¿OJTZQIʼN tuʼna tiʼ tajbʼen ja lu? Jun tbʼanel ja jlu te nimbʼil te Jehová. Ja xbʼalun tbʼi jlu. Bʼaj kybʼinchan aj Israel toj junx abʼqʼi tej otaqxi che etz tuj Egipto. ¿Bʼiʼn tuʼna alkye kubʼ ximente jlu?

A Jehová kubʼ ximente. Tej atztaq taʼ Moisés twiʼ witz Sinaí, tzaj tqʼamaʼn Jehová te alkyetoq tumel tuʼn tkubʼ kybʼinchen ja, aju jakuteq kubʼ xitit ex aju jakutoq kubʼ bʼinchet juntl maj, tuʼntzen nya kwest tuʼn t-xi kyiʼn tuj juntl plaj tzqij txʼotxʼ. Tuʼntzunjo, tej ncheʼxtoq aj Israel tuj juntl plaj nxi kyiʼntaq kyukʼil.

Ntila, mo ntlome tal kwart aju tokx kajon toj. Aju kajon lu, atzun kʼubʼel yolju kyaj bʼant tiʼj. Tkubʼtaq kabʼe anjel qʼan pwaq kytxʼotxʼil tibʼaj kajon. Kubʼ ttzʼibʼen Dios juntl maj qe Lajaj Tkawbʼil twitz tzʼlom abʼj, tuʼnjo oteq kubʼ tbʼuchin Moisés aqeju tnejel. Aqejo abʼaj lu e kux kʼuʼn toj kajon lu. Ax ikx kux kʼuʼn jun xar maná tuj. ¿Naʼnx tuʼne tiʼ aju maná?

Jaw tskʼoʼn Jehová Aarón aju titzʼin Moisés tuʼn tok te tnejel pale. A kubʼ nej kywitz aj Israel tuʼn kykʼulin te Jehová. Ax ikx qe tkʼwal e ok te pal.

Atzun jaʼle keʼyinxe aju kwart mas matij. Kabʼe majlo tal kwart tiʼj. ¿Ntile aju tal kajon jatumel njatz sibʼ? Atzun tembʼil jlu jatumel nkubʼ kypaten qe pal kʼokjsabʼil. Ax ikx kinxe, mo kaʼyinxa aju kandil, at wuq tspikʼumal. Ax ikx tokx jun mes jatumel nkubʼ qʼoʼn 12 pan twiʼ.

Twiʼ tpeʼmil ja xbʼalin at jun tkubʼel aʼ tkubʼ, aju nojni tukʼe aʼ. Najbʼen kyuʼn qe pal te txʼajbʼil. Ax ikx, atz tkubʼa matij patbʼil oyaj. Atz nchi kubʼ patin qe alumaj te oyaj te Jehová. Tuj tmij (tkʼajchaqil) tnam tkubʼ ja xbʼalin, ex aʼyetzun qe aj Israel nchi anqʼin tiʼjele ja xbʼalun lu.