QA AT jun xjal sul tjaye nim twaʼlil ex qa bʼiʼx xjapun twiʼ tiʼj tqul tjaye, ¿tiʼtzulo jaku txi t-ximiye? ¡Jun nimaq xjal jlu! E ten xjal toj jun ambʼil ik seʼn qe jlu twitz Txʼotxʼ. Ntzaj tyekʼen Xjan Uʼj qa anjelqetoq kytat nimaq xjal lu. ¿Tiquʼntzun bʼaj ikjo?

Naʼntza, noktaq tbʼinchen Satanás nim mya bʼaʼn kyiʼj xjal. Axtpe ikx nokteq tilil tuʼn, tuʼn kyok t-anjel Dios te mya bʼaʼn. Tej tbʼet ambʼil, e ok ten junjun anjel bʼil tyol Satanás. Kyaj kytzaqpiʼn kyaqʼun aju otaq txi tqʼoʼn Dios kye toj kyaʼj. E kuʼtz twitz Txʼotxʼ ex kubʼ kybʼinchen kyxmilal ik tzeʼnj kye xjal. ¿Nel tnikʼe tiquʼn?

Ntzaj tqʼamaʼn Tyol Dios qa tuʼnjo tzaj kykiʼn qeʼ tbʼanel xuʼj twitz Txʼotxʼ ex qa kyajtaq tuʼn kyanqʼin kyukʼil. Tuʼntzunjo, e kuʼtz twitz Txʼotxʼ ex e mojeʼ kyukʼe xuʼj lu. Ntzaj tqʼmaʼn Tuʼjil Tyol Dios qa mya bʼaʼnju bʼant kyuʼn, tuʼnjo kubʼ tbʼinchen Dios qeʼ anjel tuʼn kyanqʼin toj kyaʼj.

Tej kyul itzʼje kykʼwal anjel lu kyukʼe kyxuʼjel, nya ikqetaq kykʼwaʼl ik tzeʼn kykʼwal xjal twitz Txʼotxʼ. Tej neʼqetoq (neʼẍqetoq) mitiʼxix el nikʼ kyiʼj. Tejtzun kychʼiy kʼwaʼl lu, e ok te nimaq xjal ex nimxix kyipumal ten.

Nya bʼaʼnqetoq nimaq xjal lu. Tuʼnjo nimtaq kywaʼlil ex nimtoq kyipumal, noktaq kybʼinchan mya bʼaʼn kyiʼj xjal. Ex noktaq kychqʼoʼn (obligar) qe xjal tuʼn kyok te mya bʼaʼn ik tzeʼnj kye.

Tej otaq kyim Enoc, ten juntl tbʼanel xjal twitz Txʼotxʼ. Noé tbʼi. Kukx kubʼ tbʼinchen tkyaqiljo tzaj tqʼmaʼn Dios te.

Jun maj, xi tqʼamaʼn Dios te Noé qa otaq pon ambʼil tuʼn kykubʼ tnajsaʼn kykyaqil xjal mya bʼaʼn. Atzunte Noé oktaq kjel klet tuʼn Dios kyukʼe toj tja ex nim txkup. Qoʼ xnaqʼtzal tiʼj tzeʼn tena tuʼn.