¡KAʼYINXE! ¡Luqe aj Israel in che bʼet toj nimaʼ Jordán! Mitiʼtl aʼ tuj, ¿jatumel ma pone aʼ? Nojnetaq nimaʼ lu, tuʼnjo in kubʼteq nim jbʼal tuj ambʼil aju. ¡Tkyaqil aʼ ma kubʼ naj! ¡Atzen kye aj Israel in che bʼet toj nimaʼ Jordán tibʼaj tzqij txʼotxʼ, ikxix tzeʼnj tej kyikʼtz tuj mar Rojo! Qo xnaqʼtzal tiʼj jaʼ ma txiʼ tkyaqilju aʼ lu.

Tej tpon ambʼil tuʼn kyikʼx aj Israel tuj nimaʼ Jordán, tzaj tqʼamaʼn Jehová jlu te Josué tuʼn t-xi tmaʼn kye aj Israel: ‹Aqeju pal iltiʼj tuʼn tjaw kyiqen kajon kʼubʼel yol kyaj bʼant tiʼj ex tuʼn kykubʼ nej qwitz. Ajtzun tkux kyqʼoʼn kyqan pal tuj nimaʼ Jordán, ok kjel weʼ aʼ›.

Tuʼntzunjo, jaw kyiqen pal kajon kʼubʼel ley ex e kubʼ nej kywitz qe xjal. Tej kypon ttzi nimaʼ Jordán e kuʼx pal tuj aʼ. Nim in bʼettoq aʼ ex nimtoq t-xeʼ. Tejtzen tkux kyqʼoʼn kyqan toj aʼ bʼiʼx kyaj weʼ naj aʼ. ¡Naq tuʼn tipumal Jehová otaq bʼent jlu! Kyaj weʼ aʼ jawni, ex kubʼ tzqij jatumel e ikʼx qe aj Israel.

E ikʼx qeju pal aʼyejo iqin kajon kyuʼn ex e kyaj ten tuj tmij (tkyʼajchaqil) aʼ. Luqe ateʼkux tuj tilbʼilal. ¡Tej ateʼkuxtaq atztzu, kykyaqiltzen aj Israel e ikʼx toj nimaʼ Jordán tuj tzqij txʼotxʼ!

Tej kyikʼx kykyaqil, tzaj tqʼamaʼn Jehová te Josué tuʼn t-xi tmaʼn kye kabʼlaj xinq nim kyipun: ‹Kyikʼxe tuj tmij nimaʼ Jordán twitz kajon kʼubʼel yol kyaj bʼant tiʼj. Ex teyele te junjun kyeye kyqʼintze 12 abʼj ex kyqʼonkuye jatumel qo kjel qkyaqil toj qonikʼen jaʼlo. Ajtzun ttzaj kyqanen kykʼwaʼle tuj ambʼil tzul tiʼ kyxilen qeju abʼaj lu, oktzun kxel kyqʼamaʼne kye qa kyaj weʼ nimaʼ Jordán tej tikʼx ajo kajon kʼubʼel tley Dios. ¡Aʼyeju abʼj lu tzul tnaʼn kyeye aju bʼant tuʼn Jehová!› Ax ikx te Josué kubʼ tchʼuqbʼaʼn kabʼlaj abʼaj jatumel otaq chi kubʼ ten qe pal tuj nimaʼ.

Xitzun tqʼamaʼn Josué kye pal: ‹Ku kyjatze tuj nimaʼ Jordán›. Tej tbʼent jlu kyuʼn, oktzen ten juntl maj aʼ bʼetel.