KIʼNKE ma chi el chʼiy tubʼechel ex ma che el chʼiy twitzjo tzeʼ lu. Atzun ttzeʼ Aarón jlu. ¡Tuj junx qonikʼen, e chʼiy tbʼechil ix qʼanax twitz! Qo xnaqʼtzal tiʼj tiquʼn.

Nimxix ambʼil e bʼet aj Israel tuj tzqij txʼotxʼ. At junjun mitiʼ ok qʼuqe tkʼuʼj qa a Moisés nejenel, nix qa a Aarón kynejel pal. Ik t-xim Coréjo, ax ikx Datán, Abiram ex 250 nejenel te tnam. Kykyaqil qeʼ jlu e ul ex xi kyqʼamaʼn te Moisés: ‹¿Tiquʼn nok tqʼoʼn tibʼe te nejenel qibʼaje?›

Xi tmaʼn Moisés te Coré ix kye qeju lepcheqeʼktoq tiʼj kyjalu: ‹Nchiʼjxi te prim, mo te qlax, bʼaʼn tuʼn ttzaj kyiʼne patbʼil kʼokʼsabʼil, ix kyqʼonkuxe kʼokʼjsabʼel kyoj. Chi tzajtzeye twitz ja xbʼalen te Jehová. Oktzen kʼelel qnikʼ alkye kjawel tjyoʼn Jehová›.

Toj juntl qʼij ul Coré kyukʼex 250 tukʼil twitz ja xbʼalun. Ax ikx e tzaj txqantl xjal kyukʼil. Oteq tzajxix tqʼoj Jehová. ‹Kyel laqʼeʼye kyiʼj kyja xjal mya bʼaʼnqeʼ, chi Moisés, ex miʼn tzʼok kymakoʼne jun tiʼxti at kye›. Okx kybʼiʼn xjal jlu, ex i el laqʼeʼ tiʼj kyja Coré, Datán ex Abiram.

Tqʼamatzetl Moisés: ‹Tuʼntzun jlu, kelel kynikʼe tiʼj alkye kjawel tskʼoʼn Jehová. Kʼelel kʼabʼchaj txʼotxʼ ex che xel tzʼaq qeju mya bʼaʼn xjal toj›.

Tej tbʼaj yolin Moisés, el kʼabʼchaj txʼotxʼ. Aju tja Coré ex tiʼchaq attoq te, ax ikx Datán ex Abiram ex qejo ateʼ kyukʼil e kux tzʼaq toj jul ex ok tmojbʼan tibʼ txʼotxʼ juntl maj kyibʼaj. Tej kybʼi xjal tqʼajqʼajel kywiʼ qeju ex tzʼaq toj txʼotxʼ, e jaw ẍchʼin ex kyqʼama: ‹¡Qo el oq! ¡Naq qo ex tzʼaq tuj tpaxil txʼotxʼ!›

Atzunte Coré kukxtaq at ttxlaj ja xbʼalin kyukʼex 250 xjal lepcheqeʼk tiʼj. Tuʼntzejo, tzaj tsamaʼn Jehová qʼaqʼ, ex kykyaqil xjal lu e kubʼ tzʼeʼy tuʼn. Tzajtzun tmaʼn Jehová te Eleazar aju tkʼwaʼl Aarón tuʼn tjaw tiʼn qeju kypatbʼil xjal otaq chi kyim ex tuʼn tkubʼ tbʼinchaʼn jun slikʼ tmaqsil patbʼil oyaj (kotz) kyukʼe jlu. Aju tmaqsil (tjpubʼil) patbʼil oyaj lu, tzaj tyekʼen kye aj Israel qa oʼkx Aarón kyukʼe tkʼwal jakutoq chi ajbʼen te pal te Jehová.

Tajbʼilteq Jehová tuʼn t-xi tyekʼin qa oʼkx Aarón kyukʼex tkʼwaʼl otaq chi jaw tjyoʼn tuʼn kyajbʼen te pale. Tuʼntzunjo, tzaj tqʼamaʼn te Moisés: ‹Iltiʼj tuʼn ttzaj tiʼn junjun nejenel kye junjo kʼloj kyyajil aj Israel jun ttzeʼ. A Aarón tzul qʼinte tzeʼ, aju te tyajil Liví. Atz che kbʼel tqʼoʼna tzeʼ lu tuj ja xbʼalen ex twitz kajon kʼubʼel nleye. Aju ichin ma jaw nskʼoʼne tuʼn tok te pal kʼelel tbʼechel ttzeʼ›.

Toj juntl qʼij tej qsqix ok tkaʼyin Moisés, ¡ajo ttze Aarón otaq tzʼel tbʼechil ex oteq chi qʼanax twitz! ¿Nel tnikʼe jaʼle tiquʼn el tubʼechel ttzeʼ Aarón tuʼn Jehová?