TEJ tkyim ajkawil Jeroboán, aʼyeqetljo e kawin kyibʼaj 10 kʼloj kyiyjil aj Israel mya bʼaʼn xjalqetaq. Aju masxix mya bʼaʼn ajkawil ok aju Acab. ¿Bʼiʼn tuʼne tiquʼn? Tuʼnju mya bʼaʼntaq tmod t-xuʼjel aju Jezabel tbʼi.

Nya aj Israeltaq te Jezabel. Tmeʼltoq ajkawil te Sidón te. Nkʼulinteq twitzju nya ax dios Baal, ok Acab ex nimku aj Israel tuʼn Jezabel te ajbʼel te Baal. Ikʼontaq Jehová tuʼn Jezabel ex e kubʼ tbʼiyoʼn nim tmajen Jehová. Aqetzen txqantl tmajen Jehová i eʼx ewil kyibʼ tuj jul tuʼntzun miʼ kykubʼ bʼiyoʼn. Qa tajteq Jezabel jun tiʼ, in chi kubʼtoq tbʼiyoʼn xjal naq tuʼn tkambʼet aju tajbʼiltaq.

Jun qʼij, otaq tzaj nim tbʼis Acab. Tuʼntzojo xi tqanen Jezabel te: ‹¿Tiquʼn in bʼisuna jaʼle?›

‹Tuʼnju saj tqʼamaʼn Nabot weye›, chi Acab. ‹Wajtaqe tuʼn ttzaj nlaqʼoʼne aju ttxʼotxʼ at tqan uva toj. Melay txi nqʼoʼne teya chi Nabot weye›.

‹Mi bʼaj tkʼuʼja›, chi Jezabel te. ‹Jaku txi nqʼoʼne teya›.

Xitzun ttzʼibʼan Jezabel nim uʼj kye qe nejenel tuj tnam jatumel najli Nabot, ex xi tqʼamaʼn kye: ‹Kyjyoʼnktze junjun xjal aqeju mya bʼaʼn kymod, tuʼntzun t-xi kymaʼn qa otaq yolin Nabot nya bʼaʼn tiʼj Dios ex tiʼj ajkawil. Ax ikx kyqʼinxe tiʼjxi tnam ex kbʼiyonkuye tuʼn abʼj›.

Tej tok tbʼiʼn Jezabel qa otaq kyim Nabot, xi tmaʼn te Acab kyjalu: ‹Bʼet-xtzuna jaʼlo ex toka te tajwil tqan t-uva Nabot›. Tzeʼn teya toj twitz, ¿ilpetzulo tiʼj tuʼn tkubʼ tkastiw Jezabel tuʼnjo ma bʼent tuʼn?

Tuʼntzunju, tej tbʼet ambʼil xi tsamaʼn Jehová Jehú tuʼn tkubʼ tkastiw Jezabel. Tej tok tbʼiʼn Jezabel qa chʼixtaq tpon Jehú, kubʼ tbʼinchaʼn tten tuʼntzun tbʼanel tzʼela toj twitz Jehú. Tej tpon Jehú, lutaq Jezabel tokteq ttzi ventan, xi tmaʼn kye xjal ateʼkxteq tukʼe Jezabel tuj ja te kawbʼil: ‹¡Kyxonkutze xuʼj!› Kutztzun kyxoʼn, ik tzaʼn tkuʼx toj tilbʼilal, ex bʼiʼx kyim. Iktzun bʼaj Jezabelju aju xuʼj mya bʼaʼn tmod.