KAʼYINKA Samuel nkubʼ tqoʼn aseyt toj twiʼ xjal lu. Ik bʼentjo ojtxe tuʼn t-xi yekʼet qa otaq jaw jyoʼn jun xjal te ajkawil. Tzaj tqʼamaʼn Jehová te Samuel tuʼn tkubʼ tqoʼn aseyt toj twiʼ Saúl. Jun tbʼanelxix aseyt jlu ex tbʼanil tkʼokʼjal.

Mitiʼ ul tuj t-ximbʼetz Saúl qa jakutaq tzʼok te jun tbʼanel ajkawil. ‹Tiyjil Benjamín we qin, aju mas tal chʼin kyxol aj Israel›, chi Saúl te Samuel. ‹¿Tiquʼn in tzaj tmaʼna weye qa chin okele te kawil?› Tbʼanel ela Saúl toj twitz Jehová tuʼnju nya tajteq tuʼn tjaw tnimsaʼn tibʼ. Tuʼntzunjo, jaw tjyoʼn tuʼn tok te ajkawil.

Nya mebʼatoq (prowtoq) te Saúl ex nya chʼinteq tweʼ. Qʼinenqetaq toj tja, tbʼanel tilbʼilal ex nim twaʼlel. ¡Mas nim twaʼlil twitz alkyexku juntl aj Israel! Ax ikx tbʼaneltoq ojqelan (rinin), ex nimtaq tipumal. Nchi tzalajteq xjal tuʼnjo a Saúl jaw tjyoʼn Jehová te ajkawel, kykyaqil e jaw ẍchʼin ex kyqʼama: ‹¡Bʼaʼnwt tzʼel tqʼij ajkawil!›.

Nchi qʼojenxtaq tnam kyiʼj aj Israel. Tej tzmatoq nnok Saúl te ajkawil, e jax qe aj Amón qʼojel kyiʼj. Jawtzun tjyoʼn Saúl nim soldad, ex e kubʼ qe aj Amón kyuʼn. In che tzalajteq aj Israel tuʼnjo a Saúl in kawin kyibʼaj.

Ikʼ nim abʼqʼi jatumel e kambʼan qe aj Israel tuʼn Saúl kyibʼaj nim tnam. Ax ikx at jun tkʼwaʼl Saúl ajo at nim tipun, Jonatán tbʼi. Onin Jonatán kyiʼj aj Israel tuʼn kykambʼan kyiʼj nim tnam. Kukxtaq kyqʼojen qe aj Filisteo kyiʼj aj Israel. Jun qʼij, i tzaj nimxix aj Filisteo qʼojil kyiʼj aj Israel.

Xi tmaʼn Samuel te Saúl tuʼn tayon ajxe tpon tuʼn tkubʼ tqʼoʼn jun oyaj twitz Jehová. Naq ajo yajxi pon Samuel. Tzaj xobʼ Saúl tuʼnju xi t-ximin qa jakutaq chi ok ten naj aj Filisteo qʼojel kyiʼj, tuʼntzun jlu, mitiʼ ayon ex kubʼ tpaten naj oyaj twitz Jehová. Tejtzun tpon Samuel, xi tqʼamaʼn te Saúl qa mya bʼaʼn aju otaq bʼant tuʼn. ‹Ktzajel tjyoʼn Jehová juntl xjal tuʼn tkawen kyibʼaj aj Israel›, chi Samuel te.

Yajxitl, kubʼ tbʼinche juntl maj Saúl mya bʼaʼn twitz Jehová. Xi tqʼmaʼn Samuel te: ‹Mas bʼaʼn tuʼn t-xi qniman Jehová twitzju tuʼn kyxi qqʼoʼn tbʼanel ẍneʼl te jun oyaj te. Quʼn mitiʼ ma tzʼokx tbʼiʼna Jehová, melay kawintla kyibʼaj aj Israel›.

Ntzaj tqʼoʼn jlu jun tbʼanel xnaqʼtzbʼil qe. Ntzaj tyekʼin qa iltiʼj tuʼn qbʼin te Jehová toj tkyaqil ambʼil. Ax ikx ntzaj tyekʼe qe qa jun tbʼanil xjal, ik tzeʼnteq Saúl, jaku tzʼok te mya bʼaʼn. ¡Miʼ txi qqʼoʼn ambʼil tuʼn tikʼ jlu qiʼj!