MA TZIKʼ kabʼe abʼqʼi, ex kukx jupuʼnkx José pres. Menaʼmx ttzaj tnaʼn qʼol tkʼaʼ Faraón José. Jun qonikʼen ok kabʼe twitzikʼ Faraón nim kyoklen, ex ok ten ximil kyiʼj tiʼ kyxilen jlu. ¿Ntile, mo ntlome, lu njtan? Tejtzun qsqix tzaj ttxakoʼn Faraón qeʼ ajnabʼil ex xi tqʼamaʼn kye aju otaq tzʼok twitzkʼaʼn. Atzun kye mitiʼx bʼant tuʼn t-xi kyqʼamaʼn tiʼ kyxilen qejo witzikʼ lu.

Atzun jaʼle, ma tzaj naʼn José tuʼnjo qʼol tkʼaʼ Faraón. Ex xi tqʼamaʼn te Faraón kyjalu: ‹Tej jupuʼnteq qine attoq jun xjal aju nbʼanttaq tqʼamet tuʼn tiʼ kyxilen witzikʼj›. Tuʼntzunjo, Xi tmaʼn Faraón tuʼn tetz qʼin José pres.

Xi ttxʼolbʼaʼn Faraón qeʼ twitzikʼ te José: ‹E wile, moqa nlome, wuq wakẍ tbʼanelqetoq ex nimteq kychibʼjal. Ax ikx wile wuqtl wakẍ okni kyiʼj, mo mitiʼtaq kychibʼjal. Aʼyeju wakẍ okni kyiʼj xe kywaʼn qeju wakx nim kychibʼjal.

‹Toj tkabʼ nwitzikʼe wile wuq tqʼobʼ triw nojnitaq kyiʼj tuʼn kywitz, tbʼanilxix che keʼyin ex in che chʼiytoq tiʼj junx tqan. Ax ikx nlomtle, moqa wiltle, wuq tqʼabʼ triw chʼin kywitz, ex otaq chi tzqij. Atzun qeʼ wuq tqʼobʼ triw chʼin kywitz, e ok ten waʼl kye qeju wuq tqʼabʼ triw tbʼanilqeteq›.

Xi tqʼamaʼn José te Faraón: ‹Aqe kabʼe twitzikʼa lu junx kyxilen. Aqejo wuq wakẍ nim kychibʼjal ex aqeju wuq tqʼabʼ triw nim kywitz; wuq abʼqʼi kyxilen jlu, atzun qeju wuq wakẍ okni kyiʼj ex qejo wuq tqʼobʼ triw mitiʼxix kywitz; wuq abʼqʼi kyxilen jlu. Ktel wuq abʼqʼi jatumel kjawil chmet nim twitz awal toj Egipto. Ex ktel wuqtl abʼqʼi jatumel tzul waʼyij›.

Tuʼntzunjo, xi tqʼamaʼn José te Faraón kyjaʼ: ‹Skʼonktza jun xinaq at tnabʼl ex qʼmanxa te tuʼn tjaw tchmoʼn twitz awal kyoj qeju wuq tbʼanel abʼqʼi. Tuʼntzen miʼ kykyim xjal tojtljo wuq abʼqʼi waʼyij tzul›.

Tbʼanel ela xim lu tuj twitz Faraón. Jawtzun tskʼoʼn Faraón José tuʼn t-xi tkʼuʼn twitz awal. Nimxix toklen José ok, chʼixme ik tzeʼnj te Faraón toj tnam Egipto.

Tikʼlenxi wajxaq abʼqʼi, tzaj waʼyij, tujtzun jun qʼij, til José txqan xinaq chʼixtaq kypon. ¿Ajtzqiʼn tuʼne alkyeqeʼ? ¡Aqetzen 10 ttzikjo! A Jacob saj saman kye tuj Egipto tuʼnjo chʼinx tkubʼaj kywa tzmax toj tnam Canaán. El tnikʼ José kyiʼj ttzik, atzun kye mitiʼ el kynikʼ tiʼj. ¿Nel tnikʼe tiquʼn? Tuʼnjo ma chʼiy José ex junxitl t-xbʼalun tok.

Tzaj tnaʼn José twitzikʼ tej kʼwaʼlxtaq, aju nchi kubʼtoq ẍmejeʼ ttzik twitz. ¿Naʼnx tuʼne tej t-xnaqʼtzane tiʼj jlu? Tuʼntzunju, el tnikʼ José qa a Dios tzaj samante Egipto, tuʼn tbʼinchet aju bʼaʼn. ¿Tiʼtzule bʼant tuʼn José? Qo xnaqʼtzal tiʼj.