AʼYEJO kabʼe qʼa ateʼkux toj tilbʼilal lu, nya junx kymod. ¿Bʼiʼn tuʼne tiʼ kybʼi qejo qʼa lu? Esaú tbʼijo qʼiʼn xobʼil plech tuʼn, atzenjo nxqʼuqin kyiʼj rit, mo ẍneʼl, Jacob tbʼi.

A Esaú ex Jacob tkʼwal Isaacqeʼ tukʼe Rebeca. Kʼujlaʼnxixtaq Esaú tuʼn Isaac tuʼnjo tbʼanel jyol txkuptoq ex ntzajteq tiʼn te kychiʼ toj tja. Atzun te Rebeca kʼujlaʼnxixtaq Jacob tuʼn, tuʼnju manstoq.

Tej itzʼxteq Abrahán aju kychman Esaú tukʼe Jacob, nimxixtoqle tajbʼil Jacob tuʼn tok tbʼiʼn tyol Abrahán tej nyolintaq tiʼj Jehová. Qʼiʼntaq 175 abʼqʼi tuʼn Abrahán tej tkyim, tej qʼiʼntaq 15 abʼqʼi kyuʼn yuẍ (yoʼẍ).

Iqʼintaq 40 abʼqʼi tuʼn Esaú tej tkubʼ mojeʼ kyukʼe kabʼe xuʼj te Canaán. Tzajxix tbʼis Isaac ex Rebeca tuʼn jlu, tuʼnjo mitiʼteq nchi ajbʼen xuʼj lu te Jehová.

Pontzun jun qʼij, jatumel nim jaw qʼojle Esaú tukʼe Jacob tuʼn jun mya bʼaʼn tzaj kyxol. Ex pon ambʼil tuʼn tkubʼ tkʼiwlaʼn Isaac aju tnejel tkʼwaʼl. Nayontaq Esaú tuʼn ttzaj tkʼamoʼn kʼiwlabʼil tuʼnju atoq tnejel kʼwal. Otaqxi txi tkʼayin Esaú aju toklen tuʼn ttzaj tkʼamoʼn kʼiwlabʼil te Jacob. Ax ikx, tej kyul itzʼji kabʼe qʼa lu, otaqxi tzaj tqʼamaʼn Dios qa ateq Jacob tzul kʼamonte kʼiwlabʼil. Ikxix bʼajjo. Xi tqʼoʼn Isaac kʼiwlabʼil te Jacob.

Tejtzun tok tbʼiʼn Esaú jlu jaw qʼojle tukʼe Jacob. Tqʼma qa kʼwelteq tbʼiyoʼn Jacob, tuʼnjo otaq tzajxix tqʼoj. Tej tok tbʼiʼn Rebeca jlu tzaj bʼajxix tkʼuʼj tuʼn. Tuʼntzunju, xi tqʼmaʼn Rebeca te tchmil: ‹Melayxlo tzikʼx wuʼne qa ma kubʼ mojeʼ Jacob tukʼil jun xuʼj kyxol qeju najle qeʼ tzalu tuj Canaán›.

Tuʼntzenjo, tzaj ttxkoʼn Isaac Jacob aju tkʼwaʼl ex xi tqʼamaʼn te kyjalu: ‹Miʼn mojeʼya tukʼil jun xuʼj aj Canaán. Txiʼya tuj txʼotxʼ Harán, tzma tja tchmana Betuel, ex mojeʼya tzma chixi tukʼil jun tmeʼjel Labán›.

Kubʼ tbʼinchen Jacob ik tzaʼnj tzaj tqʼamaʼn ttat te, ex kubʼ toj bʼe tuʼn tpon tzma Harán jatumel nchi anqʼinatoq t-xjalil.