¡KIʼNKE tiʼ nkux tmuquʼn xjal toj tja! Jun tbʼanel xbʼalin, jun piẍ qʼan pwaq ex junjun saq pwaq. Ma tzʼetz tiʼn jlu tuj Jericó. ¿Naʼnx tuʼne tiʼtaq tuʼn tbʼant kyukʼe qejo tiʼchaq lu?

Iltaq tiʼj tuʼn kykubʼ najset jlu, ax ikx iltoq tiʼj tuʼn kykux qʼet qʼan pwaq ex saq pwaq toj tqʼinumabʼil tja Jehová. Aʼyejo xjal lu mitiʼ okx kybʼiʼn tyol Jehová. Ma kubʼ kyelqʼaʼn Dios. Acán tbʼi xjal lu, ex aqejo ateʼ tukʼil aʼyetzen tuj tjaju. Qo xnaqʼtzal tiʼj tiʼ bʼaj.

Tej otaqxi tzʼetz telqʼaʼn Acán jlu, i ex tsamaʼn Josué qe xinaq qʼojel tiʼj tnam Hai. Mixtiʼ e kambʼan tiʼj tnam Hai. At junjun kyim, aqetzen txqantl i el oq. Tzajxix tbʼis Josué tuʼn jlu. Kubʼ takl tibʼaj twitz, twitz txʼotxʼ ex xi tqʼamaʼn te Jehová: ‹¿Tiquʼn ntzaj tqʼoʼna ambʼil tuʼn tikʼ jlu?›

Tzaj ttzaqʼweʼn Jehová: ‹¡Weʼktza! Ma che bʼinchan aj Israel il. Ma tzaj kyiʼn junjun tiʼxti aju attoq tuʼn kynaj mo tuʼn kyxiʼ qʼet tuj tja Dios. Ma tzaj kyelqʼaʼn jun tbʼanel xbʼalun tuj ewaj. Mlay chin tentle kyukʼele tzmaxi aj tkubʼ kynajsaʼne aju xbʼalen ex aju xjal ma txi telqʼaʼn qeju tiʼchaq lu›. Tzaj tmaʼn Jehová qa ok kxel tyekʼe te Josué alkyeju xjal mya bʼaʼn.

Oktzen tchmoʼn Josué kykyaqil aj Israel, ex tzaj tyekʼin Jehová aju xjal mya bʼaʼn, ateq Acán. Tzajtzun tqʼmaʼn Acán: ‹Ma chin bʼinchane il. Wile jun tbʼanel xbʼalun, tukʼex jun piẍ qʼan pwaq ex tukʼex junjun saq pwaq. Tzaj nganiye kyiʼj qe jlu ex e tzaj wiʼne. Luqe ma chi kux nmuquʼne toj njaye›.

Tej kykanet qejo tiʼchaq lu ex tej kypon qʼiʼn twitz Josué, xi tqʼmaʼn Josué te Acán: ‹¿Tiquʼn ma tzaj tiʼna mya bʼaʼn qibʼaje? ¡Jaʼletzun kbʼel tzʼaq mya bʼaʼn tibʼaje tuʼn Jehová!› Kykyaqiltzun xjal ok kyxoʼn abʼj tiʼj Acán ex kyiʼj qe toj tja tzmaxi tej kykyim. ¿Tiʼ ntzaj tyekʼin jlu qe? Qa mya bʼaʼn tuʼn tikʼ qiqʼen aju nya qe.

I eʼx juntl maj aj Israel qʼojel kyiʼj Hai. E kambʼantze tuʼnjo e tzaj tonin Jehová.