KAʼYINKA xjal tkuʼx tuj aʼ. ¡Ya chʼix t-xi bʼelqʼuʼn tuʼn kiẍ! ¿Ojtzqiʼn xjal lu tuʼne? Jonás tbʼi. Ok kʼelel qnikʼ tiquʼn okx tqʼon tibʼ Jonás tjaqʼ nim mya bʼaʼn.

Tsanjel Jehová te Jonás. Tej otaq kyim Eliseo, tzaj tqʼamaʼn Jehová jlu te: ‹Txiʼya tuj nintz tnam Nínive ex qʼmanxe kye xjal qa nim il nkubʼ kybʼinchaʼn›.

Nyateq taj Jonás tuʼn t-xiʼ. Kyjuʼtzun jax toj jun bark tuʼn t-xiʼ tuj junxitl plaj. Mya bʼaʼn ela jlu toj twitz Jehová. Tuʼntzunju nimxix jaw xtuleqʼin aʼ tuʼn. Chʼixtoq tkuʼx bʼaj bark t-xe aʼ. Aqejo qʼil bark nim e tzaj xobʼ, ex e ok ten qanel onbʼil te kydios.

Xix tqʼamaʼn Jonás kye: ‹Ajbʼel qine te Jehová aju Dios bʼinchal kyaʼj ex Txʼotxʼ. Ma chin el oqe tuʼn miʼn tkubʼ nbʼinchiye aju ma tzaj tqʼamaʼn Jehová weʼye›. Xitzun kyqanin te: ‹¿Tiʼ kbʼantel quʼne tiʼja tuʼntzun tweʼ mar?›

‹Chin kyxonxe tuj mar, tuʼntzun tkubʼ numeʼ mar›, chi Jonás kye. Nyatoq kyaj qejo yukel bark tuʼn tkux kyxoʼn Jonás, tejtzen tjaw pulin mastl aʼ, kuʼx kyxoʼn Jonás tuj mar. Kubʼtzun numeʼ mar.

Tej tkux bʼaj Jonás tjaqʼ aʼ, xi bʼilqʼuʼn tuʼn jun nintzkuʼ (maʼxix) kiẍ. Naqtzen tuʼnj mitiʼ kyim. Oxe qʼij ex oxe qonikʼan ten Jonás tuj tkʼuʼj kyiẍ. Nim tzaj tbʼis Jonás tuʼnju mitiʼ kubʼ tbʼinchaʼn ajo tzaj tqʼamaʼn Jehová te tuʼn t-xiʼ tuj Nínive. Tuʼntzunju, ¿bʼiʼn tuʼne tiʼ bʼent tuʼn?

Ok ten Jonás qanil onbʼil te Jehová. Kyjuʼtzun bʼant tuʼn Jehová tuʼn tjatz xaʼwin (wuqʼe) Jonás tuʼn kiẍ tzmax ttzi mar. Yajxitl, xiʼ Jonás atz Nínive. ¿Tiʼ ntzaj tyekʼen jlu qe? Qa iltiʼj tuʼn tkubʼ qbʼinche tkyaqilju in tzaj tqʼamaʼn Jehová qe.