TXʼOLBʼABʼIL 35
Nchi tzaj tqʼoʼn Jehová tkawbʼil
OTAQ tzikʼ kabʼe xjaw kyetzlen aj Israel toj Egipto, e pon twiʼ witz Sinaí, ax ikx Horeb tbʼi. Atz tzalu yolin Dios tukʼil Moisés jatumel nkʼenttaq jun wiʼ tzeʼ. Nya nim ambʼil chi tel aj Israel tzalu.
Nche ayonteq xjal t-xe witz, atzun te Moisés otaq jax twiʼ witz. Tzaj tqʼamaʼn Jehová te Moisés twiʼ witz qa Tajtoq tuʼn t-xi kybʼiʼn aj Israel tyol tuʼntzun kyok te Ttnam. Tej tkuʼtz Moisés, xi tqʼmaʼn kye aj Israel aju oteq tzaj tqʼamaʼn Jehová te. Xi kytzaqʼweʼn aj Israel qa ok chi bʼiltoq te Jehová, tuʼnjo kyajbʼiltaq tuʼn kyok te ttnam.
Bʼenttzuntl jun tiʼ tuʼn Jehová, jatz sibʼ toj twiʼ witz, ex tzaj tinin t-xe kyaj tuʼn. Ax ikx yolin Jehová kyukʼe aj Israel ex tzaj tqʼamaʼn kye: ‹Aqine Jehová aju kyDiose ex aju etz qʼiʼn kyeye tuj txʼotxʼ Egipto›. Tzajtzen tqʼoʼn kawbʼil lu: ‹Miʼn che kʼulune kywitz junxitl dios, oʼkx nwitze tuʼn kykʼulune›.
Tzaj tqʼoʼntl Dios bʼeljajtl tkawbʼil kye aj Israel. E tzaj xobʼxix aj Israel. Tuʼntzunju, xi kyqʼmaʼn te Moisés kyjalu: ‹Aya yolin qukʼile, tuʼnjo ma qo tzaj xobʼe; quʼn qa ma yolin Dios qukʼile qo kyimele›.
Yajxitl, tzaj tqʼmaʼn Jehová te Moisés kyjalu: ‹Jatza twi witz. Che xel nqʼoʼne qe tzʼlom abʼj teya jatum tzʼibʼamaj qe nleye, aju wajbʼile tuʼn tkubʼ kybʼinchaʼne›. Tuʼntzunjo, jax juntl maj Moisés twiʼ witz. Kyaj ten 40 qʼij ex 40 qonikʼen atztzu.
At nimxix tkawbʼil Dios te ttnam. E kubʼ ttzʼibʼin Moisés qeju kawbʼil lu. Ax ikx tzaj tqʼoʼn Dios te Moisés aqeju kabʼe tzʼlom abʼj. Kywitzju tzʼlam abʼj lu, ax Dios kubʼ tzʼibʼin kye 10 kawbʼil aju otaq tzaj tqʼamaʼn kye aj Israel. Lajaj kawbʼil tbʼi tok.
Nim kyoklen qeju lajaj kawbʼil lu. Ax ikx qejo txqantl kawbʼil tzaj tqʼoʼn Dios kye aj Israel. Jun kyxol jlu ntqʼmaʼn: ‹Kykʼujlame Jehová tukʼe tkyaqil kyanmiye, tukʼe tkyaqil kykʼuʼje ex tukʼil tkyaqil kyipune ex tukʼe tkyaqil kynabʼile›. Juntl ntmaʼn: ‹Kykʼujlame qe kyukʼile ik tzaʼnx kyeye in kykʼujlan kyibʼe›. Tqʼama Jesucristo, aju tKʼwaʼl Dios, qa aʼyetzun kabʼe kawbʼil jlu nimxix kyoklen tzaj tqʼoʼn Dios kye aj Israel. Yajxitl, ok kʼelelxix qnikʼ tiʼj tKʼwaʼl Dios ex kyiʼj qejo t-xnaqʼtzbʼil.
