MA TZIKʼ nim abʼqʼi... ¡ma tzikʼ 10, 20, 30, 39 abʼqʼi! Atzun kye aj Israel kukx ateʼ toj tzqij txʼotxʼ. Toj tkyaqil ambʼil lu, ok t-xqʼuqin Jehová ttnam. E tzaj tkʼaʼchin tukʼe maná. Te qʼij, tzaj tyekʼin kybʼe tukʼe chʼin muj, atzun tuj qonikʼen tzaj tyekʼin kybʼe tukʼe tqan qʼaqʼ. Mitiʼ kubʼaj kyxbʼalun ex mitiʼ chyon kyqan.

Atzen tnejel xjaw jlu tiʼj abʼqʼi 40, atxix tej kyetzlen aj Israel toj Egipto. Atqeʼ juntl maj tuj txʼotxʼ te Qadés. Ma tzikʼ chʼixme 40 abʼqʼi atxix tej kyxi samaʼn 12 xjal kaʼyil txʼotxʼ te Canaán tej ateʼtaq tzalu. Atz Qadés kyim Míriam, aju tanabʼ Moisés. At nim mya bʼaʼn tzalu, ik tzeʼnj tnejilku.

Mitiʼ kanet aʼ kyuʼn xjal. E jaw yolin ex xi kyqʼamaʼn te Moisés: ‹Maswitle bʼaʼn noqwit bʼiʼx o kyime. ¿Tiquʼn o etz tiʼna tuj Egipto tuʼn qul tiʼna tuj tembʼil lu puro xobʼajil? Mintiʼ chʼin qawal bʼaʼn tuʼn tkux qawaʼn; mintiʼ tqan higo, mintiʼ tqan uva, mintiʼpe aʼ te qkʼaʼ (qkʼwaʼ)›.

Tej t-xiʼ Moisés ex Aarón naʼl Dios tuj ja xbʼalun, tzaj tqʼmaʼn Jehová te Moisés: ‹Chmoʼnka tnam xjal, qʼmanxa te pik kywitz kykyaqil tuʼn tetz aʼ tuj, ex kʼeletztzun aʼ tuj pik lu tuʼn kykʼan tnam xjal kyukʼix kyalun›.

Bʼajtzun tchmoʼn Moisés xjal ex xi tqʼamaʼn kye: ‹¡Kybʼintze, aqeye xjal mibʼan che bʼine! ¿Maj iltiʼj tuʼn tetz qiʼne aʼ tuj pik lu te kykʼaʼye?› Oktzun tjubʼin Moisés pik kabʼe maj tukʼe ttzeʼ, ex etztzun chitj nimxix aʼ toj pik lu. Nimxixtzen aʼ ten kye kykyaqil xjal ex kye kykyaqil qe kyalun.

Tzajtzun tqʼoj Jehová tiʼj Moisés ex tiʼj Aarón. ¿Nel tnikʼe tiquʼn? Tuʼnjo xi tqʼmaʼn Moisés ex Aarón qa aʼye otaq chi etz qʼinte aʼ toj pik. Nya ikju, quʼn a Jehová otaq tzʼetz qʼinte aʼ. Tuʼnju mitiʼ xi kyqʼamaʼn Moisés tukʼe Aarón aju axix tiʼj aʼ, tzaj tqʼmaʼn Jehová qa kbʼel tqʼoʼnteq kykastiw. ‹Mlay che okx kyiʼne qe xjal tuj txʼotxʼ te Canaán›, chi Jehová kye.

I etztzun aj Israel toj txʼotxʼ Qadés. Ex tuj chʼin ambʼil e pon twiʼ witz Hor. Atz kyima Aarón twiʼ witz lu. Qʼiʼntoq 123 abʼqʼi tuʼn tej tkyim. Tzajxix nim kybʼis aj Israel tuʼn jlu, ex i kubʼ ten oqʼel 30 qʼij tiʼj Aarón. Atl Eleazar aju tkyʼajal Aarón ok te nejenel kye pal kyxol aj Israel.