¿AJTZQINJU tbʼanel xuʼj tuʼne aju lu tzul keʼyil David? Abigail tbʼi xuʼj lu. Tbʼanel ximen, ex onin tuʼn miʼ tkubʼ tbʼinchen David jun mya bʼaʼn. Yajxitl kʼelel qnikʼ tiʼ bʼant tuʼn Abigail, atzun jaʼle qo xnaqʼtzal tiʼtoq nbʼaj tuj tanqʼibʼil David.

Tej tel oq David twitz Saúl, xiʼ ewil tibʼ toj jun jul. E pontzun terman ex qejo txqantl toj tja tukʼe. Chʼixmelo kyaje syent xinaq e pon tukʼil, ex oktzen David te kynejenel. Xiʼtzun David tukʼe ajkawil te Moab ex xi tqʼamaʼn: ‹Najsame, qape jaku kyaj ten nmane ex ntxuʼye najal kyukʼele tzmaxi ok tok nbʼiʼne tiʼ tzul wiʼje›. Xiʼtzun David ex qe tukʼil ewil kyibʼ toj kʼul.

Yajxitl, ok tojtzqiʼn David Abigail. Aju tchmil Abigail, Nabaltaq tbʼi, jun xjal qʼinenteq ex attoq nim ttxʼotxʼ. Atteq 3.000 t-ẍneʼl, mo t-rit ex attaq 1.000 tchip (tchiv). Nya bʼaʼn xjaltoq te Nabal. Tbʼaneltaq kaʼyin (chichʼeteq kin) Abigail aju t-xuʼjel Nabal ax ikx bʼaʼn bʼinchan aju bʼaʼn. Jun maj kolinpete kyiʼj toj tja. Qo xnaqʼtzan tiʼj tzeʼn tena jlu tuʼn.

Nim xtalbʼil o bʼent tuʼn David ex qe tukʼel te Nabal. O che onin tuʼn kyxqʼuqet qe tkarner Nabal. Jun maj ex tsamaʼn David xjal qanil jun xtalbʼil te Nabal. Tzmatoq nel kylanel ẍneʼl tuʼn Nabal ex qe tmajen tej kypon xjal ex samaʼn. In ninqʼijentaq Nabal, ex attoq nim tbʼanel wabʼj tukʼe. Xitzun kymaʼn t-xjal David te: ‹Tbʼanel xjal qoʼye tukʼeye. Mitiʼxi o tzʼel qelqʼaʼne jun t-rita, noq oʼkx o qo onine tuʼn kyxqʼuqit. Atzun jaʼle, qape jaku tzaj tqʼoʼna qwaye›.

‹Mlay txi nqʼoʼne wabʼj kye xjal ik tzeʼnj aʼyiye›, chi Nabal. Ok ten yolil mya bʼaʼn yol tiʼj David. Tej t-xi kyqʼamaʼn xjal jlu te David, tzaj nim tqʼoj tuʼn jlu ex xi tqʼamaʼn kye kyjalu: ‹¡Kykʼalonke kyespadiye kykʼuʼje!› Xiʼtzun David kyukʼe t-xjal tuʼn tkubʼ kybʼiyoʼn Nabal kyukʼe tmajen.

Tej tok tbʼiʼn jun majen aju mya bʼaʼn tyol Nabal, xiʼ qʼamalte jlu te Abigail. Oktzun ten naj Abigail bʼinchal wabʼj, ex ok tqʼoʼn kyiʼj chej ex eltzun bʼet. Tej tilwaj David tuʼn Abigail, moqa tej kyjune Abigail tukʼe David, kuʼtz Abigail tibʼaj tchej, ex kubʼ mejeʼ ex xi tqʼamaʼn te: ‹Miʼ tzʼok tqʼoʼn twiʼya tiʼj nchmile aju Nabal. Quʼn axtok mixtiʼ tnabʼl ex in tbʼincha aju mya bʼaʼn. Kʼamonxa jun oyaj lu ex najsankuya qile›.

‹At tnabʼila›, chi David. ‹Tuʼnju ma tzʼonina wiʼje tuʼn miʼn tkubʼ nbʼiyoʼne Nabal tuʼnjo mya bʼaʼn xjal te. Bʼaʼn tuʼn taja tjaya ex miʼn bʼisune›. Tejtzun tkyim Nabal ok Abigail te t-xuʼjel David.