AQE xinaq nche tlome, moqa nche tila, tzalu nchi ok kychaqʼoʼn xjal tuʼn kyaqʼunan. ¡Keʼyinka aju xjal nok tbʼiyoʼn jun aqʼunal tukʼe jun asyal! Aʼyeju xjal nchi aqʼunan tyajil Jacobqeʼ, aj Israel kybʼi tok. Aʼyejo xjal nok kybʼinchen mya bʼaʼn kyiʼj aj Israel te Egiptoqeʼ. Ma che ok aj Israel te kymajen. ¿Tiquʼn ikʼ jlu?

Nim ambʼil e anqʼin tyajil Jacob toj tzalajbʼil atz Egipto. Tuʼnjo chʼixme junxtaq toklen José tukʼe Faraón, ateq José nok xqʼuqin kye aj Israel. Tejtzun tkyim José. Ok juntl Faraón te ajkawil, aju nya tganeqetoq aj Israel.

Aju mya bʼaʼn ajkawil lu, e ok tqʼoʼn aj Israel te majen. Ax ikx e kubʼ tqʼoʼn mya bʼaʼn xjal te xqʼuqil kye. Aqejo xjal lu e ok ten chqʼol (obligar) qe aj Israel tuʼn kyaqʼanan nim, tuʼntzun tbʼant nimaq tnam kyuʼn te Faraón. Atzun kye aj Israel kukx chmet nim kybʼet. E jaw xobʼ aj Egipto tej t-xi kyximin qa jakutoq chmet nimxix kybʼet aj Israel ex qa jakuteq ten nimxix kyipumal.

¿Bʼiʼn tuʼne tiʼ bʼent tuʼn Faraón? Yolin kyukʼe xuʼj aqeju nchi onintaq tuʼn tul itzʼje kyal xuʼj te aj Israel, ex xi tqʼmaʼn kye: ‹Iltiʼj tuʼn tkubʼ kybʼiyoʼne qeʼ tal qʼa aj kyul itzʼj›. Tbʼanelqetaq xuʼj lu, ex mitiʼ kubʼ kybʼiyoʼn qejo tal qʼa.

Tuʼntzunjo, xi tqʼamaʼn Faraón kawbʼil lu kye kykyaqil t-xjalil: ‹Kybʼiyonkuye kykyaqil tal qʼa te aj Israel. Oʼkx qe tal txin kyqʼonkje ambʼil kye tuʼn kyanqʼin›. Mya bʼaʼnju kawbʼil lu. Qo xnaqʼtzal tiʼj tzeʼn tten kyaj anqʼin jun tal qʼa.