KIʼNK qeye xjal iqin lobʼj kyuʼn. Keʼyinka uva nim twitz tok tiʼj tqan. Kabʼe xjal iqilte tiʼj tzeʼ. Ax ikx kaʼyink qeye higos ex granadas. ¿Jatumel ẍi tzaja tbʼanel lobʼj lu? Atz toj txʼotxʼ te Canaán, nantza, atz in nanqʼinatoq Abrahán, Isaac ex Jacob. Naq tuʼnjo tzaj waʼyij toj Canaán, tuʼntzunju i eʼx Jacob kyukʼe tuj tja atz Egipto. Otaqxi tzikʼ 216 abʼqʼi, tej kyanj tiʼn Moisés juntl maj aj Israel toj Canaán. Atzun jaʼle atz ateʼ tuj tzqij txʼotxʼ Qadés.

Aʼyejo xjal nchi anqʼin toj Canaán mya bʼaʼnqetoq. Tuʼntzojo, i ex tsamaʼn Moisés 12 xjal kaʼyil txʼotxʼ ex xi tqʼmaʼn kye: ‹Kykeʼyinke jniʼ xjal at ex qa nim kyipun, ex qa tbʼanel txʼotxʼ tuʼn tkuʼx awal toj, ex bʼaʼn tuʼn ttzaj kyiʼne junjun twitz awal›.

Tej kymeltzʼaj xjal, xi kyqʼamaʼn te Moisés kyjalu: ‹Axixtok, aju txʼotxʼ lu tbʼanilxix›. Xitzen kyyekʼin junjo twitz awal in tqʼoʼn txʼotxʼ. Aqetzuntl 10 kyxol qeju xjal ex samaʼn kyqʼama: ‹Aqejo xjal najleqeʼ tzma chix at nim kyipun, ex nim kywaʼlil, qa ma tzʼel qiʼn tnam kye ok qo kyimel kyuʼn›.

E tzaj xobʼ aj Israel tuʼn jlu. Ex kyqʼma: ‹Maswitlo bʼaʼn xqo kyim tuj Egipto ex mo tzalu tuj tzqij txʼotxʼ›, ax ikx kymatl: ‹Qo kyimel tuj qʼoj ex qe qxuʼjil ex qe qkʼwaʼl che tzyetel kyuʼn aj qʼoj. ¡Qqʼonk jun nejenel qxol te t-xel (tchʼexel) Moisés tuʼntzun qmeltzʼaj juntl maj tuj Egipto!›

Aʼyetzunjo kabʼe xjal ex samaʼn ok qʼuqeʼ kykʼuʼj tiʼj Jehová. Josué ex Caleb kybʼi, ex e onin kyiʼj aj Israel tuʼn tok qeʼ kykʼuʼj tiʼj Jehová, kyma: ‹Miʼn che xobʼe, quʼn at Jehová qukʼil. Qe xjal lu jun rat naj kbʼel kyiʼj quʼn›. Atzun kye xjal mitiʼ xi kybʼiʼn. Axpe kyajbʼilteq tuʼn tkubʼ kybʼiyoʼn Josué ex Caleb.

Tzaj nim tqʼoj Jehová tuʼn jlu, ex xi tqʼmaʼn te Moisés kyjalu: ‹Kykyaqil qeju o japun 20 abʼqʼi kyuʼn nijun kye kpol tuj Canaán. O kyilxi, mo o kylomxe nspikʼumale ex qe techal e bʼant wuʼne tuj Egipto ex tuj tzqij txʼotxʼ, ex nix tuʼnju mitiʼ in nok qʼuqe kykʼuʼj wiʼje. Tuʼntzunju, che bʼetil 40 abʼqʼi toj tzqij txʼotxʼ ajxi kykyim kykyaqil, noq oʼkx Josué ex Caleb che pol tuj txʼotxʼ lu›.