KAʼYINKUXA qeʼ tilbʼilal. Ntzaj kyyekʼin qejo kʼixbʼisabʼil tzaj tqʼoʼn Jehová tibʼaj tnam Egipto. Toj tnejel tilbʼilal, lu Aarón nkubʼ tjubʼin nimaʼ Nilo tukʼe ttzeʼ. Oktzun nimaʼ te chikʼ, ex e kyim qeju kyiẍ ateʼkux tuj, tzuwix, mo tzujix, aʼ tuʼn jlu.

Tbʼajlenxi jlu, e jatz woʼ, mo xtxʼo (ẍal), tuʼn Jehová toj aʼ Nilo. Atqeʼkxtoq jatumel nokx tzqʼajset pan, jatumel nkubʼ xyoqʼet tqʼotjil pan, ax ikx kywiʼ watbʼil ex naq jaʼxku tumel. Tejtzen kykyim woʼ, e kubʼ kychʼuqbʼaʼn (kypoybʼaʼn) aj Egipto, ex tzuwix toj tnam tuʼn.

Kubʼtzun tjubʼen Aarón txʼotxʼ tukʼe ttzeʼ, jaw chitj quq ex ok jlu ik tzeʼn qe tal us. Atzun toxin kʼixbʼisabʼil jlu.

Mitiʼ tzaj mya bʼaʼn kyibʼaj aj Israel kyuʼn txqantl kʼixbʼisabʼil, oʼkxix kyibʼaj aj Egipto. Nimaq usqeʼ (aʼjinqeʼ) tkyajin kʼixbʼisabʼil tzaj ex e okx toj kyja aj Egipto. Atzen tjweʼyin kʼixbʼisabʼil e kyim txkup tuʼn. Nimxix kywakiẍ, kyrit, ex kychip aj Egipto e kyim.

Tbʼajlenxi jlu, jaw kychitun Moisés tukʼe Aarón jun jot (yubʼ) tzaʼj toj kyqʼiqʼ, el poqʼle txʼaʼk kyiʼj xjal ex kyiʼj txkup tuʼn jlu. Atzun twaqaqin kʼixbʼisabʼil jlu.

Tikʼlenxi jlu, jaw tiʼn Moisés tqʼabʼ twitz kyaʼj, tzajtzen tilen twitz kyaʼj ex tzaj tqʼoʼn Jehová saqbʼaqin. Atzun mas nimxix saqbʼaqun jlu tzaj tibʼaj Egipto.

Ajo twajxaqin kʼixbʼisabʼil tzaj, aju nimxix ẍplon, moqa ẍtʼiktuʼr (langostas). Mitiʼxi o ten nimxix ẍplon ik tzeʼn jlu. Bʼaj kywaʼn tkyaqilju kyaj tuʼn saqbʼaqen.

Aju tbʼeljajin kʼixbʼisabʼil tzaj, aju qlolj. Oxe qʼij kubʼ ten qlolj lu tibʼaj tnam, atzen kye aj Israel attoq spikʼun jatumel nchi anqʼina.

Tbʼaj tkyaqil jlu, xi tqʼmaʼn Dios kye aj Israel tuʼn tok kysuʼn tchkʼel jun tal rit, mo tal ẍneʼl, ttziʼ tlamel kyja. Ikʼtzun t-anjel Dios tibʼaj tnam Egipto. Tej ntilteq, moqa ntlomteq, anjel chikʼ ttzi tlamel ja, mitiʼtaq nkubʼ tbʼiyoʼn jun xjal toj ja lu. Qatzen mitiʼtoq ntil chikʼ, nkubʼtaq tbʼiyoʼn aju tnejel tkʼwaʼl xjal; ax ikx nkubʼtaq tbʼiyoʼn aju tnejel tal txkup. Atzun tlajajin kʼixbʼisabʼil jlu.

Tbʼajlenxi kʼixbʼisabʼil lu, e etz ttzaqpiʼn Faraón aj Israel, aqe jlu otaq bʼaj kybʼinchan kyten tuʼn kyetz, ex tojxjo qonikʼen aju i etz tuj tnam Egipto.