¿AJTZQILAʼN tuʼna alkye qeju xjal nchi yolin tukʼe Jacob? Otaqxi bʼet Jacob nim qʼij, ateʼkutaq xjal lu ttxlaj jun xoch. Nchi xqʼuqintoq kyiʼj kyrit. Xi tqanin Jacob kye: ‹¿Jatum tzajni qeye?›

Xi kytzaqʼweʼn xjal kyjalu: ‹Aj Harán qoʼye›.

Xi tqanintl Jacob kye: ‹¿Ojtzqiʼnpe Labán kyuʼne?›

Ojtzqiʼn quʼne, che chi. ‹Keʼyinxa, lu Raquel aju tmeʼjel Labán tzul kyukʼix t-ẍneʼl›. ¿Ntlome, moqa ntile, Raquel lu chʼixtl tul laqʼe?

Tej t-xi tkiʼn Jacob Raquel qʼinqe t-rit Labán tuʼn, aju t-xibʼin tnan Jacob, xiʼ ex el tiʼn abʼj ttzi xoch tuʼntzun kykʼan rit tiʼj aʼ. Ex el ttzʼubʼin (tmaʼtzin) Jacob Raquel ex xi tqʼamaʼn te alkyeteq. Jaw tzalajxix Raquel tej tok tbʼiʼn, ex xiʼnaj tja ex xi ttxʼolbʼaʼn te ttat aju otaq bʼaj.

Jaw tzalajxix Labán tej tok tbʼiʼn qa ok kjel tentaq Jacob tja. Atzen tej t-xi tmaʼn Jacob qa tajteq tuʼn tkubʼ mujeʼ tukʼe Raquel, jaw tzalaj Labán tuʼn jlu. Tuʼntzunjo, xi tqʼamaʼn te Jacob tuʼn taqʼunan wuq abʼqʼi toj tkojbʼil tiʼj Raquel. Bʼant jlu tuʼn Jacob, tuʼnju kʼujlaʼnxixtoq Raquel tuʼn. Atzun tej tpon ambʼil tuʼn kymojeʼ, ¿bʼiʼn tuʼne tiʼ tzaj?

Mitiʼtl xi tqʼoʼn Labán Raquel tuʼn tok te t-xuʼjil Jacob, atl Lea xi tqʼoʼn aju ttzik Raquel. Tej tkyaj bʼant juntl maj tiʼj tyol Jacob tukʼe Labán tuʼn taqʼunan juntl wuq abʼqʼi, ax ikx xi tqʼoʼn Labán Raquel te t-xuʼjil Jacob. Toj ambʼil aju, ntzajteq tqʼoʼn Dios ambʼil kye xinaq tuʼn tten kabʼe mo mas kyxuʼjel. Atzun jaʼlo, ik tzaʼnj ntzaj tyekʼen Tuʼjil Tyol Dios, junx t-xuʼjil jun ichin ktel.