O TZAJ tqʼoʼn Dios tkyaqil tbʼanel qe. Kubʼ tbʼinchaʼn Qʼij tuʼn ttzaj tqʼoʼn spikʼun qe, ex kubʼ tbʼinche Xjaw kyukʼe cheʼw, tuʼn ttzaj tqʼoʼn chʼin spikʼin qe qonikʼen. Ax ikx kubʼ tbʼinchan Txʼotxʼ tuʼntzun qanqʼin twitz.

Nya a Qʼij, Xjaw, Txʼotxʼ ex qeʼ cheʼw e kubʼ tbʼinchen Dios tnejil. ¿Ajtzqiʼn tuʼne tiʼ bʼant tuʼn tnejil? Aqe xjal ik tzeʼn a. Mitiʼ nchi qil jlu, ik tzeʼnj mitiʼ nqlom Dios. Anjel kybʼi xjal lu tuʼn Tuʼjil Tyol. E kubʼ tbʼinchan Dios anjel tuʼn kyanqʼin tukʼel tuj kyaʼj.

Aju tnejil anjel kubʼ tbʼinchan Dios tbʼanelxixtaq. Atzun tnejil tKʼwal Diosju, ex aqʼunan tukʼe tTat. Onin tuʼn tbʼinchet txqantl tiʼchaq. Onin tuʼn tbʼinchet Qʼij, Xjaw, ex qeʼ cheʼw ax ikx tuʼn tbʼinchet Txʼotxʼ.

¿Tzeʼntaq Txʼotxʼ tnejil? Mi aʼlxtaq jun xjal jakutoq tzʼanqʼin twitz. Nojnetaq tkyaqil twitz Txʼotxʼ tuʼn aʼ. Atzunte Dios tajteq tuʼn kyanqʼin xjal twitz. Tuʼntzunjo, kubʼ tbʼinchen Txʼotxʼ tuʼn qanqʼin twitz. ¿Tiʼ bʼant tuʼn?

Tnejel, iltaq tiʼj tuʼn tul spikʼun twitz Txʼotxʼ, tuʼntzunjo, ul tiʼn Dios tqan Qʼij tibʼaj. Bʼent jlu tuʼn, tuʼn tten qʼij ex qonikʼen. El tiʼn Dios aʼ twitz Txʼotxʼ tuʼntzen tqʼanchaʼlix.

Tnejilku mitiʼxtaq at twitz txʼotxʼ, iktoq taʼ ik tzeʼn tilbʼilal tkubʼ tzala. Mitiʼqetaq bʼech, tzeʼ, nix qeʼ txkup (jil). Mitiʼqetaq kyiẍ toj aʼ. Nimtaq taqʼun Dios at tuʼntzun tten tbʼanel kyanqʼibʼil txkup ex xjal twitz Txʼotxʼ.