TIKʼLENXI nim jbʼal ateʼ qeʼ xjal i eʼx anqʼil toj jun tembʼil Ur tbʼi. Ok Ur te jun tnam nimxix toklen kyukʼe tbʼanel ja ateʼtaq toj. Aʼyetzun xjal nchi anqʼintoq tuj tnam lu, nchi kʼulintaq twitz junjuntl dios. Axjo nbʼantteq kyuʼn xjal te Babel. Nya ikqetoq xjal te Ur ex Babel ik tzeʼn Noé tukʼe Sem aju tkʼwaʼl, aʼyejo kukx e ajbʼen te Jehová.

Tikʼlenxi 350 abʼqʼi tej otaqxi tzikʼ nim jbʼal, kyimju jiqon xjal Noé tbʼi. Tikʼxi kabʼetl abʼqʼi ul itzʼje xjal aju nkubʼ tkeʼyina tuj tilbʼilal. Aju xjal lu tbʼanelxixtoq nela tuj twitz Dios. Abrahántaq tbʼi. In nanqʼintaq tuj tnam Ur kyukʼe toj tja.

Jun qʼij xi tmaʼn Jehová te Abrahán: ‹Kutetza tuj ttname, kyxol qe t-xjalila ex tuj tja tmana, ex txiʼya tuj txʼotxʼ kxel nyekʼune teya›. ¿Bʼantpetzele tuʼn Abrahán ik tzeʼnj tzaj tqʼamaʼn Dios te ex kyajpetzulo tqʼoʼn tkyaqil tbʼanel attaq tuj Ur? Bʼant ikjo tuʼn. Tuʼnjo kukx nokx tbʼiʼntaq Abrahán Dios, ok te tamiw Dios.

Chʼixme kykyaqil tuj tja Abrahán e etz tukʼe toj tnam Ur. Etz Taré aju ttat. Ax ikx etz tsobrin Abrahán aju Lot tbʼi. Ex tukʼe Sara aju t-xuʼjel. Tej tbʼet ambʼil kykyaqil e pon tuj tembʼil aju Harán tbʼi, ex kyimtzun Taré atz toj Harán. Najchaq atqeʼtoq tiʼj Ur.

Yajxitl etz Abrahán kyukʼe toj tja atz tuj Harán ex e pon toj txʼotxʼ Canaán tbʼi. Atz xi tqʼamaʼn Jehová te: ‹Atzun txʼotxʼ lu kxel nqʼoʼne kye tyajila›. Kyaj ten Abrahán tuj Canaán ex anqʼin tuj xbʼalun ja.

Ok ten Dios onil tiʼj Abrahán ex tentzun nim t-ẍneʼl ex txqantl wiq talin (ttxkup) ex e ten nim tmajen. Atzunte Abrahán mitiʼtoq otaq tzul itzʼj jun tkʼwaʼl tukʼe Sara.

Tej tjapun Abrahán toj 99 abʼqʼi, xi tqʼmaʼn Jehová te: ‹Aju yol kjel bʼant tiʼj wuʼne tukʼila, atzun jlu, kʼokela te kyman nimku nasyon›. Tuʼnjo otaq chi tijen Abrahán tukʼe Sara tuʼn tten jun kykʼwaʼl, ¿tzeʼn tten jaku japunbʼaj twiʼ yol lu?