¡KAʼYINKA Txʼotxʼ! ¡Tbʼanelxix taʼ tkyaqil! Kiʼnke kʼul ex qeʼ tzeʼ, bʼech ex tkyaqil txkup (jil). ¿Ntila, mo ntlome jatumel tkubʼa ẍtun ttxaʼn (elefante) ex qeʼ león?

¿Jatumel tzaja tbʼanel najbʼil lu? Kelel qnikʼ tiʼj tzaʼn bʼaj tbʼinchen Dios Txʼotxʼ tuʼn qnajan twitz.

Tnejil, jaw chʼiy kʼul tuʼn Dios twitz Txʼotxʼ. Ax ikx e kubʼ tbʼinchen tkyaqil wiq tal tzeʼ ex nimaq tzeʼ. Tbʼanel oka twitz Txʼotxʼ tuʼn tkyaqil jlu. Nya oʼkxjo, ax ikx ntzaj kyqʼoʼn tzeʼ tbʼanel qloʼ.

Yajxitl e kubʼ tbʼinchaʼn Dios kyiẍ tuʼn kyanqʼin tuj aʼ, ex e kubʼ tbʼinchen pichʼ (chʼit, mo chyuʼj) tuʼn kylipan twitz kyaʼj. Ex e kubʼ tbʼinchen txʼyan, wiẍ ix chej; nimaq txkup ex tal txkup. ¿Ateʼ txkup ttxlaj tjaye? ¡Tbʼanelxix Dios tuʼnjo bʼant tkyaqil jlu tuʼn qe!

Tbʼent tkyaqil jlu tuʼn, kubʼtzun tbʼinchin Dios jun piẍ Txʼotxʼ tuʼn tok te tbʼanelxix. Edén tbʼi najbʼil lu ok tqʼoʼn. Tzʼaqlitoq ex tbʼaneltoq taʼ tkyaqil. Ex tajbʼiltaq Dios tuʼn tok tkyaqil twitz Txʼotxʼ, ik tzeʼnj tbʼanel najbʼil otaq bʼaj tbʼinchaʼn.

Keʼyinkuxe juntl maj tilbʼilal. ¿Nel tnikʼe tiʼ til Dios aju bʼajxtoq bʼent toj tbʼanel najbʼil lu? Qo xnaqʼtzal tiʼj.