aju tkʼwal Enoc anqʼin 969 abʼqʼi!

Tej oteqxi kyim Enoc, nimkutl xjal mya bʼaʼn kybʼinchbʼen e ten. Chi Tyol Dios kyjalu: ‹Kukx nche ximantoq oʼkx tiʼj mya bʼaʼn›, ex noj twitz Txʼotxʼ tuʼn nim bʼiybʼel.

¿Nel tnikʼe tiquʼn nimxixtoq mya bʼaʼn nkubʼ kybʼinchan xjal toj ambʼil aju? Tuʼnjo kanet juntl ttxolil tuʼn Satanás tzeʼn tuʼn kykubʼ tsbʼuʼn xjal tuʼntzun tkubʼ kybʼinchen mya bʼaʼn. Qoʼ xnaqʼtzal tiʼj tiʼ ajbʼen tuʼn.