¡KEʼYINKA nim tbʼis kuʼxin ma tzaj ex mitiʼ jun qʼuqbʼil tkʼuʼj! Atzun José jlu. Tzma nxi kʼayin kyuʼn ttzik kye qeju xjal lu, aʼyejo ma cheʼx Egipto. Kokil José te majen kyuʼn tzma chix. ¿Tiquʼn ma tzʼok kybʼinchen ttzik José mya bʼaʼn tiʼj? Tuʼnju ikʼon twitz kyuʼn.

Kʼujlaʼnxixtaq José tuʼn Jacob. Tuʼntzunjo, kubʼ tbʼinchen jun t-xbʼalin tbʼanel ex nim tqan. Tej tok kykaʼyin ttzik José aju tkʼujlabʼil Jacob tiʼj, e ok ten qʼojel ex el kyikʼon José. Ax ikx at juntl tiquʼn el kyikʼen.

Ok kabʼe twitzikʼ José. Kyoj qeju twitzikʼ lu in chi kubʼtaq ẍmejeʼ ttzik twitz. Mastl el ikʼon José kyuʼn ttzik tej t-xi tqʼamaʼn twitzikʼ kye.

Jun qʼij, tej nchi xqʼuqinteq ttzik José kyiʼj t-rit Jacob aju kytat, xi tmaʼn Jacob te José tuʼn t-xiʼ kil qe, moqa kaʼyil qe, ttzik qa bʼaʼntoq ateʼ. Tejtzun t-xi kykeʼyin ttzik José chʼinxtaq tpon, atqeʼ junjo kyqʼama: ‹¡Qbʼiyonku!› Atzunju tnejel kʼwaʼl Rubén tbʼi, tqʼama: ‹¡Miʼn, miʼn kybʼinchaye aju!› Mas bʼaʼn ela toj kywitz tuʼn tkux kyqʼoʼn José toj jun jul. E kubʼtzun ten ximil tiʼtaq tuʼn tbʼant kyuʼn tiʼj José aju kyitzʼin.

Toj ambʼil aju nchi ikʼtaq aj Ismael atztzu. Xi tqʼamaʼn Judá kye terman: ‹Qkʼayinx kye aj Ismael›. Kubʼtzun kybʼinchen ikjo. ¡Xi kykʼayin José tuʼn 20 saq pwaq! ¡Mya bʼaʼnju kubʼ kybʼinchen ex mitiʼ tzaj qʼaqʼin kykʼuʼj tiʼj!

¿Tiʼ kxel kymaʼn te kytat? Kubʼ kybʼyoʼn jun chip (chiv) ex kux kyqʼoʼn nim maj aju tbʼanel t-xbʼalun José toj tchikʼel chip lu. Xitzun kyiʼn t-xbʼalin José te Jacob ex xi kyqʼmaʼn te. ‹Ma kanet jlu quʼne. Keʼyinke, qa a t-xbʼalun Joséju›.

El tnikʼ Jacob tiʼj ex tqʼma: ‹Atlo jun txkup o bʼaj chyonte José›. Axixtzun kyajbʼiltoq ttzik Joséjo tuʼn t-xi t-ximen kytat. Tzajxix tbʼis Jacob tuʼn jlu. Kubʼ ten Jacob nim qʼij oqʼil. Atzunte José nyatoq kyimne taʼ. Atzun jaʼlin qo xnaqʼtzal tiʼ bʼaj tiʼj José toj tnam jatumel pona.