OTAQ pon Moisés jyol kywa t-rit tzmax twiʼ witz Horeb. Atz tzalu til, mo tlom, jun wiʼ tzeʼ nkʼent qʼaqʼ tiʼj. ¡Aju wiʼ tzeʼ lu mitiʼtoq nkubʼ tzʼeʼy!

¡Tiʼtzulo nbʼaj tzma chix! Chi Moisés. ‹Chin xel laqʼeʼye keʼyilte›. Tejtzun tpon laqʼeʼ, tbʼi jun tqʼajqʼojil wibʼaj atz jatumel taʼ wiʼ tzeʼ ex tqʼma: ‹Miʼn tzaj laqʼeʼya. Qʼiʼmele t-xajabʼa (t-xabʼe), quʼn xjan tembʼil jatumel tkubʼaye›. Jun anjel ajbʼen tuʼn Dios tuʼn tyolin, tuʼntzunjo, ok tmaqsiʼn (tjpuʼn) twitz Moisés.

Tzajtzen tmaʼn Dios te: ‹Ma wile yajbʼil kye xjal etzan wuʼne, aqeju ateʼ tuj Egipto. Ok che eletz wiʼne, ex kxel nsamaʼna tuʼn kyetz tiʼna toj Egipto›. Okteq kxel tiʼn Jehová ttnam toj tbʼanel txʼotxʼ te Canaán.

Xitzun tqʼamaʼn Moisés te Dios: ‹Mitiʼ weye woklen. ¿Tzeʼn jaku bʼant jlu wuʼne? Qatzun qa ma chinxe tzul kyqanin weʼye: ¿Alkye saj samaʼn teya? ¿Tiʼtzen kxel nqʼamaʼne kye?›

‹Atzun jlu kxel tmaʼne kye›, chi Dios te Moisés. ‹A JEHOVÁ aju tDios Abrahán, aju tDios Isaac ex aju tDios Jacob ma chin tzaj tsamaʼne kyukʼile›. Tzaj tqʼmaʼntl Jehová te kyjalu: ‹Atzun nbʼiye jlu te jumajx›.

‹Yejtzun qa miʼn ẍinx kynimane, qa miʼn ẍinx kybʼiʼne qa aya saj samante weye›.

‹¿Tiʼtzun qʼiʼn tuʼna tuj tqʼabʼa?› Chi Dios te.

‹Jun tzeʼ›, chi Moisés.

‹Xonkuya twitz txʼotxʼ›, chi Dios te. Tej tkubʼ t-xoʼn Moisés ttzeʼ twitz txʼotxʼ, ok te jun kan. Xitzun tyekʼin Jehová juntl techil te Moisés: ‹Qʼonkx tqʼabʼa toj t-xbʼalina›. Bʼant jlu tuʼn Moisés, tejtzen tetz tiʼntl tqʼobʼ, ¡saqtotl keʼyin ik tzeʼn ttxa cheʼw! Chʼixmi ik tzeʼn txʼaʼk otaq tzʼok noj tiʼj. Xitzun tqʼoʼntl Jehová tipumal Moisés tuʼn tbʼant toxin techil tuʼn. Aʼyejo techel lu, chi Jehová te Moisés: ‹Kʼonil kyiʼj aj Israel tuʼn tel kynikʼ qa aqine ẍinx saman teya›.

Yajxitl, ul meltzʼaj Moisés tja ex xi tmaʼn te Jetró: ‹Najsame, waje tuʼn waj meltzʼaje kyukʼil nxjalile ateʼ tuj Egipto, tuʼntzun kyok nkeʼyine tzeʼn ateʼqe›. Tuʼntzunjo, xi tqʼamaʼn Jetró te Moisés: ‹Chebʼe txiʼye›, kubʼtzun Moisés toj bʼe tuʼn tmeltzʼaj juntl maj Egipto.