NCHI qʼojin juntl maj aj Filisteo kyiʼj aj Israel. Ateʼkx qeju oxe ttzik David kyxol qe tsoldad Saúl. Tuntzun jlu, xi tqʼamaʼn Jesé te David: ‹Qʼinxa triw ex qʼinxe wabʼj kye ttzika. Ex qʼintza tqanil weye tzeʼn ateʼqe›.

Tej tpon David jatumel atqeʼtoq soldad, okx naj jyol qe ttzik kyxol. Aju aj Filisteo nim twaʼlil Goliat tbʼi, netztaq xmayil kyiʼj aj Israel. Kukx bʼent jlu tuʼn toj tkyaqil prim, mo qlax, ax ikx tuj tkyaqil qale tuj 40 qʼij bʼent jlu tuʼn. In netztaq ẍchʼil: ‹Kyskʼoʼnktze jun kyxole tuʼn ttzaj qʼojel wukʼile ex qa ma chin kubʼ tbʼiyoʼne, ok qo okele te kymajene. Qatzun qa ma kubʼ nbʼiyoʼne, ok che okele te qmajene. Kyjyonktze jun tuʼn tqʼojin wukʼile jaʼlo›.

Xi tqanen David kye junjun soldad: ‹¿Tiʼ kxel qʼoʼn teju xjal qa ma kubʼ tbʼiyoʼn ajo aj Filisteo lu, tuʼn miʼ kukx tkubʼ kychʼixwi aj Israel tuʼn?›

‹Kxel tqʼoʼn Saúl nim qʼinimabʼil te›, chi jun soldad. ‹Ax ikx kxel tqʼoʼn tmeʼl tuʼn tok te t-xuʼjil›.

Kykyaqil aj Israel oteq chi tzaj xobʼ tuʼn Goliat tuʼnjo nimtoq tweʼ. Chʼimelo oxe metro tweʼ, ax ikx at juntl soldad tukʼil, aju qʼiʼn jun sleʼw kʼuxbʼil tuʼn te kolbʼil.

I eʼx junjo soldad ix xe kyqʼamaʼn te Saúl qa tajteq David tuʼn tbʼiyen tukʼe Goliat. Xitzen tmaʼn Saúl te David: ‹Mlay bʼant. Quʼn tzma tal qʼaye, atzun te xjal lu ojtxix toklen te soldad›. Xi ttzaqʼweʼn David: ‹Kubʼ nbʼyoʼne jun oso ex jun bʼalun tej t-xi kyiʼn t-ẍneʼl nmane. Ikxtzun ktel aj Filisteo lu wuʼne. Tzul tqʼoʼn Jehová onbʼil weye›. Tuʼntzujo, xi tmaʼn Saúl te: ‹Txiʼya ex awt Jehová txiʼ tukʼila›.

Kuʼx David ttzi jun nimaʼ, jaw tjyoʼn jweʼ abʼj ex e kuʼx tqʼoʼn toj tpa (tmorral). Jatztzun ex qʼiʼntoq xobʼil abʼj tuʼn, tuʼn tbʼiye tukʼe Goliat. Naq jaw tzeʼn Goliat tiʼj. Kubʼ t-ximin qa nya kwesttaq tuʼn tkyim David tuʼn.

‹Ku ttzaja tzalu›, chi Goliat, ‹kxel nqʼoʼn t-ximlala kye txkup nchi lipen twitz kyaʼj ex kye txkup nchi najan tuj kʼul›. Xitzun ttzaqʼweʼn David: ‹Ma tzaja wiʼje tukʼe jun espada, jun lans ex tukʼe juntl wiq lans chʼin tqan, atzun weye chin okel tzoqpaje tiʼja toj tbʼi Jehová. Tzul qʼoʼna jaʼlo tuʼn Jehová tuj nqʼabʼe ex kybʼel nbʼiyoʼna›.

Xitzun ojqelan, moqa xi rinin David tuʼn tqʼojin tukʼe Goliat. Jatz tiʼn David jun abʼaj tuj tpa, kux tqʼoʼn toj t-xobʼil, xitzun t-xoʼn tiʼj Goliat tukʼil tkyaqil tipumal. ¡Okx abʼj tuj twiʼ Goliat ex kyim! Tej kylonte aj Filisteo tkubʼ tzʼaq kynejenel, i el oq. I ex lepetzun aj Israel kyiʼj ex e kubʼ kyuʼn.